تمام سبزیاں قدرت کا ایک انمول تحفہ ہیں اور ان کے ہر گروپ میں مختلف اجزا پائے جاتے ہیں جن کا متوازن استعمال جسمانی نشوونما کے لیے ضروری ہے، ان سبزیوں میں سے ایک ’’پیٹھا کدو‘‘ بھی ہے۔
پیلے رنگ کے پیٹھا کدو کا شمار سبزی میں کیا جاتا ہے اور اس کا تعلق لوکی اور ہرے کدو کی نسل سے ہے جو خصوصیات سے مالا مال ہے۔
یہ سبزی نہ صرف صحت کیلئے مفید ہے بلکہ چہرے کی خوبصورتی میں بھی اہم کردار ادا کرتی ہے، اس کا فیس ماسک بنا کر جلد کو خوبصورت اور تروتازہ بنایا جاسکتا ہے۔
پیٹھا کدو مدافعتی نظام کو مضبوط بنانے والے غذائی اجزاء سے بھرپور ہوتا ہے جس میں وٹامن اے، ای، سی اور اومیگا تھری فیٹی ایسڈ کے ساتھ ساتھ زنک اور آئرن، میگنشیم شامل ہوتا ہے۔
اس کے علاوہ اس سبزی کے بیج میں بھی قدرت نے جسم کو فائدہ پہنچانے والی خصوصیت رکھی ہے۔پیٹھا کدو کا فیس ماسک بنانا نہایت آسان ہے اور اس کیلئے صرف تین اجزاء کی ضرورت ہوتی ہے۔
سب سے پہلے حسب ضرورت کدو کو لے کر اس میں ایک چمچ شہد ڈال لیں اور ایک چٹکی دار چینی کا پاؤڈر شامل کریں، اسے اچھی طرح مکس کر کے پیسٹ بنا لیں اور 15 منٹ کیلئے جلد پر لگا رہنے دیں اور پھر آخر میں سادے پانی سے جلد صاف کرلیں۔
اس سبزی میں اینٹی آکسیڈینٹ بھاری مقدار موجود ہوتا ہے جو جلد سے جھریوں کو ختم کرنے کی صلاحیت رکھتا ہے جب کہ یہ جلد کو شاداب بنا کر اسے چمکدار بھی بناتا ہے۔
لوکی یعنی کدو ایسی سبزی کے لیے جس کی تعریف میں صرف یہ کہہ دینا کافی ہے کہ یہ آقائے دو جہاں نبی کریم صلی اللہ علیہ وآلہ وسلم کی پسندیدہ ترین سبزی ہے۔
مشکوۃ شریف کے مطابق حضرت انس بن مالکؓ فرماتے ہیں کہ وہ اور نبی کریمﷺ سالن تناول فرما رہے تھے تو انس بن مالکؓ نے دیکھا کہ نبی کریمﷺ سالن میں کدو(لوکی) ڈھونڈ کر تناول فرما رہے تھے۔
اسے عام طور پر کدو یا گِھیا کدو بھی کہا جاتا ہے، لوکی ایک ہلکی غذا ہے جو خود جلد ہضم ہوتی ہے اور اس دوران کسی قسم کی مشکل پیدا نہیں کرتی بلکہ دوسری غذاؤں کو بھی ہضم کرنے میں مددگار ثابت ہوتی ہے، یہ موسم گرما کی ایک اہم اور انتہائی مفید سبزی ہے۔
یوں تو قدرت نے تمام سبزیوں اور پھلوں میں انسانی جسم کی ضروریات اورعلاج کےلیے بیش بہا خزانے رکھے ہیں لیکن ان سب میں لوکی کو خاص اہمیت حاصل ہے۔
لوکی کو زیادہ تر گوشت یا دال میں ڈال کر پکایا جاتا ہے، اس کا ذائقہ بہت لذیذ ہوتا ہے۔
لوکی کا شمار وٹامنز اور توانائی بخشنے والی بہترین سبزیوں میں ہوتا ہے گوشت اور گرم مسالہ نہ صرف اس کے ذائقے میں بلکہ اس کی تاثیر میں بھی خاطر خواہ اضافہ کر دیتے ہیں۔
طب نبویﷺ میں بھی اس کا استعمال گوشت کے ساتھ کافی مفید بتایا گیا ہے جبکہ کئی ڈاکٹروں اور حکیموں نے اس بات کی بھی تصدیق کی ہے کہ یہ کئی امراض میں ایک موثر دوا کا کام بھی سر انجام دیتی ہے۔
وزن کم کرنے کے لیے لوکی کا شربت اہم ہے
وزن کم کرنے کے لیے لوکی کا شربت اہم کردار ادا کرتا ہے، اسے بغیر چینی کے بنایا جائے، شربت بنانے کا طریقہ یہ ہے کہ ایک عدد لوکی کا چھلکا اتار کر اسے بھاپ (اسٹیم ) دیں اوراس کے بعد چوپر مشین میں گلینڈ کر کے اس میں پودینہ، لیموں اور حسب ذائقہ نمک ڈال دیں اور دن مین دو مرتبہ پئیں۔
علاوہ ازیں وزن کی کمی کے لیے سفید زیرہ 100 گرام ، اجوائن 10 گرام لیں ان دونوں کو پیس کر ایک چھوٹا چائے کا چمچ کے برابر صبح شام استعمال کریں۔
سر درد اور دیگر بیماریوں میں لوکی کے فوائد
اگر آپ کے سر میں درد ہوتو تازہ لوکی کا گودا باریک کر کے سر پر لیپ کرنے سے درد چلا جاتا ہے، جن کا جگر کام نہ کرتا ہو وہ اس کو گلا کر پابندی کے ساتھ کھائیں توبہت جلد اس کے مثبت نتائج سامنے آئیں گے۔
ہلکی آنچ پر پکا ہوا لوکی کا سالن وٹامن اے اور بی سے بھرپور ہوتا ہے جبکہ اس میں فولادی اشیاء کیلشیم اور پوٹاشیم کی بھی بھاری مقدار موجود ہوتی ہے، لوکی کھانے سے معدے کی تیزابیت اور جلن وغیرہ بڑی حد تک دور ہوجاتی ہے۔
لوکی میں معدنی اورروغنی اجزاء بھی شامل ہوتے ہیں جو ہمارے جسم کے لحمی حجم اور توانائیوں میں خاطر خواہ اضافہ کردیتے ہیں تاہم جو لوگ اس نہایت مفید سبزی کو کھانے سے گریز کرتے ہیں یا تو پھر پسند نہیں کرتے انہیں ان تمام باتوں پر غور کرنا چاہیے اور اپنی صحت کی خاطر اس کو اپنی خوراک کا حصہ بنانا چاہیے۔
