Tag: PTI

راولپنڈی: 9 مئی جی ایچ کیو حملہ کیس کی سماعت کل اڈیالہ جیل میں نہیں ہوگی، عدالتی عملے کی جانب سے بانی پی ٹی آئی عمران خان کے وکلا کو آگاہ کر دیا گیا۔

مقدمات کی سماعت انسداد دہشتگردی عدالت میں ہوگی، عدالت کی جانب سے جی ایچ کیو حملہ کیس کی نئی تاریخ دی جائے گی، 24 اور 26 نومبر کے مقدمات کی سماعت بھی اے ٹی سی راولپنڈی میں ہوگی۔

انسداد دہشتگردی عدالت کے جج امجد علی شاہ سماعت کریں گے۔

یہ بھی پڑھیں: جی ایچ کیو حملہ کیس میں بانی پی ٹی آئی کی بریت کی درخواست خارج

یکم فروری 2025 کو جی ایچ کیو حملہ کیس میں مزید دو گواہان کے بیانات قلمبند کیے گئے تھے جبکہ 31 مقدمات میں بشریٰ بی بی کی عبوری ضمانت میں توسیع کی گئی تھی۔

9 مئی جی ایچ کیو حملہ کیس اور بشریٰ بی بی کی ضمانت کی درخواستوں پر سماعت انسداد دہشتگردی عدالت کے جج امجد علی شاہ نے کی تھی۔

جی ایچ کیو حملہ کیس میں دو گواہان کانسٹیبل عمران اور ایس ڈی او اویس شاہ کے بیان قلمبند کیے گئے تھے۔ گواہ عمران نے کیس کی 15 تصاویر عدالت میں پیش کی تھیں جبکہ گواہ اویس شاہ کی جانب سے جی ایچ کیو کے گیٹ پر توڑ پھوڑ کی تخمینہ رپورٹ عدالت میں پیش کی گئی تھی۔

رپورٹ میں بتایا گیا تھا کہ گیٹ پر توڑ پھوڑ سے 7 لاکھ 80 ہزار روپے کا نقصان ہوا، پراسیکوشن کی جانب سے جی ایچ کیو حملہ کیس کے شواہد پر مشتمل 13 یو ایس بی عدالت میں جمع کروا دی گئی۔

جج امجد علی شاہ نے ہدایت کی تھی کہ جو وکلا صفائی یو ایس بی کاپیاں حاصل کرنا چاہیں وہ عدالت سے حاصل کر سکتے ہیں۔

عدالت نے ایف ائی اے پیمرا انٹرنل سکیورٹی اور پی ائی ڈی کی اضافی رپورٹس ملزمان کو فراہم نہ کیے جانے پر ایس ایس پی آپریشنز کو طلب کیا تھا تاہم وہ سماعت کے دوران عدالت میں پیش نہ ہو سکے تھے۔

ٹنڈو جام: سینئر وزیر سندھ شرجیل میمن کا کہنا ہے کہ بانی پی ٹی آئی عمران خان ملک میں فرعون کی طرح کام کر رہا تھا یہ سب کو یاد ہے۔

نیوز کانفرنس میں شرجیل میمن نے کہا کہ 9 مئی واقعات کے پیچھے ایک ہی شخص تھا وہ ہے عمران خان، پی ٹی آئی انتشار اور ملک کو نقصان پہنچانے کی کوشش کرتی ہے، سابق وزیر اعظم کی ہدایات پر ان کی پارٹی کے لوگ شرپسندی کرتے ہیں۔

یہ بھی پڑھیں: مجھے نہیں معلوم بانی پی ٹی آئی کی جان کو خطرہ ہے یا نہیں، شرجیل میمن

شرجیل میمن نے کہا کہ عمران خان غیر ملکی ایجنڈے پر عمل پیرا ہیں، وہ لندن میں زید گولڈ اسمتھ کی حمایت کر رہے ہیں، پی ٹی آئی نے پروپیگنڈے سے عالمی سطح پر پاکستان کو بدنام کیا، پی ٹی آئی فارن فنڈنگ کیس میں رنگے ہاتھوں پکڑی گئی تو کیس میں 6 سال تک اسٹے آرڈر لیا گیا، بانی پی ٹی آئی نے سائفر کا ڈرامہ رچایا۔

انہوں نے کہا کہ اسرائیل لابی کی جانب سے عمران خان کی حمایت سوالیہ نشان ہے، بانی پی ٹی آئی نے لندن میئر انتخاب میں پاکستانی کے مقابلے یہودی کو سپورٹ کیا۔

’بانی پی ٹی آئی کے کہنے پر ان کے دور میں رہنماؤں کی گرفتاریاں ہوئیں، ان کے کہنے پر سابق چیف جسٹس پاکستان ثاقب نثار نے آئین کی دھجیاں اڑائیں، عمران خان نے اپوزیشن رہنماؤں کو چن چن کر نشانہ بنایا جبکہ ثاقب نثار نے ان کا آلہ کار بن کر رہنماؤں کی کردار کشی کی۔‘

سینئر صوبائی وزیر کا کہنا تھا کہ ثاقب نثار نے ڈیم فنڈ کے نام پر عوام کو دھوکا دیا اور بے وقوف بنایا، انہوں نے تشدد کرنے والے ایک شخص کو ڈیم فنڈ میں پیسے دینے پر معاف کیا۔

اسلام آباد: وزیر اعظم کے مشیر برائے قانون بیرسٹر عقیل ملک کا کہنا ہے کہ پاکستان تحریک انصاف (پی ٹی آئی) کو اب آئین و قانون سے ہٹ کر ریلیف نہیں مل سکتا۔

پی ٹی آئی رہنماؤں کی پریس کانفرنس پر ردعمل دیتے ہوئے بیرسٹر عقیل ملک نے کہا کہ پی ٹی آئی ماورائے آئین و قانون ریلیف چاہتی ہے، عدالتیں آئین و قانون کے مطابق چلتی ہیں لیکن ان کو عدالتوں سے سہولت کاری چاہیے۔

یہ بھی پڑھیں: پی ٹی آئی رہنماؤں کی چیف جسٹس سے ملاقات

بیرسٹر عقیل ملک نے کہا کہ دفعہ 144 عوام کا تحفظ یقینی بنانے کیلیے نافذ کی جاتی ہے، پی ٹی آئی بغیر اجازت کے احتجاج کرتی ہے اور احتجاج کے نام پر انتشار پھیلاتی ہے۔

انہوں نے کہا کہ اپوزیشن جماعت نے ہمیشہ احتجاج کے دوران قانون ہاتھ میں لیا، جب آپ قانون توڑیں گے تو قانون حرکت میں آئے گا، کسی کو شہریوں کی زندگی اجیرن بنانے کی اجازت نہیں دے سکتے۔

ان کا کہنا تھا کہ 9 مئی اور 26 نومبر سمیت دیگر مقدمات سیاسی نہیں کیونکہ پی ٹی آئی سیاسی نہیں بلکہ انتشاری سوچ رکھتی ہے، پی ٹی آئی سیاست کی آڑ میں انتشار پھیلاتی ہے اور انہوں نے 9 مئی اور 26 نومبر کو انتشار پھیلایا۔

مشیر وزیر اعظم نے مزید کہا کہ پی ٹی آئی دور حکومت میں مسلم لیگ (ن) کی قیادت پر جھوٹے مقدمے بنائے گئے تھے لیکن ہم نے عدالتوں میں ان کا سامنا کیا اور سرخرو ہوئے۔

اسلام آباد: وفاقی وزیر اطلاعات و نشریات عطا اللہ تارڑ کا کہنا ہے کہ برطانیہ میں آرمی چیف جنرل عاصم منیر کا پرتپاک استقبال پاکستان تحریک انصاف (پی ٹی آئی) سے ہضم نہیں ہو رہا۔

عطا اللہ تارڑ نے اپنے ایک بیان میں کہا کہ اس ٹولے نے ملک میں نفرت پھیلائی اور شہدا کی توہین کی، پاکستان اس وقت ترقی کی نئی منازل طے کر رہا ہے لیکن پی ٹی آئی نے دشمنوں کے ایجنڈے پر چل کر ملک کو نقصان پہنچایا۔

یہ بھی پڑھیں: ‘آرمی چیف کے ہوتے ہوئے کوئی پاکستان کو میلی آنکھ سے نہیں دیکھ سکتا’

وفاقی وزیر نے کہا کہ بانی پی ٹی آئی عمران خان اپنی تقریروں میں دہشتگردوں کی مکمل حمایت کرتے ہیں، آج جو دہشتگردی کے واقعات ہو رہے ہیں اس کے ذمہ دار سابق وزیر اعظم ہیں کیونکہ انہوں نے دہشتگردوں کو حوصلہ دیا اور ان کو واپس لے کر آئے، عمران خان پاکستان کے دشمنوں کے ایجنڈے پر چلتے ہیں۔

انہوں نے کہا کہ دنیا بھر میں پاک فوج کی پیشہ ورانہ مہارت کی تعریف ہوتی ہے، آرمی چیف جنرل عاصم منیر کا برطانیہ میں پرتپاک استقبال اور انہیں گارڈ آف آنر پیش کیا گیا، سپہ سالار کو جس طرح برطانیہ میں عزت دی گئی اور پرتپاک استقبال کیا گیا یہ عمران خان اور پی ٹی آئی والوں سے ہضم نہیں ہو رہا۔

ان کا کہنا تھا کہ برطانیہ میں رویل ملٹری بینڈ نے پاکستان کا قومی ترانہ بجایا لیکن ملک کی دنیا میں عزت پی ٹی آئی والوں کو پریشان کرتی ہے، آئی ایم ایف کو خطوط لکھنا ملک دشمنی کے مترادف ہے۔

عطا اللہ تارڑ نے مزید کہا کہ اوورسیز محب وطن پاکستانیوں نے پی ٹی آئی کو مسترد کیا، جو ملک کو نقصان پہنچائے گے ان سے متعلق قوانین موجود ہیں، شرپسند عناصر کے خلاف قانون کے مطابق کارروائی ہوگی، منفی پروپیگنڈا کرنے والوں کے خلاف قانون بھرپور حرکت میں آئے گا۔

’پاکستان کے وقار میں اضافہ ہوا ہے تو پی ٹی آئی چاہتی ہے اس کو نقصان پہنچائیں، وزیر اعظم شہباز شریف کی کاوش سے معیشت میں بہتری ہو رہی ہے، آپ سڑتے رہیں جو مرضی کریں ملک اسی طرح ترقی کرتا رہے گا، آپ کے آئی ایم ایف کے خطوط اور 9 مئی بھی ناکام ہوا آگے بھی ناکام ہوں گے۔‘

مردان: سابق وزیر اعظم نواز شریف کے داماد کیپٹن (ریٹائرڈ) صفدر کا کہنا ہے کہ ان کی اہلیہ وزیر اعلیٰ پنجاب مریم نواز نے صوبے کو دلہن کی طرح سجا دیا۔

ورکرز کنونشن سے خطاب میں کیپٹن (ر) صفدر نے کہا کہ نواز شریف چاہتے ہیں کہ ہماری نسلیں ڈاکٹر قدیر بنیں صحت و تعلیم عام ہو، اگر ان کے منصوبے نکال دیں تو خیبر پختونخوا میں ترقیاتی کام نظر نہیں آتے۔

انہوں نے کہا کہ 40 سال میں نواز شریف جیسا ایماندار لیڈر نہیں دیکھا۔

یہ بھی پڑھیں: میں نے کیپٹن صفدر کو بالکل نہیں ڈانٹا، مریم نواز

خیبر پختونخوا حکومت اور پی ٹی آئی پر تنقید کرتے ہوئے انہوں نے کہا کہ صوبے کے عوام مزید محرومی چاہتے یا ترقی اور خوشحالی چاہتے ہیں؟ 11 سال کی حکمرانی نے خیبر پختونخوا کو تباہی کے دہانے پر پہنچا دیا۔

اپنے خطاب میں کیپٹن (ر) صفدر نے مزید کہا کہ جو بھارت نہ کر سکا وہ 9 مئی کو بانی پی ٹی آئی عمران خان نے کروا دیا۔

’مریم نواز وزیر اعلیٰ پنجاب ہونے کے ساتھ خیبر پختونخوا کی بہو بھی ہیں‘

14 جنوری 2025 کو کیپٹن (ر) صفدر نے مردان میں میڈیا سے گفتگو میں کہا تھا کہ مریم نواز صرف پنجاب کی وزیراعلیٰ نہیں بلکہ وہ صوبہ خیبر پختونخوا کی بہو بھی ہیں۔

(ن) لیگی رہنما نے کہا تھا کہ بانی پی ٹی آئی عمران خان کے خلاف عدم اعتماد نہ ہوتا تو ملک کا بیڑہ غرق ہو جاتا، غلیلیں لے کر وفاق پر چڑھائی کرنے والے قوم کی خدمت نہیں کر سکتے۔

اس سے قبل انہوں نے پی ٹی آئی اور علی امین گنڈاپور پر تنقید کرتے ہوئے کہا تھا کہ پنجاب ترقی کر رہا ہے جبکہ خیبر پختونخوا کی حالت بدترین ہو رہی ہے، کوئی پتا نہیں کہ صوبے میں پی ٹی آئی کی حکومت کب ختم ہو جائے۔

انہوں نے کہا تھا کہ 11 سال میں خیبر پختونخوا میں کوئی اسپتال یا یونیورسٹی نہیں بنی، اس صوبے کو شہباز شریف کی سوچ اور مریم نواز کی محنت درکار ہے۔