Tag: PTI MPA

کراچی: عمران خان کی ممکنہ گرفتاری کے خلاف ایم ٹی خان روڈ پر احتجاج کرنے پر پی ٹی آئی ایم پی اے شاہ نواز جدون کے خلاف دہشت گردی کا مقدمہ درج کر دیا گیا۔

تفصیلات کے مطابق پاکستان تحریک انصاف کے صوبائی رکن اسمبلی شاہ نواز جدون کے خلاف بھی چیئرمین پی ٹی آئی کی ممکنہ گرفتاری کے خلاف احتجاج پر مقدمہ درج کیا گیا ہے، کراچی میں درج ہونے والا پی ٹی آئی رہنماؤں کے خلاف یہ تیسرا مقدمہ ہے۔

مقدمہ ڈاکس تھانے میں ایس ایچ او کی مدعیت میں درج کیا گیا، جس میں کہا گیا ہے کہ شام 6 بجے تحریک انصاف کے کارکنان سڑک پر پہنچے، شاہ نواز جدون اور طارق جدون کے ہمراہ 90 کے قریب کارکنان تھے، ڈنڈوں اور پتھروں سے لیس افراد نے مین شاہراہ ایم ٹی خان روڈ بند کر دی۔

ایف آئی آر کے مطابق نیٹی جیٹی پل کی طرف آنے والا روڈ مکمل بند کر دیا گیا، ٹائروں کو آگ لگا کر عوام میں دہشت اور خوف و ہراس پھیلائی گئی۔

حلیم عادل شیخ کے خلاف کراچی میں پہلا مقدمہ درج سرکار کی مدعیت میں درج

ایف آئی آر میں ایس ایچ او کی جانب سے لکھا گیا کہ ’’ہم نے تحریک انصاف کی قیادت اور کارکنان کو آگاہ کیا کہ یہ خلاف قانون ہے، لیکن کارکنان مشتعل ہو کر نعرے بازی کرنے لگے اور موٹر سائیکل کو آگ لگا لگا دی، کار سرکار میں مداخلت اور مزاحمت کی گئی، اور پولیس اہل کار مجاہد کو گریبان سے پکڑ کر لے جانے کی کوشش کی گئی۔‘‘

کراچی میں‌ مسرور سیال پر کارکنوں کو ورغلا کر احتجاج کرنے پر مقدمہ درج

ایف آئی آر کے مطابق حکمت عملی سے ہجوم کو منتشر کرتے ہوئے 12 ملزمان کو پکڑا گیا، گرفتار ملزمان میں شاہ نواز جدون، رفیق، ایوب، خالد شاہ اور طارق خان، امین خان، مدثر، حارث، ارسلان اور کامران شامل ہیں۔

مقدمے میں لکھا گیا ہے کہ ملزمان کے قبضے سے پتھر برآمد کیے گئے، جب کہ ملزمان طارق جدون اور اسحاق بنگالی موقع سے فرار ہو گئے، موقع سے جلی ہوئی موٹر سائیکل اور ٹائر ملے، اور دیگر ثبوت اکھٹے کر لیے گئے۔