ARYNews.tv | Urdu – Har Lamha Bakhabar

Tag: PTI Spokesperson

  • ’دھاندلی کر کے پی ڈی ایم 2 کو دوبارہ مسلط کیا جا رہا ہے‘

    ’دھاندلی کر کے پی ڈی ایم 2 کو دوبارہ مسلط کیا جا رہا ہے‘

    پاکستان تحریک انصاف(پی ٹی آئی) ترجمان نے کہا ہے کہ دھاندلی کا لبادہ پہنا کر پی ڈی ایم ٹو کو دوبارہ مسلط کیا جارہا ہے۔

    تفصیلات کے مطابق پاکستان تحریک انصاف کے ترجمان نے ایک بیان کہا کہ چاروں صوبوں میں مینڈیٹ کی حامل پی ٹی آئی حکومت سازی کا حق رکھتی ہے، معاشی تباہی کا ذمہ دار پی ڈی ایم نامی نااہل، عوام سے مسترد لوگوں کا ٹولہ ہے۔

    ن لیگ نے پیپلز پارٹی کو بڑے عہدوں کی آفر کردی

    ترجمان پی ٹی آئی کا کہنا تھا کہ عوام نے ووٹ کے ذریعے نااہلوں کے ٹولے کو مسترد کیا، پی ڈی ایم نے 16 ماہ عوام کو معاشی و انتظامی تباہی اور بدترین مہنگائی کی دلدل میں پھینکا۔

    ترجمان پی ٹی آئی کا مزید کہنا تھا کہ آئین پامال کرنے پر چیف الیکشن کمشنر، الیکشن کمیشن اراکین مستعفی ہوں، عوامی مینڈیٹ کے برعکس کسی کو مسلط کرنے کے کسی منصوبے کو قبول نہیں کرینگے۔

  • صدرعلوی کے ٹویٹ پر پی ٹی آئی ترجمان کا بیان

    صدرعلوی کے ٹویٹ پر پی ٹی آئی ترجمان کا بیان

    اسلام آباد : پاکستان تحریک انصاف نے صدر مملکت عارف علوی کی جانب سے آفیشل سیکرٹ ایکٹ اور آرمی ایکٹ ترمیمی بل سے متعلق کیے گئے ٹوئٹ پر تشویش کا اظہار کر دیا۔

    پاکستان تحریک انصاف کے ترجمان نے جاری کردہ اپنے بیان میں کہا ہے کہ صدر مملکت کا ٹوئٹ ہر لحاظ سے غیر معمولی، تشویش ناک اور ناقابل تصور ہے،

    ترجمان کا کہنا ہے کہ صدر عارف علوی کے ٹوئٹ کے بعد قوم میں بے چینی اور اضطراب کی سنگین لہر نے جنم لیا ہے۔

    انہوں نے کہا کہ صدرمملکت کے ٹوئٹ نے ریاستی نظم میں اوپر سے نیچے تک پھیلے مہلک ترین انفیکشن کو بے نقاب کردیا۔

    پاکستان تحریک انصاف کے ترجمان نے بتایا کہ صدر کے ٹوئٹ کے مندرجات کا ہر زاویے اور ہر پہلو سے جائزہ لے رہے ہیں،اس کے مفصل جائزے کے بعد اپنا لائحہ عمل قوم کے سامنے رکھیں گے۔

    صدر مملکت نے اپنے ٹوئٹ میں کیا کہا؟

    عارف علوی نے اپنے ایک بیان میں دعویٰ کیا ہے کہ انہوں نے آفیشل سیکرٹ ایکٹ اور آرمی ایکٹ ترمیمی بل پر دستخط نہیں کیے بلکہ ان کے عملے نے ان کی مرضی اور حکم کو مجروح کیا ہے۔

    ’میں ان قوانین سے متفق نہیں تھا، عملے سے کہا تھا بغیر دستخط بلوں کو مقررہ وقت پر واپس کر دیں۔ میں نے اپنے عملے سے کئی بار پوچھا کہ بل واپس کر دیے ہیں لیکن عملے نے یقین دہانی کروائی کہ بل واپس کر دیے۔

    صدر مملکت نے کہا کہ اللہ سب جانتا ہے اور یقین ہے کہ وہ مجھے معاف کر دے گا، ان لوگوں سے معافی مانگتا ہوں جو اس سے متاثر ہوں گے۔

  • پاکستان تحریک انصاف کی میڈیا پروپیگنڈے کی شدید مذمت

    پاکستان تحریک انصاف کی میڈیا پروپیگنڈے کی شدید مذمت

    لاہور : پاکستان تحریک انصاف کے ترجمان نے کہا ہے کہ مضحکہ خیز خبروں یا افواہوں سے باشعور عوام کی آنکھوں میں دھول جھونکنا ممکن نہیں۔

    ترجمان نے اپنے جاری بیان میں میڈیا پر نفرت انگیز اور جھوٹے پروپیگنڈے کی مذمت کرتے ہوئے کہا کہ صحافت و اقدارکو مطلق جھوٹ کے سپرد کردینے کا کوئی جواز نہیں۔

    ان کا کہنا تھا کہ صحافت آئین و قانون کے دائرے میں سچ پیش کرنے کا نام ہے، آواز گُم کرنے کی کوششیں کامیاب ہوئیں نہ جعلی خبروں کے جمعہ بازارسے کوئی فائدہ ہوگا۔

    ترجمان تحریک انصاف نے کہا کہ افواہ ساز کارخانوں میں ڈھلنے والی خبریں زہر قاتل ہیں، صحافت حقائق کو لالچ، دباؤ یا جبر کی بھینٹ چڑھانے کی اجازت نہیں دیتی، وقت آگیا ہے صحافت کو جبر اور جھوٹ کی بیڑیوں سے آزاد کروانے کی تدبیر کریں۔

    انہوں نے کہا کہ مضحکہ خیز خبروں یا افواہوں سے پاکستان کے باشعور عوام کی آنکھوں میں دھول جھونکنا ممکن نہیں، ٹی وی چینلز انتظامیہ اور صحافتی فیصلہ ساز حلقے نفرت انگیز مہم جوئی کا حصہ نہ بنیں۔

    ان کا کہنا تھا کہ چینلزانتظامیہ، صحافی آزادی اظہار، پیشہ وارانہ صحافت میں اپنا بھرپور کردار ادا کریں، میڈیا پر مرضی کی خبریں چلانے کے بجائے اسے آزاد کیا جائے، قیدیوں کے قصیدوں سے دنیا میں آج تک کوئی قوم فتح ہوئی نہ آپ کر پائیں گے۔

  • عاصمہ رانی قتل کیس، پی ٹی آئی رہنما فواد چوہدری آئندہ سماعت پر طلب

    عاصمہ رانی قتل کیس، پی ٹی آئی رہنما فواد چوہدری آئندہ سماعت پر طلب

    اسلام آباد : سپریم کورٹ نے کوہاٹ میں میڈیکل کالج کی طالبہ عاصمہ رانی کے قتل کی ازخود نوٹس کیس کی سماعت میں پی ٹی آئی کے رہنما فواد چوہدری کو آئندہ سماعت پر طلب کرلیا۔

    تفصیلات کے مطابق سپریم کورٹ میں کوہاٹ کی عاصمہ رانی قتل ازخودنوٹس کیس کی سماعت چیف جسٹس کی سربراہی میں 3رکنی بینچ نے کی، سماعت کے دوران سپریم کورٹ نے فواد چوہدری کو طلب کر لیا۔

    فواد چوہدری کوکوہاٹ کی عاصمہ رانی قتل کیس میں طلب کیا گیا۔

    چیف جسٹس نے ریمارکس دیے کہ دوسروں پر تنقید کی جاتی ہے اپنی پولیس بہت اچھی ہے، انھیں طلب کرتےہیں معلوم ہوکہ کےپی پولیس کتنی مثالی ہے، فواد چوہدری کہتےہیں ہماری پولیس بہت مثالی ہے۔

    یاد رہے کہ گزشتہ ماہ 29 جنوری کو مجاہد آفریدی نے رشتے سے انکار پرمیڈیکل کی طالبہ عاصمہ رانی کو فائرنگ کرکے قتل کردیا تھا جس کے بعد ملزم سعودی عرب فرار ہوگیا تھا۔

    کے پی کے پولیس ملزم مجاہد اللہ آفریدی کی گرفتاری کیلئے سعودی حکومت اورانٹر پول سے رابطے میں ہیں جبکہ مرکزی ملزم مجاہدآفریدی کے دوست شاہ زیب کو گرفتارکرلیا گیا، ملزم شاہ زیب مقتولہ کی ریکی کرتا تھا اور قتل کے بعد مجاہد آفریدی کو فرار کرانے میں بھی شاہ زیب نے مدد فراہم کی۔

    شادی سے انکار پر میڈیکل کی طالبہ کو گولیاں مار کر قتل کردیا گیا

    بعدازاں 30 جنوری کو چیف جسٹس میاں ثاقب نثار نے کوہاٹ میں میڈیکل کی طالبہ عاصمہ رانی کے قتل کا ازخود نوٹس لیتے ہوئے آئی جی خیبرپختونخواہ صلاح الدین محسود سے 7 دن میں رپورٹ طلب کی تھی۔

    خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہچانے کےلیے سوشل میڈیا پرشیئر کریں۔

  • تحریک انصاف کا چیئرمین نیب سے مستعفی ہونے کا مطالبہ

    تحریک انصاف کا چیئرمین نیب سے مستعفی ہونے کا مطالبہ

    اسلام آباد: تحریک انصاف نے قومی احتساب بیورو(نیب) کی کارکردگی پر عدم اعتماد کا اظہار کرتے ہوئے چیئرمین نیب سے مستعفی ہونے کا مطالبہ کردیا۔

    اس حوالے سے تحریک انصاف کے ترجمان نعیم الحق نے کہا ہے کہ چیئرمین نیب قمر الزماں کی کارکردگی غیر تسلی بخش ہے، چیئرمین نیب لٹیروں کو نہیں پکڑ سکتے تو عہدے سے استعفیٰ دے دیں، اپنی کارکردگی سے متعلق ان کے دعوے مضحکہ خیز ہیں۔

    انہوں نے کہا کہ ملک میں یومیہ 12 ارب کرپشن کی نذر ہو رہے ہیں، چیئر مین نیب اپنی ناکامی تسلیم کریں اور رویے پر نظر ثانی کریں،چیئرمین نیب کسی ایک مجرم کا نام بتادیں جسے کٹہرے میں کھڑا کیا گیا ہو۔

    انہوں نے قمر الزماں کو مخاطب کیا کہ وہ بتائیں کہ پاناما لیکس پر آج تک انہوں نے کیا کیا؟نیب وقت گزرنے کے ساتھ اپنی ساکھ اور عوام کا اعتماد کھو رہا ہے،نیب کا کام چھوٹے چور کو پکڑ کرنا بڑے کو تحفظ فراہم کرنا ہے۔

    انہوں نے مزید کہا کہ چیئرمین نیب بدعنوانی کا تدارک چاہتے ہیں تو وزیر اعظم سے ابتدا کریں اور استعفی دے دیں۔