Tag: PTI

ڈی آئی خان: سربراہ جمعیت علمائے اسلام (ف) مولانا فضل الرحمان کا کہنا ہے کہ 26ویں آئینی ترمیم پاکستان تحریک انصاف (پی ٹی آئی) کی حمایت سے منظور ہوئی۔

میڈیا سے گفتگو میں مولانا فضل الرحمان نے کہا کہ انہوں نے میرے کہنے پر ووٹ نہیں دیا، اب اگر کوئی عدالت جانا چاہتا ہے تو کیا کر سکتے ہیں؟

مولانا فضل الرحمان کا کہنا تھا کہ حکومت اور پی ٹی آئی مذاکرات شروع کب ہوئے تھے؟ ہمارے پاس آنا چاہتے ہیں تو آ جائیں بات کریں گے۔

یہ بھی پڑھیں: ہمیں‌ اس لیے زیر عتاب لایا جاتا ہے ہم لوگوں‌ کو لڑاتے نہیں، مولانا فضل الرحمان

قبل ازیں، انہوں نے قبائلی عمائدین کے جرگے سے خطاب میں کہا کہ میں نے کہا تھا مجھے قبائلی علاقوں میں بھیج دیں حالات کنٹرول کر سکتا ہوں، قبائل کے لوگ ہماری بات سنتے ہیں لیکن اب چاہتے ہوئے بھی قبائلی علاقوں میں نہیں جا سکتے، علاقوں پر اب بین الاقوامی قوتوں کی نظر ہے۔

سربراہ جے یو آئی (ف) نے کہا کہ امریکا سمیت دیگرک ی نظریں بھی اس خطے پر مرکوز ہیں، یہ قوتیں پاکستان کے ان علاقوں تک حصول چاہتی ہیں، یہاں بنگلادیش والے حالات پیدا کرنے کی کوشش کی جا رہی ہے تاکہ یہ لوگ الگ ہوجائیں۔

انہوں نے کہا کہ امریکی سفیر نے کہا آپ پر لازم ہے آپ فاٹا کا لازمی انضمام کریں گے، پارلیمنٹ ہاؤس میں باجوہ آئے اور انہوں نے کہا میں مولانا سے بات کروں گا، باجوہ نے کہا مولانا صاحب آپ ان کی بات نہ کریں ہم پر غیر ملکی دباؤ ہے، ہمارے قوم پرست قبائلیوں نے آپریشن کی دعوت دی اور انتظام کیا۔

’غیر ملکی طاقتیں ہم سے ہمارے علاقے لینا چاہتی ہیں۔ طالبان ہیں یا جو بھی اسلحہ لے کر پھر رہے کس کے خلاف جہاد کر رہے۔ طالبان کو کس عالم نے فتویٰ دیا ہے کہ وہ جہاد کریں۔ کسی صورت جبر اور ظلم کے ساتھ نہیں نہ خود پر ہونے دیں گے۔‘

مولانا فضل الرحمان نے کہا کہ ہمیں تو مردم شماری کا حق بھی نہیں دیتے، ہماری سینیٹ کی 8 سیٹیں غائب کر دی گئی ہیں، ہماری قومی اسمبلی کی سیٹوں پر بھی ڈاکہ ڈالا گیا، یہ ہمارے خلاف ایک نئی سازش رچی جا رہی ہے، یہ پاکستان ہمارا ہےیہ فوج ہماری ہے قبائل بھی ہمارے ہیں۔

راولپنڈی: 9 مئی جی ایچ کیو حملہ کیس میں استغاثہ کے مزید 3 گواہوں کے بیانات ریکارڈ کر لیے گئے، مقدمے میں مجموعی طور پر 12 گواہوں کے بیانات ریکارڈ کیے جا چکے ہیں۔

انسداد دہشتگردی عدالت (اے ٹی سی) اڈیالہ جیل میں 9 مئی جی ایچ کیو حملہ کیس کی سماعت ہوئی۔ اس موقع پر بانی پی ٹی آئی عمران خان کو کمرہ عدالت میں پیش کیا گیا۔

عمران خان کی درخواست بریت پر وکیل صفائی فیصل ملک نے بحث مکمل کی جبکہ پراسیکیوشن آئندہ سماعت پر ملزم کی درخواست بریت پر بحث مکمل کرے گی۔

یہ بھی پڑھیں: جی ایچ کیو حملہ کیس، سابق ایم این اے بلال احمد پر فرد جرم عائد

وکلا صفائی کی جانب سے عمران خان کی فیملی کو ٹرائل میں بیٹھنے کی اجازت دینے کی درخواست منظور کی گئی تاہم بشریٰ بی بی کو جی ایچ کیو ٹرائل میں بیٹھنے کی اجازت دینے پر پراسیکیوشن نے اعتراض دائر کیا۔

پراسیکیوشن نے مؤقف اختیار کیا کہ وہ ایک مقدمے میں مجرم ہیں عدالت سے سزا ہو چکی ہے، قانون میں گنجائش نہیں کہ مجرم کو کسی ٹرائل میں بیٹھنے کی اجازت دی جائے۔

وکلا صفائی کی جانب سے 9 مئی سے متعلق 13 مقدمات کو یکجا کرنے کی درخواست دائر کی گئی۔

انہوں نے کہا کہ تمام مقدمات میں ایک ہی سازش کا ذکر ہے ایک ہی فرد جرم عائد کی جائے، 9 مئی سے متعلق تمام مقدمات یکجا کر کے ایک ٹرائل کیا جائے۔

اے ٹی سی جج امجد علی شاہ نے جی ایچ کیو حملہ کیس کی سماعت 29 جنوری تک ملتوی کر دی۔

اسلام آباد: سربراہ سنی اتحال کونسل صاحبزادہ حامد رضا کا کہنا ہے کہ پاکستان تحریک انصاف (پی ٹی آئی) گرینڈ اپوزیشن الائنس کی طرف جا رہی ہے، سابق وزیر اعظم شاہد خاقان عباسی کو بھی راضی کر لیں گے۔

اے آر وائی نیوز کے پروگرام ’اعتراض ہے‘ میں صاحبزادہ حامد رضا نے کہا کہ ہماری طرف سے بہت کچھ آ رہا ہے اب 26 نومبر نہیں ہوگا، عوامی احتجاج کریں گے اپوزیشن کا گرینڈ الائنس بنائیں گے۔

صاحبزادہ حامد رضا نے کہا کہ اسپیکر قومی اسمبلی ایاز صادق کو آگاہ کر دیا گیا ہے کہ حکومت کے ساتھ مذاکرات ختم ہوگئے ہیں، پی ٹی آئی کی جانب سے مذاکرات ختم کرنے کا اعلان کر دیا گیا ہے، پی ٹی آئی کی مذاکراتی کمیٹی تحلیل ہو چکی ہے اور اب بال حکومت کی کورٹ میں ہے۔

انہوں نے کہا کہ مذاکرات سے متعلق عمران خان نے فیصلہ کیا وہ دوبارہ فیصلہ کر سکتے ہیں، ہماری بھی تو دو سال تک کنپٹی پر بندوق رکھی گئی تھی ہم تو خاموش رہے، حکومتی کمیٹی کا اختیار دیکھ لیں کہ عمران خان سے ملاقات نہ کروا سکے، حکومتی کمیٹی نے کمٹمنٹ کی تھی پھر بھی بانی سے ملاقات نہیں کروا سکے، جب ایک کمیٹی ملاقات ہی نہیں کروا سکتی تو باقی اختیارات کہاں چلے گئے؟

ان کا کہنا تھا کہ طے ہوا تھا باہر کے معاملات کا مذاکرات کی صورتحال پر اثر نہیں پڑنا چاہیے، ہمارے خلاف پریس کانفرنسز اور عمران خان کو سزا ہوئی ہم خاموش رہے، مطالبات دینے کے بعد رانا ثنا اللہ، عرفان صدیقی کی پریس کانفرنس دیکھ لیں، پریس کانفرنس کا میں نے پریس کانفرنس کر کے جواب دیا تو تکلیف ہوگئی۔

سربراہ سنی اتحاد کونسل نے مزید کہا کہ جہاں تک سنجیدگی کی بات ہے تو کمیٹی ممبر کی گرفتاری کی کوشش کیوں کی گئی، عمران خان کو جب میرے گھر پر چھاپے کا بتایا گیا تو انہوں نے مذاکرات ختم کرنے کا کہا۔

’دراصل حکومتی کمیٹی کو عمران خان کی رہائی کا مطالبہ تحریری چاہیے تھا، یہ سمجھ رہے تھے ہم تحریری طور پر دیں گے کہ بانی پی ٹی آئی کو رہا کیا جائے، انہوں نے تحریری مطالبے کو لہرا کر بیانیہ بنانا تھا کہ عمران خان کی رہائی چاہتے ہیں، ہم نے تحریری طور پر ان کو وہ چیز نہیں دی جو یہ چاہتے تھے، ان کو بانی پی ٹی آئی کا این آر او والا جملہ نہیں ملا تکلیف ساری وہی ہے۔‘

صاحبزادہ حامد رضا نے کہا کہ ہم نے ڈھائی سال ظلم اور فسطائیت برداشت کر لی آگے بھی کر لیں گے، پارلیمنٹ میں ہمارا احتجاج چل رہا ہے، وزیر اعظم شہباز شریف دو مرتبہ اسمبلی میں آئے احتجاج کے طور پر تقریر نہیں کرنے دی۔

اسلام آباد: وفاقی وزیر منصوبہ بندی احسن اقبال کا کہنا ہے کہ بانی پاکستان تحریک انصاف (پی ٹی آئی) عمران خان کا 4 سالہ دور حکومت منصوبہ بندی کے بغیر گزرا۔

عالمی یوم تعلیم کی تقریب سے خطاب کرتے ہوئے احسن اقبال نے کہا کہ ملک میں خوشحالی لانے کا سب سے آسان راستہ تعلیم ہے لیکن پاکستان بدقسمتی سے تعلیمی میدان میں بہت پیچھے ہے، نواز شریف اور شہباز شریف ہر دور میں تعلیم پر فنڈز بڑھاتے ہیں، 2013 سے 2018 اعلیٰ تعلیم کیلیے فنڈز دگنے سے زیادہ کیے۔

یہ بھی پڑھیں: ہم نے جیلوں سے چیخیں نہیں ماریں، احسن اقبال

احسن اقبال نے کہا کہ دنیا میں کوئی ملک 90 فیصد خواندگی کے بغیر ترقی نہیں کر سکتا لہٰذا ترقی کیلیے پرائمری اسکول میں 100 فیصد داخلہ یقینی بنانا ہوگا، خواندگی کی شرح بڑھانے کیلیے وفاق اور صوبائی حکومتوں کو مل کر کام کرنا ہوگا، بچے اسکول جانا چاہتے ہیں انہیں مواقع دینا ہوں گے۔

انہوں نے کہا کہ اڑان پاکستان پروگرام کے تحت نیا جامع نصاب دیں گے اور ٹیچرز ٹریننگ کا ادارہ بنائیں گے، حکومت مسلسل تعلیمی اصلاحات متعارف کروا رہی ہے، تعلیمی میدان میں شفافیت لانا ہوگی اور طبقاتی تقسیم ختم کرنا ہوگی۔

ان کا کہنا تھا کہ بلوچستان بہت جلد پاکستان کا سب سے امیر صوبہ بننے والا ہے، معدنیات اور تعلیم کا فروغ بلوچ قوم کا مستقبل روشن کرے گی، بلوچستان کے چپے چپے کو تعلیم سے آراستہ کریں گے، پہلی دو سہ ماہی میں ترقیاتی بجٹ سست ہوتا ہے، پہلی دو سہ ماہی میں پراجیکٹ شروع ہونے کی وجہ سے وقت لگتا ہے۔

وفاقی وزیر کا مزید کہنا تھا کہ عمران خان کے دور میں ترقیاتی بجٹ 12 فیصد سے کم ہو کر 4 فیصد رہ گیا تھا، بانی پی ٹی آئی کے دور میں صوبائی منصوبے وفاق کے بجٹ میں ڈالے گئے۔

احسن اقبال کہتے ہیں کہ پاکستان ابھی آئی ایم ایف کے پروگرام میں ہے اور آئندہ 3 سال تک پروگرام میں رہیں گے، آئی ایم ایف پروگرام میں رہتے ہوئے معاشی ترقی کا ہدف حاصل کریں گے۔

اسلام آباد: پاکستان تحریک انصاف (پی ٹی آئی) نے چیئرمین پبلک اکاؤنٹس کمیٹی (پی اے سی) کیلیے ایک بار پھر نام تبدیل کر دیا۔

ذرائع نے اے آر وائی نیوز کو بتایا کہ پی ٹی آئی نے شیخ وقاص اکرم کا نام چیئرمین پی اے سی سے واپس لے کر جنید اکبر خان کو نامزد کر کیا ہے، حکومت نے شیخ وقاص اکرم کی جگہ کسی اور کو نامزد کرنے کا مطالبہ کیا تھا۔

یاد رہے کہ اپریل 2024 میں پی ٹی آئی پی اے سی کیلیے شیر افضل مروت کا نام فائنل کیا تھا جو اُس وقت پارٹی قیادت سے نالاں تھے۔

یہ بھی پڑھیں: حکمران جماعت کا چیئرمین پی اے سی کیلیے عبوری چیئرمین مقرر کرنے کا فیصلہ

چیئرمین پی ٹی آئی بیرسٹر گوہر نے بتایا تھا کہ بانی عمران خان سے اڈیالہ جیل میں ملاقات ہوئی، پی اے سی کی سربراہی کیلیے انہوں نے شیر افضل مروت کا نام فائنل کیا۔

بعدازاں مئی 2024 میں حکومت نے کمیٹی کی سربراہی سنی اتحاد کونسل کو دینے کا فیصلہ کیا تھا جبکہ سنی اتحاد کونسل نے شیخ وقاص اکرم کو چئیرمین پی اے سی کیلیے نامزد کیا تھا۔

2 جولائی 2024 کو وفاقی حکومت نے پہلی بار پبلک اکاؤنٹس کمیٹی کی سربراہی کیلیے اپوزیشن سے چار نام مانگے تھے۔

ذرائع نے اے آر وائی نیوز کو بتایا تھا کہ چیف وہپ طارق فضل کی جانب سے قوم اسمبلی میں قائد حزب اختلاف عمر ایوب کو خط لکھا گیا تھا جس میں ان سے عہدے کیلیے چار مانگے گئے تھے۔

ذرائع کے مطابق خط میں لکھا گیا تھا کہ چیئرمین پبلک اکاؤنٹس کمیٹی کیلیے سینئر اور تجربہ کار لوگوں کے نام دیے جائیں، باہمی رضا مندی سے ناموں میں چیئرمین کا انتخاب کیا جائے گا۔

ذرائع نے یہ بھی بتایا تھا کہ خط کی کا پی پی ٹی آئی چیف وہپ عامر ڈوگر کو ارسال کر دی گئی تھی۔