Tag: PTI

اسلام آباد: حکومت کی مذاکراتی کمیٹی کے رکن سینیٹر عرفان صدیقی نے پاکستان تحریک انصاف (پی ٹی آئی) کی قیادت کو مذاکرات کا عمل نہ چھوڑنے کا مشورہ دے دیا۔

عرفان صدیقی نے میڈیا سے گفتگو میں کہا کہ چیئرمین پی ٹی آئی بیرسٹر گوہر نے بیان دیا کہ آج مذاکرات کا سلسلہ ختم کر رہے ہیں، مذاکرات کا عمل ان کی پیشرفت سے شروع ہوا تھا، انہوں نے کمیٹی بنائی اور خود اس کی خواہش کا اظہار کیا تھا اور اب پی ٹی آئی نے انکار کیا ہے۔

انہوں نے کہا کہ 5 دسمبر 2024 سے 16 جنوری 2025 تک انہوں نے تحریری مطالبات میں 42 دن لگائے اور ہم سے مطالبہ کیا کہ آپ 7 دن میں جوڈیشل کمیشن بنا دیں، ہم نے پی ٹی آئی کے مطالبات کو سنجیدگی سے لیا لیکن جوڈیشل کمیشن سے متعلق کوئی فیصلہ نہیں کیا گیا۔

یہ بھی پڑھیں: عمران خان نے مذاکرات ختم کرنے کا اعلان کر دیا ہے، بیرسٹر گوہر

ان کا کہنا تھا کہ ہمیں چور ڈاکو کہنے والے ہم سے ہاتھ ملانے کیلیے راضی ہوئے تھے، ہمارے مطابق 28 جنوری کو 7 دن مکمل ہوں گے، ہم انہیں کہہ رہے ہیں ابھی مت جائیں کچھ دن ٹھہر جائیں، ہم اسپیکر قومی اسمبلی ایاز صادق کو اجلاس بلانے کیلیے 28 کی تاریخ دے چکے ہیں، یہ صرف پانچ دن مزید انتظار نہیں کر سکتے یہ بات سمجھ سے بالاتر ہے۔

’پی ٹی آئی والے اپنے بانی عمران خان سے ہٹ کر رائے بنا سکتے ہیں تو اب بھی سوچ لیں۔ ہماری اپیل ہے کہ پی ٹی آئی یہ عمل نہ چھوڑے۔ سیاست میں مذاکرات جمہوری عمل کا حصہ ہوتے ہیں۔ ہم نے بڑے صبر و تحمل سے مذاکرات کے عمل کو آگے بڑھایا۔ مذاکرات ختم کرنے کا اعلان افسوسناک ہے۔ عمران خان کی سول نافرمانی کی تحریک جاری ہے اور ٹوئٹ بھی آیا ہے۔ بانی پی ٹی آئی نے وزیر اعظم شہباز شریف کے خلاف سخت زبان استعمال کی لیکن یہ سب کچھ ہونے کے باوجود ہم نے سنجیدگی کا مظاہرہ کیا اور مذاکرات کیے۔‘

عرفان صدیقی کہتے ہیں کہ حکومتی کمیٹی اب بھی قائم ہے ہم مزید مشاورت کریں گے، پی ٹی آئی سے خواہش کا اظہار ہے کہ مذاکرات سے نہ نکلیں، مذاکرات کے دروازے سے دور جا کر پلٹ کر واپس آنا بہت مشکل ہے، ہم مذاکرات کو جمہوریت طریقے سے آگے بڑھانا چاہتے ہیں، پی ٹی آئی آج بیٹھ جاتی اور کہہ دیتی ہمیں مذاکرات پسند نہیں تو کمیشن بنانے میں حکومت کو کوئی مشکل نہیں ہے۔

انہوں نے کہا کہ 7 دنوں میں ہم فارغ نہیں بیٹھے رہے ہر روز مشاورت کر رہے ہیں، ہم قانون دانوں کو بھی بلا کر مشاورت کر رہے ہیں۔

اسلام آباد: رہنما پاکستان تحریک انصاف (پی ٹی آئی) بیرسٹر علی ظفر کا کہنا ہے کہ قوم کو یقین دلاتا ہوں اسلام آباد ہائیکورٹ القادر کیس ختم کر دے گی۔

بیرسٹر علی ظفر نے اپنے ایک بیان میں کہا کہ 190 ملین پاؤنڈ کیس ایک جھوٹا کیس ہے جو بانی پی ٹی آئی عمران خان کو پریشر میں لانے کیلیے بنایا گیا لیکن ہمارے پاس اتنے ثبوت ہیں کہ یہ کیس آگے نہیں چل پائے گا۔

انہوں نے کہا کہ القادر کیس کا بیک گراؤنڈ لندن میں حسن نواز کی پراپرٹی سے منسلک ہے، انہوں نے پراپرٹی تب خریدی جب نواز شریف وزیر اعظم تھے، نیب کو سوال پوچھنا چاہیے تھا یہ پراپرٹی کب اور کس کے پیسوں سے خریدی گئی۔

ان کا کہنا تھا کہ برطانوی ایجنسی این سی اے کا کام چوری کے پیسے کو ریکور کرنا ہے اس لیے انہوں نے اسے فریز کیا، 6 نومبر 2019 کو معاہدہ ہوا جس کے بعد این سی اے نے 22 نومبر کو پیسہ ڈی فریز کیا، چوری کا پیسہ ہوتا تو ڈی فریز نہیں کیا جا سکتا تھا، رقم سپریم کورٹ کے اکاؤنٹ میں ڈالی گئی جس کا کابینہ سے کوئی تعلق نہیں تھا۔

یہ بھی پڑھیں: القادر یونیورسٹی میرے پاس آگئی بچوں کو جادو، تعویز نہیں سکھایا جائے گا، مریم نواز

’نیب کہتا ہے 190 ملین پاؤنڈ چوری کا پیسہ ہے اور یہ حکومت کا حق ہے۔ الزام ہے عمران خان کابینہ نے فیصلہ کیا کہ یہ پیسہ سپریم کورٹ اکاؤنٹ میں جائے۔ چوری کا پیسہ ثابت کرنے کیلیے عدالت کا فیصلہ چاہیے۔ این سی اے نے فیصلہ کیا یہ چوری کا پیسہ نہیں اس لیے ڈی فریز کیا گیا۔ سپریم کورٹ ججمنٹ میں بھی لکھا ہے یہ چوری کا پیسہ نہیں۔‘

پی ٹی آئی رہنما نے مزید کہا کہ کابینہ فیصلے سے پہلے ہی سپریم کورٹ کے اکاؤنٹ میں پیسہ آگیا تھا، ڈونیشن سے کسی ٹرسٹی کا فائدہ نہیں ہوتا صرف چیریٹی کو ہوتا ہے، آپ کسی ٹرسٹ کے اونر کو ڈونیشن نہیں دیتے، آپ شوکت خانم کو پیسہ دیتے ہیں وہ ٹرسٹی تک جاہی نہیں سکتا، القادر یونیورسٹی نان پروفٹ ٹرسٹ ہے۔

بیرسٹر علی ظفر نے کہا کہ بانی پی ٹی آئی عمران خان کی اہلیہ کابینہ کا حصہ نہیں تھیں، بشریٰ بی بی کے خلاف سیاسی کیس بنایا گیا ہے۔

راولپنڈی: رہنما پاکستان تحریک انصاف (پی ٹی آئی) شبلی فراز کا کہنا ہے کہ بانی عمران خان نے کہا حکومت 9 مئی اور 26 نومبر پر جوڈیشل کمیشن نہیں بناتی تو مذاکرات کا فائدہ نہیں۔

اڈیالہ جیل کے باہر میڈیا سے گفتگو میں شبلی فراز نے کہا کہ جو واقعات ہوئے ہیں قوم کو سچ بتانے کیلیے کمیشن کا بننا ضروری ہے، کمیشن سے 9 مئی اور 26 نومبر کے واقعات کے حوالے سے عوام آگاہ ہو جائے گی۔

شبلی فراز نے کہا کہ آزاد ججز تحقیقات کریں جس نے کچھ کیا ہے اس کو سزا ضرور ملنی چاہیے، حکومت کے دل میں کوئی چور نہیں ہے تو ان کو کمیشن بنا لینا چاہیے، مذاکرات کے حوالے سے حکومت کو 31 تاریخ تک ڈیڈ لائن دی ہے۔

یہ بھی پڑھیں: حکومت پی ٹی آئی مذاکرات: اجلاس میں جوڈیشل کمیشن بنانے کی مخالفت

انہوں نے کہا کہ جن لوگوں نے کچھ کیا ہے ان کو سزا ملے اور جنہوں نے کچھ نہیں کیا ان کو علیحدہ کر دیا جائے، حکومت جب بھی دوبارہ کمیٹی کی میٹنگ رکھے اس سے 2 روز قبل ہماری میٹنگ ہونی چاہیے، اگلے سیشن سے پہلے ہماری بانی پی ٹی آئی عمران خان سے ملاقات ہونی چاہیے۔

عمران خان کی قانونی ٹیم کے رکن فیصل چوہدری نے اپنے بیان میں کہا کہ ہماری انسانی حقوق سے متعلق پٹیشن سپریم کورٹ میں زیر التوا ہے، ہم چاہتے ہیں انسانی حقوق سے متعلق آئینی بینچ پٹیشن فوری سنے، حکومت کو ڈر ہے کہیں آزاد جوڈیشری ہیومن رائٹ سے متعلق پٹیشن نہ سن لے۔

فیصل چوہدری نے کہا کہ پاکستان ٹارچر سے متعلق بین الاقوامی معاہدوں پر دستخط کر چکا ہے، سیاسی کارکنان پر تشدد، گھروں پر حملہ اور ہراساں کرنا معمول بن گیا ہے، کل صبح پٹیشن سے متعلق خط آئینی بینچ کو بھیج دیا جائے گا۔

انہوں نے کہا کہ 9 مئی اور 26 نومبر واقعات پر پردہ ڈالنے کی سوچی سمجھی سازش ہے۔

فیصل چوہدری نے واضح کیا کہ عمران خان کسی ڈھیل یا ڈیل کے نتیجے میں باہر نہیں آئیں گے، بانی پی ٹی آئی نے کہا کیس کا مقابلہ کر کے سرخرو ہو کر نکلوں گا۔

اسلام آباد: سینئر سیاستدان سینیٹر فیصل واوڈا نے دعویٰ کیا ہے کہ بانی پاکستان تحریک انصاف (پی ٹی آئی) عمران خان کو ابھی ڈیل آفر نہیں ہوئی، اگر ہوگی تو وہ قبول کر لیں گے۔

اے آر وائی نیوز کے پروگرام ’آف دی ریکارڈ‘ میں فیصل واوڈا نے کہا کہ مجھے بہت کچھ کہا جاتا ہے کبھی اسٹیبلشمنٹ کا بندہ تو کبھی اینٹی اسٹیبلشمنٹ لیکن جو بھی غلط کام کرے گا میں اس کے خلاف ہوں اور بات کرتا رہوں گا، مجھے تو اینٹی اسٹیٹ بھی بنایا گیا ہے پھر بھی سچ بولنا اور حق بات کرنا نہیں چھوڑا۔

فیصل واوڈا نے کہا کہ جمہوریت، عدلیہ اور اسٹیبلشمنٹ کا ہونا بہت ضروری ہے، 75 سال سے جو سیٹ اپ چل رہا ہے اب بھی وہی چل رہا ہے، نظام ہے کہاں؟ جمہوری نظام چلانے والے سیاسی لاش ہیں، ایسے کئی لوگ ہیں جنہوں نے قربانیاں دیں نوجوان ہیں آگے نہیں آنے دیا جاتا، کیا یہ ہی حال رہے گا کہ والد جائے گا تو بیٹی اقتدار سنبھالے گی۔

انہوں نے کہا کہ میں نے جو بھی الیکشن دیکھے ہیں سارے غیر شفاف تھے اور آئندہ بھی ہوں گے، عمران خان مقبول اس لیے ہیں کہ عوام مسلم لیگ (ن) اور پاکستان پیپلز پارٹی سے نفرت کرتے ہیں۔

ان کا کہنا تھا کہ جمہوریت اور اسٹیبلشمنٹ سے پہلے عدلیہ کو ٹھیک کرنا چاہیے، عدالتوں کے نظام سے شروع کریں عدلیہ کو سب سے پہلے ٹھیک کریں، عدالت نے 45 سال بعد اعتراف کیا کہ بھٹو کو غلط پھانسی دی گئی تھی، جمہوریت کے چیمپئن ہیں تو پھر اس نظام کے مزے لیں۔

’کہا تھا نواز شریف ریس میں تنہا بھی دوڑیں گے تو تیسرے نمبر پر آئیں گے۔ عدالتوں نے وقت ختم ہونے کے بعد بھی نواز شریف کیلیے فیصلے سنائے۔ قصور وار عدالتیں ہیں سب سے پہلے عدالتوں کو ٹھیک کرنے کی ضرورت ہے۔ عوام کو جمہوریت میں تعلیم، صحت اور پانی حتیٰ کے گٹر کے ڈھکن ملے؟ عام آدمی کی کھال اتر جائے گی لیکن شفاف جمہوریت نہیں ملے گی۔‘

فیصل واوڈا نے مزید کہا کہ میرا تو 5 سالہ مدت والی جمہوریت پر یقین ہی نہیں ہے، میں نے تو آج تک جمہوریت دیکھی ہی نہیں ہے۔

یہ بھی پڑھیں: ’حکومت اور پی ٹی آئی والے دونوں چاہتے ہیں عمران خان جیل میں رہیں‘

سینیٹر نے کہا کہ ڈیل کیلیے عمران خان دروازے سے باہر دیکھ رہا ہوں، آج آفر کریں گے تو بانی پی ٹی آئی ایک منٹ میں قبول کریں گے، ان کو ڈیل اب تک آفر نہیں ہوئی لیکن اگر ہوگی تو قبول کر لیں گے۔

انہوں نے کہا کہ پروپیگنڈا مہم میں کبھی پی ٹی آئی کو نہیں ہرایا جا سکتا، یہ چاہتی ہے عمران خان جیل میں ہی رہیں، فواد چوہدری کی طرح مجھے پی ٹی آئی میں نہیں جانا، مجھے پارٹی سے نکالا گیا تھا پی ٹی آئی یا عمران خان سے کچھ نہیں چاہیے۔

’پی ٹی آئی ہے کہاں؟ علی زیدی، عمران اسماعیل، اسد عمر، مراد سعید یہ پارٹی تھی۔ عمران خان ہی پارٹی ہے اور وہ آج بھی مقبول ہیں۔ تھرڈ ورلڈ ممالک میں جب بھی اسٹیبلشمنٹ سے ٹکرائیں گے آپ کا ہی سر پھٹے گا۔ مجھے پی ٹی آئی میں نہیں جانا لیکن عمران خان بلائیں گے تو ملاقات ضرور کروں گا لیکن نواز شریف بلائیں گے تو ان سے معذرت کر لوں گا۔‘