لاہور : پنجاب اسمبلی کا اجلاس شروع ہونے کے تھوڑی دیر بعد ہی ملتوی کردیا گیا، اسپیکر نے پنجاب اسمبلی کا اجلاس جمعہ تک ملتوی کیا تاہم اراکین کی ہنگامہ آرائی کی وجہ سے صورتحال کشیدہ ہوگئی تھی۔
تفصیلات کے مطابق پنجاب اسمبلی کا اجلاس ساڑھے 4گھنٹے کی تاخیر سے شروع ہوا، اجلاس کی صدارت اسپیکر سبطین خان کررہے تھے۔
پنجاب اسمبلی کا اجلاس شروع ہوتے ہی ہنگامہ آرائی دیکھنے میں آئی، اپوزیشن اراکین نے اسمبلی اجلاس شروع ہوتے ہی کورم کی نشاندہی کردی۔
کورم پورا نہ ہونے پر اجلاس پہلے تو 5منٹ کیلئے ملتوی کردیا گیا، اس موقع پر پی ٹی آئی رکن راجہ بشارت نے کہا کہ اپوزیشن نے حاضری لگائی لیکن وہ ایوان کی کارروائی کا حصہ نہیں بننا چاہتی۔
بعد ازاں اسپیکر کی جانب سے 5منٹ کا دیا جانے والا وقت گزر جانے کے باوجود اسمبلی کورم پورا نہ ہو سکا، جس کے بعد اسپیکرپنجاب اسمبلی نے اجلاس مزید15منٹ کیلئے ملتوی کردیا۔
مقررہ وقت گزرنے کے باوجود بھی کورم پورا نہ ہوا پنجاب اسمبلی کا اجلاس صرف15منٹ جاری رہا اور اسپیکر نے اجلاس بغیر کسی کارروائی کے ملتوی کردیا۔
اس موقع پر اسپیکر پنجاب اسمبلی سبطین خان نے کہا کہ آج کا ایجنڈا جمعہ کی دوپہر تک ملتوی کیا جاتا ہے۔
مزید پڑھیں :پنجاب اسمبلی اجلاس آئندہ تین ہفتے تک ملتوی ہونے کا عندیہ
اجلاس سے قبل میڈیا سے گفتگو کرتے ہوئے اسپیکر پنجاب اسمبلی سبطین خان کا کہنا تھا کہ ہوسکتا ہے کہ آج ہونے والا اجلاس شاید دو سے تین ہفتے تک کیلئے ملتوی کردیا جائے۔
ایک سوال کے جواب میں سبطین خان نے کہا کہ وزیر داخلہ رانا ثناء اللہ جو مرضی کہیں ہم نے آئین اور قانون کے مطابق چلنا ہے۔ انہوں نے کہا کہ وزیر داخلہ اسمبلی سیل کرکے دکھائیں۔
