اسلام آباد: وزیر منصوبہ بندی احسن اقبال کا کہنا ہے کہ فیلڈ مارشل سپہ سالار جنرل عاصم منیر کو امریکا دورے کی دعوت ملی تو بھارت اور پی ٹی آئی کو آگ لگی ہے۔
احسن اقبال نے پریس کانفرنس میں کہا کہ پی ٹی آئی اہم امریکی دورے کے دوران مظاہرے کی کال دے رہی ہے، آپ کس حیثیت سے ہم پر تنقید کرتے ہیں؟ پہلے اپنے گریبان میں جھانکیں، آئی ایم ایف پروگرام بند اور مسلح افواج پر تنقید میں بھارت اور پی ٹی آئی شامل ہے۔
وزیر منصوبہ بندی نے کہا کہ پی ڈی ایم حکومت نے چارج سنبھالا تو تاریخی تباہی کا سامنا کرنا پڑا، وزیر اعظم شہباز شریف کی قیادت میں اس مشکل سفر کا آغاز کیا گیا، سیلاب جیسی تباہ کاریوں کا سامنا کیا ترقیاتی بجٹ کو آگے بڑھایا، پی ٹی آئی دور میں پوری سہ ماہی کیلیے ایک روپیہ جاری نہ ہو سکا، آج بھی ہم پی ٹی آئی کی بچھائی سرنگوں سے نکل رہے ہیں۔
یہ بھی پڑھیں: بانی پی ٹی آئی کی حیثیت ایک سزا یافتہ مجرم کی ہے: احسن اقبال
انہوں نے کہا کہ کیا پی ٹی آئی نے 4 سال میں کوئی ایک نیا منصوبہ بنایا؟ چور ڈاکوؤں کے الزامات لگانے کے سوا پی ٹی آئی نے کچھ نہیں کیا، ان کی ساکھ دیکھنی ہے تو 6 مئی تک ان سوشل میڈیا دیکھ لیں۔
ان کا کہنا تھا کہ حکومت سوچ سمجھ کر اسٹریٹجی سے آگے بڑھ رہی ہے، ہم تیزی سے آگے بڑھنا نہیں چاہتے ایسا نہ ہو ترقی اور وسائل میں لنک کمزور ہو جائے، ہمیں ترقی کیلیے فسیکل اسپیس، ٹیکس ریونیو اور ایکسپورٹ چاہیے، ٹیکس ریونیو بڑھانے کیلیے ایف بی آر میں ریفارم کا سلسلہ شروع کیا۔
احسن اقبال نے مزید کہا کہ ہمیں پی ٹی آئی کے سرٹیفکیٹ کی ضرورت نہیں ہے بلکہ عالمی ادارے پاکستان کی ترقی کی گواہی دے رہے ہیں۔
پریس کانفرنس میں ان کا کہنا تھا کہ بھارت نے پانی کو بطور ہتھیار استعمال کیا ہے وہ ہمارا پانی بند نہیں کر سکتا، بھارت جو کر سکتا ہے وہ پانی کے بہاؤ کو کم زیادہ کرنے کی شرارت ہو سکتی ہے، پاکستان نے فیصلہ کیا ہے کہ پانی کے ذخائر کو جلد مکمل کیا جائے گا۔
وزیر منصوبہ بندی نے بتایا کہ وزیر اعظم شہباز شریف نے نائب وزیر اعظم اسحاق ڈار کی سربراہی میں ٹاسک فورس تشکیل دی ہے جس میں چاروں وزرائے اعلیٰ بھی شامل ہیں، یہ ٹاسک فورس پانی کے ذخائر کی تکمیل اور ترجیحی کو دیکھے گی، حکومت دیامر بھاشا اور مہمند ڈیم کو ترجیحی بنیاد پر بنائے گی۔
