Tag: PUBLIC GATHERING

کراچی: متحدہ قومی موومنٹ کے سربراہ فاروق ستار نے کہا ہے کہ 18 مارچ کو جناح گراؤنڈ میں جلسہ کریں گے اگر ہمیں روکا گیا تو اس کا براہ راست فائدہ ایم کیو ایم لندن کو ہوگا۔

ان خیالات کا اظہار انہوں نے پریس کانفرنس کرتے ہوئے کیا، فاروق ستار کا کہنا تھا کہ جلد پی آئی بی اور بہادر آباد گروپ کا مسئلہ حل ہوجائے گا لیکن ہمیں جلسہ کرنے سے روکا گیا یا شہر کی عمارتوں کے نام تبدیل کیے گئے تو مقامی قیادت اس حوالے سے اٹھنے والے عوامی تحفظات کو دور نہیں کرسکے گی۔

انہوں نے کہا کہ بہادر آباد اور پی آئی بی کی لڑائی میں مہاجر قوم کا نقصان ہوا، ممکن ہے اس مسئلے میں میری بھی کوئی غلطی ہو لیکن میں یہ قوم کو بتانا چاہتا ہوں کہ 13 مارچ کے بعد تمام مسائل حل ہوجائیں گے اور مہاجر مزید نقصانات سے بچیں گے۔

ارکان اسمبلی نے ضمیر کا سودا کیا، جیت کا جشن منانا افسوسناک ہے، فاروق ستار

سربراہ ایم کیو ایم نے کہا کہ اب الیکن کمیشن کی جانب سے کوئی بھی فیصلہ آئے مگر میں نے پہلے ہی حکمت عملی مرتب کر لی جس کا جلد اعلان کروں گا اور اس کے بعد  پارٹی میں جاری تنازعات حل ہوجائیں گے۔

فاروق ستار کا کہنا تھا کہ ہمیں اب سیاسی آزادی دی جائے کیوں کہ ہم 23 اگست سے پاکستان کے ساتھ کھڑے ہیں اگر ہمیں سیاسی آزادی نہیں دی گئی اور جناح گراؤنڈ جانے سے روکا گیا تو اس کا براہ راست فائدہ ایم کیو ایم لندن کو ہوگا۔

ایک پارٹی کے چار چار سربراہ ہو، تو 2018 کا الیکشن بھول جائیں: فاروق ستار

ان کا مزید کہنا تھا کہ میں بہادر آباد گروپ کے دوستوں کو بھی بولتا ہوں کہ وہ جناح گراؤنڈ آئیں اور یوم تاسیس کے جلسے میں شرکت کریں، امید ہے لندن سے جڑے لوگ یوم تاسیس کی تقریب کو خراب نہیں کریں گے، جلسے سے ایک روز قبل 17 مارچ کو جناح گراؤنڈ میں پتنگ بازی اور ثقافتی میلہ لگایا جائے گا۔

خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔