Tag: PTI demands

کراچی : سندھ اسمبلی میں قائد حزب اختلاف فردوس شمیم نقوی نے پبلک اکاؤنٹس کمیٹی کی چیئرمین شپ دینے کا مطالبہ کردیا اور کہاخوف کا بت توڑیں گے، پھر وہی ہوگاجو ایم کیوایم لندن کے ساتھ ہوا، زرداری جیل نہ بھی گئےتو بانی ایم کیوایم کی طرح کہیں باہر بیٹھے ہوں گے۔

تفصیلات کے مطابق سندھ اسمبلی میں قائد حزب اختلاف فردوس شمیم نقوی نے میڈیا سے گفتگو کرتے ہوئے کہا سندھ کے عوام کواہم باتیں بتانا چاہتا ہوں، وزیراعلیٰ اور سعید غنی نےکہا کوئی بلڈنگ نہیں توڑی جائےگی اور کراچی کی ایسی حالت کرنے والوں کو پکڑنے کا کہاگیا مطالبہ کرتا ہوں ، شہر کی بربادی میں حصہ ڈالنے والوں کوگرفتار کیا جائے۔

پیپلزپارٹی والوں کاہر جگہ دوغلہ پن نہیں چلےگا

فردوس شمیم کا کہنا تھا کہ پی پی والے کہتے ہیں اسٹینڈنگ کمیٹی میں 4 سے زائد ممبرنہیں ہوں گے، فیصلہ کیاہے ایسی کسی اسٹینڈنگ کمیٹی کاحصہ نہیں بنیں گے، پیپلزپارٹی والوں کاہر جگہ دوغلہ پن نہیں چلےگا، پبلک اکاؤنٹس کمیٹی پی ٹی آئی کو دینا لازمی ہے۔

سندھ اسمبلی میں قائد حزب اختلاف نے کہا سندھ حکومت عوام اورجمہوریت دشمن ہے، یہ اپنی چوری چھپانے کیلئے چیئرمین شپ نہیں دینا چاہتے، کئی اسکول بند ہیں، کلاس رومز کی چھتیں گررہی ہیں، سجاول میں 4سال پہلے بننے والے اسکول کی چھتیں گررہی ہیں۔

ان کا کہنا تھا سندھ کے عوام میں خوف پر حکمرانی کررہے ہو، ایسا نہ ہو جو ایم کیوایم لندن کے ساتھ ہوا ویساہی ہو، زرداری جیل نہ بھی گئے تو بانی ایم کیوایم کی طرح کہیں باہر بیٹھے ہوں گے۔

پی اے سی کی صدارت نہ ملی توکمیٹیوں کاحصہ نہیں بنیں گے

فردوس شمیم نقوی نے پبلک اکاونٹس کمیٹی کی صدارت کا مطالبہ کرتے ہوئے کہا پی اے سی کی صدارت نہ ملی توکمیٹیوں کاحصہ نہیں بنیں گے، ہر قائمہ کمیٹی میں اپوزیشن کو برابری کی نمائندگی ملنی چاہیے۔

ان کا کہنا تھا کہ پیپلزپارٹی چاہتی ہے ہر قائمہ کمیٹی میں ان کے7ارکان ہوں ، ایسی کسی قائمہ کمیٹی کو تسلیم نہیں کریں گے ، چارٹرآف ڈیموکریسی چارٹرآف چوری بن گیا۔