ARYNews.tv | Urdu – Har Lamha Bakhabar

Tag: PTI chairman

  • این اے122دھاندلی کے کئی ثبوت رپورٹ نہیں کئے گئے،عمران خان

    این اے122دھاندلی کے کئی ثبوت رپورٹ نہیں کئے گئے،عمران خان

    اسلام آباد: تحریکِ انصاف کے چیئرمین عمران خان کا کہنا ہے کہ این اے ایک سو بائیس میں دھاندلی کے متعدد ثبوت رپورٹ کا حصہ نہیں بنائے گئے ہیں، انہوں نے جانچ پڑتال کمیشن کے خلاف ٹریبونل میں درخواست دائر کردی ہے۔

    عمران خان کی جانب سے این اے ایک سو بائیس کے ریکارڈ کی جانچ پڑتال کرنے والے کمیشن کے خلاف درخواست دائر کر دی گئی ہے، الیکشن ٹریبونل میں دائر درخواست عمران خان نے مؤقف اختیار کیا ہے کہ ریکارڈ کی جانچ پڑتال کے دوران دھاندلی کے بہت سے ثبوت سامنے آئے مگر کمیشن نے اسے رپورٹ کا حصہ نہیں بنایا، ایسا کرکے لوکل کمیشن نے ٹریبونل کے حکم کی مکمل تعمیل نہیں کی۔

    عمران خان کا کہنا تھا کہ لوکل کمیشن کے مختلف بیانات سے مقدمے کی کارروائی سے متعلق ابہام پیدا ہوا ہے، عمران خان نے الیکشن ٹریبونل سے درخواست کی ہے کہ لوکل کمیشن کے خلاف قانون کے مطابق کارروائی عمل میں لائی جائے۔

    واضح رہے کہ الیکشن ٹریبونل نے این اے 122 میں ووٹوں کی جانچ پڑتال کے لئے کمیشن قائم کیا تھا، جس نے انتخابی عمل میں بے ضابطگی کی تو تصدیق کی ہے لیکن اسے دھاندلی قرار دینے سے گریز کیا ہے۔

  • حکومت بےاختیارجوڈیشل کمیشن بناناچاہتی ہے، عمران خان

    حکومت بےاختیارجوڈیشل کمیشن بناناچاہتی ہے، عمران خان

    اسلام آباد: عمران خان نے کہا ہے کہ حکومت غلط فہمی میں نہ رہے پاکستان بند کیا تو حکومت بھی نہیں چل سکے گی۔

    عمرے کی آدائیگی کے بعد میڈیا سے گفتگو میں پاکستان تحریک انصاف کے چیئرمین عمران خان کاکہناتھا انہیں اب پتہ چلا کہ ان پرمقدمہ کیوں قائم کیاگیا، عمران خان نے کہاحکومت چاہتی ہےٹریبونل کے فیصلے جوڈیشل کمیشن نہ بھیجے جائیں، شفاف تحقیقات ہوتو یہ سال الیکشن کاسال ہوگا۔

     چیئرمین تحریک انصاف کاکہناتھا ن لیگ نےلاکھوں بیلٹ پیپرچھپوا کرٹھپے لگوائے اسی لیے وہ تحقیقات سے خوفزدہ ہے،انصاف نہ ملاتوسڑکوں پرنکلیں گے۔

     عمران خان نے خیبرپختونخوا سے سینیٹ الیکشن لڑنے کااعلان کرتے ہوئے کہا اگرپی ٹی آئی کاکوئی رکن اسمبلی میں گیاتووہ پارٹی میں نہیں رہےگا۔

    عمران خان نے کہا کہ مسلم لیگ ن اس لیے ڈررہی ہےکہ انھیں پتاہے کہ انھیں ڈیڑھ کروڑ ووٹ نہیں ملے، نگراں حکومت نےآخری تین دنوں میں کئی لاکھ بیلٹ پیپرز چھپوائے، یہ ریٹرننگ افسران کا کمال ہی کا تھا کہ انتخابات میں انہیں اتنے زیادہ ووٹ ملے۔

    ان کا کہنا تھا کہ ریٹرننگ افسران کے پیچھے سابق چیف جسٹس افتخار محمد چوہدری اور جسٹس ریٹائرڈ خلیل الرحمان رمدے تھے، انہوں نے کہا کہ عدالت میں افتخار چوہدری کا سامنا کرنے کے لئے تیار ہوں، ثابت کردوں گا کہ سابق چیف جسٹس نے جمہوریت کوکتنا نقصان پہنچایا، افتخار چودھری اور جسٹس رمدے نے ملک سے غداری کی ہے۔

     انہوں نے کہا کہ شادی کے فوری بعد عمر ہ کرنے جانا کسی سیاسی مقصد کیلئے نہیں تھا بلکہ میری بیوی کی خواہش تھا، وہاں جا کر بھی پاکستان اور نئے پاکستان کیلئے ہی دعائیں کی۔

  • افتخارچوہدری کاہرجانے کادعویٰ، عمران خان کوسمن جاری

    افتخارچوہدری کاہرجانے کادعویٰ، عمران خان کوسمن جاری

    اسلام آباد: سابق چیف جسٹس افتخار محمد چودھری کی جانب سےبیس ار ب روپے کے ہتک عزت کے دعوے پر عمران خان کو نوٹس جاری کر دیا گیا۔

    اسلام آباد کی عدالت میں سابق چیف جسٹس افتخار محمد چودھری کی جانب سے دائرازالہ حیثیت عرفی کی درخوست پر تحریک انصاف کے سربراہ عمران خان کو ہتک عزت کا نوٹس جاری کر دیا گیا ۔

     سیشن جج نذیر احمد کی عدالت سے جاری سمن میں عمران خان کو انتیس جنوری کو عدالت میں پیش ہونےکی ہدایت کی گئی ہے ۔

    تحریک انصاف کے ترجمان نعیم الحق کا کہنا ہے کہ سمن کے حوالےسے جواب وکلاء سے مشاورت کے بعد دیا جائے گا، سمن پاکستان تحریک انصاف سیکریٹریٹ ایمبیسی روڈ کے پتہ پر بھیجا گیا ہے۔

    واضح رہے کہ افتخار محمد چودھری کی جانب سے دعویٰ میں کہا گیا کہ عمران خان معافی مانگیں یا 20 ارب روپے ہرجانہ ادا کریں ۔

  • عمران خان اہلیہ کے ہمراہ عمرے کی ادائیگی کیلئے روانہ

    عمران خان اہلیہ کے ہمراہ عمرے کی ادائیگی کیلئے روانہ

    اسلام آباد: پاکستان تحریکِ انصاف کے چیئرمین عمران خان اہلیہ کے ہمراہ عمرہ کی ادائیگی کیلئے سعودی عرب روانہ ہوگئے۔

    پاکستان تحریکِ انصاف کے سربراہ اپی اہلیہ ریحام خان کے ہمراہ عمرے کی ادائیگی کیلئے سعودی عرب روانہ ہوگئے ہیں، ذرائع کا کہنا ہے کہ عمران خان تین روز تک سعودی عرب میں قیام کرینگے۔ عمران خان نے شادی کے فوری بعد  عمرے کی ادائیگی کا پروگرام بنایا تھا۔

    عمران خان سعودی عرب میں عمرہ ادائیگی کے دوران ایک رات مدینہ اور ایک رات مکہ میں قیام کریں گے۔

    یاد رہے کہ شادی کے بعد یہ دونوں کا بیرون ملک پہلا دورہ ہے۔

    واضح رہے کہ گزشتہ روز امکان ظاہر کیا جارہا تھا کہ سعودی عرب میں ڈاکٹر طاہرالقادری اور عمران خان کی ملاقات متوقع ہیں، ڈاکٹر طاہرالقادری پیر کے روز سے مدینہ منورہ میں موجود ہیں۔

    بعد اذاں تحریک انصاف کی جانب سے ملاقات کی خبروں کی تردید کر دی تھی، پاکستان تحریکِ انصاف کی ترجمان شیریں مزاری کا  کہنا تھا کہ عمران خان اپنی اہلیہ کے ہمراہ صرف عمرے کی ادائیگی کے لیے سعودی عرب جا رہے ہیں۔

    ان کا کہنا تھاکہ عمران خان کو معلوم تک نہیں کہ طاہر القادر ی سعودی عرب آرہے ہیں، عمران خان کی سعودی عرب میں طاہر القادر ی سے کوئی ملاقات نہیں ہوگی۔

  • افتخارچوہدری کا عمران خان کیخلاف20 ارب روپے ہر جانے کا دعویٰ

    افتخارچوہدری کا عمران خان کیخلاف20 ارب روپے ہر جانے کا دعویٰ

    اسلام آباد: سابق چیف جسٹس افتخار چوہدری کی جانب سے پاکستان تحریکِ انصاف کے سربراہ عمران خان کے خلاف 20ارب روپے کے ہر جانے کا دعویٰ کردیا گیا ہے۔

    ایف ایٹ کچہری میں سیشن جج نذیراحمد نے سابق چیف جسٹس کے دعویٰ کی سماعت کی ، دوران سماعت افتخار چوہدری کی جانب سے شیخ احسن الدین پر مشتمل وکلاء پینل نے اسلام آباد کی سیشن کورٹ میں دعویٰ دائر کیا۔

    شیخ احسن ایڈووکیٹ نے دعویٰ میں مؤقف اپنایا کہ عمران خان کی جانب سے عام انتخابات2013 میں دھاندلی کے حوالے سے سابق چیف جسٹس پر بے بنیاد الزامات عائد کئے گئے، جس کی وجہ سے دنیا بھر میں بدنامی ہوئی ،افتخار محمد چوہدری اور اُن کے خاندان کو ذہنی کوفت کا سامنا کرنا پڑا جبکہ عمران خان اپنے الزامات کو ثابت نہیں کرسکے ہیں۔

    دعویٰ میں کہا گیا کہ وہ معافی مانگیں یا 20 ارب روپے ہرجانہ ادا کریں ۔عدالت نے نوٹس جاری کرتے ہوئے 29جنوری کو چیئرمین تحریک انصاف عمران خان سے جواب طلب کرلیا ہے۔

    واضح رہے کہ سابق چیف جسٹس آف پاکستان افتخار محمد چوہدری گزشتہ سال دسمبر میں اپنے عہدے سے سکبدوش ہوئے تھے۔ عمران خان کی جانب سے سابق چیف جسٹس پر الزامات عائد کئے گئے ہیں کہ افتخار محمد چوہدری عام انتخابات میں ہونے والی دھاندلی کے ذمہ دار ہیں لہذا ان کے خلاف آرٹیکل 6 کے تحت کارروائی کی جائے۔

  • رانا ثناء اللہ اسی سال جیل میں ہوں گے، عمران خان

    رانا ثناء اللہ اسی سال جیل میں ہوں گے، عمران خان

    اسلام آباد: عمران خان نے کہا کہ رانا ثناء اللہ کو اسی سال جیل جانا ہوگا کوئی غلط فہمی میں نہ رہے کہ اپنے موقف سے پیچھے ہٹ جائیں گے۔

    اسلام آباد میں دھرنا کنونشن سے خطاب کرتے ہوئے پاکستان تحریک انصاف کے چیئرمین عمران خان کا کہنا تھا کہ دھرنے کو 126 دن ہوچکے تھے سمجھ نہیں آرہا تھا کیا کروں،دھرنے میں بڑی تعداد میں لوگ شریک ہوئے سب کا مشکور ہوں۔

    انہوں نے کہا کہ تاریخ میں ایسا مظاہرہ کرنے کا کوئی سوچ بھی نہیں سکتا تھا، کہا جارہا تھا اسکرپٹ کے مطابق چل رہے ہیں، پاکستان کی تاریخ میں اتنے لوگ کبھی نہیں نکلے تھے، ہم پاکستان میں جمہوریت کے لئے نکلے تھے، جمہوریت کا مطلب آزادی ہے، تبدیلی جب آتی ہے جب خواتین اور بچے جاگ جاتے ہیں۔

    عمران خان نے کہا کہ دھرنے کے دوران ہمارے نوجوان شہید ہوئے جہلم میں گلوبٹوں نے حملہ کیا،حملہ کرنے والے لوگوں کو ابھی تک گرفتار نہیں کیا گیا۔

    چیرمین تحریک انصاف نے کہا کہ ہم ملک میں جمہورہت کے لئے دھرنے کے لئے نکلے تھے لیکن فیصل آباد میں تحریک انصاف کے کارکنوں پر گولیاں چلائی گئیں اور یہ سب کچھ رانا ثنا اللہ کے ایما پر ہوا، رانا ثنا اللہ سن لیں کہ وہ اسی سال جیل میں جائیں گے۔

    عمران خان نے کہا کہ انتخابات 2013  میں سب سے زیادہ دھاندلی ہوئی، سانحہ پشاور کے بعد احتجاج کےنے کیلئے دل نہیں مان رہا تھا۔

    عمران خان کا کہنا تھا کہ حکومت نے جوڈیشل کمیشن نہ بنایا تو ہم پورا ملک بند کردینگے، انہوں نے کہا کہ دھرنا ختم ہونے کے بعد اب تحریک انصاف کی پوری توجہ خیبر پختونخواہ کی طرف ہو گی۔اب خیبر پختونخواہ میں اصلاحات کرنے جا رہے ہیں، جن میں میرٹ کو ترجیح دی جائے گی اور اور سکولوں میں ٹیچر جبکہ ہسپتالوں میں ڈاکٹر میسر ہوں گے۔

    خیبر پختونخواہ میں آئندہ کے لائحہ عمل کا اعلان کرتے ہوئے عمران خان کا کہنا تھا کہ اب ہم پختونخواہ کی پولیس کو مثالی بنائیں گے جبکہ پورے صوبے میں پینے کا صاف پانی بھی میسر ہو گا۔انہوں نے مزید بتایا کہ شہروں کی صفائی کروانا ہماری پہلی ترجیح ہے جبکہ صوبے بھر مین ایک ارب درخت بھی لگائے جائیں گے۔جبکہ صوبائی حکومت کی جانب سے عمران خان نے اعلان کیا کہ وہ پنے صوبے میں بلدیاتی انتخابات کروانے کے لیے بھی تیار ہیں جس کے ذریعے اقتدار نچلی سطح کو منتقل ہو جائے گا۔

  • ہماری پارٹی وی آئی پی کلچر کیخلاف ہے، عمران خان

    ہماری پارٹی وی آئی پی کلچر کیخلاف ہے، عمران خان

    اسلام آباد: پاکستان تحریک انصاف کے چیئرمین عمران خان نے کہا ہے کہ نیا پاکستان بنانے کیلئے ہمیں سب سے پہلے خود میں تبدیلی لانا ہو گی، ہماری پارٹی وی آئی پی کلچر کیخلاف ہے۔

    ان خیالات کا اظہار انہوں نے وزیر اعلیٰ پرویز خٹک کو لکھے گئے خط میں کیا، انہوں نے وزیر اعلیٰ خیبر پختونخواہ کو ہدایت کی ہے کہ آئندہ نہ تو انہیں پروٹوکول دیا جائے اور نہ ہی کوئی ایم پی اے یا وزیر ان کا استقبال کرنے کیلئے ایئرپورٹ تشریف لائے یہاں تک کہ وزیراعلیٰ بھی ان کا استقبال نہ کریں۔

     انہوں نے کہا ہے کہ حال ہی میں جب میں نے آرمی پبلک سکول پشاور کا دورہ کیا تو کچھ غیر ضروری لوگ میرے قافلے میں شامل ہوئے جس پر پروٹوکول بڑھنے کے سبب عوامی خفت کا سامنا کرنا پڑا۔ اگر وہ کسی سرکاری تقریب میں شرکت کے لیے پشاور پہنچیں تو صرف متعلقہ ایم پی اے یا وزیر تقریب میں موجود رہے۔

     انہوں نے واضح کیا ہے کہ تحریک انصاف نیا پاکستان بنایا چاہتی ہے اس کیلئے انہیں خود سے ہی ابتداء کرنا ہو گی، عمران خان کا کہنا ہے کہ تحریک انصاف حکمران اشرافیہ کی روایتی منافقت میں شامل نہیں ہوسکتی۔

  • سانحہ پشاور آج بھی ذہنوں میں تازہ ہے، عمران خان کا ٹوئیٹ

    سانحہ پشاور آج بھی ذہنوں میں تازہ ہے، عمران خان کا ٹوئیٹ

    اسلام آباد: پی ٹی آئی کے چیئرمین عمران خان کا کہنا ہے کہ قوم کی حفاظت کے لیے دہشتگردی کے خلاف جنگ جاری رکھیں گے۔

    پاکستان تحریکِ انصاف کے چیئرمین عمران خان نے ٹوئیٹر پیغام میں کہا ہے کہ ایک ماہ گزرنے کے بعد بھی سانحہ پشاور ذہنوں میں تازہ ہے، ان کاکہنا تھا کہ آرمی پبلک اسکول کے بچوں کی جرات اور ان کے والدین کے عزم پر انہیں سلام پیش کرتا ہوں، تمام دعائیں اور ہمدردیاں شہید بچوں کے والدین کے ساتھ ہیں۔

    اپنے پیٖغام میں انہوں نے کہا کہ دہشتگردی کے خلاف جنگ کو جاری رکھیں گے۔

    واضح رہے کہ دو روز قبل عمران خان نے آرمی پبلک اسکول کا دورہ کیا، اسکول پہنچنے پر شہید بچوں کے مشتعل والدین نے احتجاجی مظاہرہ کیا اور عمران خان کا گھیراؤ کرلیا تھا۔

    جب عمران خان بچوں کیلئے دعائے مغفرت کررہے تھے تو اسی اثناء میں ایک شہید بچے اسفند کی والدہ سیکورٹی حصار توڑتے ہوئے عمران خان کے قریب پہنچ گئیں اوران کا گریبان پکڑ کر کہا کہ ہمیں ہمارے بچوں کے خون کا حساب دیا جائے۔

    ان کا کہنا تھا کہ ’’تم یہاں ہمارے لئے نہیں بلکہ میڈیا، اخبارات اور اپنی نئی دلہن کو سیر کرانے کے لئے آئے ہو، ہمیں اس کی کوئی ضرورت نہیں ہم نے آپ کو ووٹ دے کرغلطی کی۔

    دوسری جانب آرمی پبلک اسکول کے اندر بچوں نے عمران خان کا پرتپاک استقبال کیا، بچوں نےعمران خان کے ساتھ تصویریں کھنچوائیں جبکہ بچوں نے عمران خان کی اہلیہ ریحام خان سے آٹو گراف بھی لئے۔

  • آج پشاور اسکول کا دورہ ملتوی کروایا گیا ہے،عمران خان

    آج پشاور اسکول کا دورہ ملتوی کروایا گیا ہے،عمران خان

    اسلام آباد: تحریکِ انصاف کے چیئرمین عمران خان نے کہا ہے کہ آج پشاور اسکول کا دورہ ملتوی کروایا گیا ہے۔

    سماجی رابطے کی ویب سائٹ ٹوئٹر پیغام میں عمران خان نے کہا کہ اہلیہ ریحام خان اور وزیرِاعلی خیبرپختونخوا کے ہمراہ آرمی پبلک اسکول کا دورہ آج ہی کرنا چاہتا تھا لیکن دورہ ملتوی کروا دیا گیا۔

    عمران خان نے کہا کہ پشاور اسکول کے بہادر بچوں کے ساتھ کھڑا رہوں گا، آرمی پبلک اسکول پشاور دہشت گردی کے واقعے کے بعد اٹھائیس روز بعد آج سے کھل گیا ہے۔

    اس سے قبل آرمی چیف جنرل راحیل شریف نے سانحۂ پشاور کے بعد پہلے دن آرمی پبلک اسکول پہنچنے والے غازیوں کا خود استقبال کیا اور ان کا حال احوال پوچھا اور پُرعزم طلبہ کے حوصلے دیکھ کر انھیں خوش آمدید کہا،  انہوں نے بچوں اور ان کے والدین کے عزم اور حوصلے کو سراہا اور ان کے جذبے کی تعریف کی۔

    آرمی چیف کا کہنا تھا کہ بچوں کے حوصلے بلند ہیں اور قوم ناقابلِ شکست ہے، اس موقع پر آرمی چیف جنرل راحیل شریف کی اہلیہ بھی ان کے ہمراہ تھیں ، انھوں نے بچوں کے والدین سے ملاقات کی۔

    یاد رہے کہ 16 دسمبر کو پشاور کے آرمی پبلک اسکول پر کالعدم تحریک طالبان (ٹی ٹی پی) کے حملے کے نتیجے میں 132 بچوں سمیت 144 افراد ہلاک ہوگئے تھے۔

  • شادی سے ناخوش عمران خان کی چاروں بہنوں کی تقریب میں عدم شرکت

    شادی سے ناخوش عمران خان کی چاروں بہنوں کی تقریب میں عدم شرکت

    اسلام آباد: عمران خان کی شادی سے ناخوش چاروں بہنیں شادی کی تقریب میں شریک نہ ہوئیں ۔

    شادی کے دوران عمران خان کی بہنیں روبینہ ، نورین عرف رانی ، علیمہ خان اور عظمیٰ لاہور میں اپر کینال والے گھر پر موجود رہیں اور عمران خان کی شادی پر مشاور ت کرتی رہیں، ایک طرف بنی گالہ میں شادمانی اور دوسری طرف لاہور گھر میں افسردگی نظر آئی ۔

     عمران خان کی ہمشیرہ علیمہ خان نے اے آروائی نیوز سے ٹیلی فونک گفتگو کرتے ہوئے کہا کہ وہ عمران کو شادی پر مبارکباد دیتی ہیں تاہم انہیں شادی کا علم تھا نہ ہی عمران خان کی طرف سے دعوت دی گئی ۔

     عمران خان کے خاندانی ذرائع کا کہنا ہے کہ بہنوں اور بھائی میں شادی کے معاملے پر شدید اختلافات ہیں اور عمران خان نے اپنی بہنوں کو منانے کیلئے ٹیلی فون بھی کیا مگر بات نہ بن سکی