اسلام آباد : پاکستان تحریک انصاف کے رہنما علی محمد خان نے کہا ہے کہ پرویزخٹک عزت کے دائرے میں رہ کر سیاست کریں۔
یہ بات انہوں نے اے آر وائی نیوز کے پروگرام اعتراض ہے میں خصوصی گفتگو کرتے ہوئے کہی، انہوں نے پرویز خٹک کے حوالے سے سوال پر کہا کہ کون پرویزخٹک؟ وہ شخص جس کو چیئرمین پی ٹی آئی نے وزیراعلیٰ اور پھر وزیر دفاع بنایا تھا؟
انہوں نے کہا کہ پرویزخٹک کو پی ٹی آئی کا حصہ بننے سے پہلے کوئی جانتا تک نہیں تھا،پرویز خٹک سیاست کریں لیکن عزت کے دائرے میں رہیں، وہ مثبت سیاست کریں گے تو ہم بھی ان کی تعریف کریں گے۔
شاہ محمود قریشی کی حالیہ گرفتاری سے متعلق ان کا کہنا تھا کہ شاہ محمود قریشی عدالتوں میں پیش ہورہے ہیں گرفتاری کی کیا ضرورت تھی،ان کی گرفتاری سے گھمبیر سیاسی صورتحال میں مزید اضافہ ہوگا۔
علی محمد خان نے انتخابات کے حوالے سے کہا کہ آئین میں بالکل واضح ہے کہ اسمبلی تحلیل ہو تو90دن میں الیکشن کرانا ہونگے،
سی سی آئی کی میٹنگ میں نگراں وزرائے اعلیٰ صوبے کی پالیسی پر کیسے ووٹ دے سکتے ہیں؟ آئینی طور پر ان کی شرکت کی اجازت ہی نہیں تھی، آئین سپریم ہے اور آئین کے مطابق ہی ملک کو چلایا جاتا ہے۔
پی ٹی آئی رہنما کا کہنا تھا کہ آئین کےمطابق90دن کے اندر صدر کی جانب سے الیکشن کی تاریخ دی جائے گی، نگراں حکومت کے ہاتھ مضبوط کرنےچاہئیں تاکہ وہ 90دن میں الیکشن کرائے۔
پی ٹی آئی کی مقبولیت پر ان کا کہنا تھا کہ شفاف اور غیرجانبدار الیکشن کرالیں پتہ چل جائے گا کون مقبول ہے، عوامی مقابلہ ہے جو جیتے گا وہی اقتدار حاصل کرے گا، الیکشن ضرور ہونے چاہئیں اسی میں پاکستان کا مستقبل ہے، سب چاہتے ہیں کہ وقت پر الیکشن ہوں اور سب اپنا اپنا کام کریں۔
ان کا مزید کہنا تھا کہ چیئرمین پی ٹی آئی پابندسلاسل ہیں لیکن ان کی ہدایت پر کورکمیٹی کام کررہی ہے،امید ہے چیئرمین پی ٹی آئی بہت جلد باہر آئیں گے اور پھر پارٹی کی قیادت کرینگے۔
