اسلام آباد: وزیر اطلاعات پرویز رشید کا کہنا دہشتگردی کرنے والا پاکستان اور بھارت کا مشترکہ دُشمن ہے۔
برطانوی نشریاتی ادارے کو انٹرویو میں اُن کا کہنا تھا دونوں ملکوں کے درمیان امن مذاکرات ڈی ریل کرنے کی کوششیں ناکام بنادیں گے ۔
انہوں نے کہاہم وہ نہیں ہونے دینے جا رہے جو دہشت گرد چاہتے ہیں، دہشت گردوں کی منشا کو پورا نہیں ہونے دیا جا رہا اور دونوں ممالک کی حکومتیں اپنے عزم پر قائم ہیں کہ وہ بات چیت کے ذریعے اپنے مسائل کو حل کریں گی۔
اسلام آباد: وفاقی وزیر اطلاعات پرویز رشید نے کہا ہے دھرنا دینے والے بلدیاتی انتخابات میں بنی گالا سے بھی ہارگئے۔
اپنے ایک بیان میں وفاقی وزیر اطلاعات کا کہنا ہے اسلام آباد کے بلدیاتی الیکشن میں عوام نے ن لیگ پر اعتماد کیا، کوشش ہوگی کہ اسلام آباد کا میئربھی عوام کی پسندیدہ شخصیت ہو۔
پاک بھارت تعلقات کے حوالے سے پرویز رشید کا کہنا ہے وزیراعظم نواز شریف اورنریندرمودی کی ملاقات کودنیابھر میں سراہا گیا، پاکستان نےہمیشہ ہمسایہ ملکوں کے ساتھ اچھے تعلقات کی بات کی ہے ۔
لاہور : وفاقی وزیر اطلاعات و نشریات سینٹر پرویز رشید نے کہا ہے کہ سیاسی بے روزگار اور کچھ قوتیں اداروں کے درمیان تناﺅپیدا کرکے عدم استحکام چاہتے ہیں، مسلح افواج کے سربراہ کی مدت ملازمت میں توسیع عوامی معاملہ نہیں اس پر گفتگو نہیں ہونی چاہئیے ۔
ان خیالات کا اظہار انہوں نے پنجاب اسمبلی پریس گیلری کے زیراہتمام میٹ دی پریس پروگرام سے خطاب کرتے ہوئےکیا، پرویز رشید نے کہا کہ پاکستان ماضی کے مقابلے میں ایک بہتر اور محفوظ ملک ہے مگر کچھ سیاسی بے روزگار اپنے کاروبار کیلئے اداروں کے درمیان ٹکراﺅکی خواہش رکھتے ہیں۔
سیاست اور جرم دو علیحدہ چیزیں ہیں کسی کو بھی جرم کے سامنے سیاسی ڈھال نہیں بننے دیا جائے گاکراچی آپریشن جاری رہے گا اور اس میں کسی قسم کی سیاسی مصلحت حائل نہیں ہونے دی جائے گی ملزمان قانون نافذ کرنے والے اداروں سے ڈرے ہوئے ہیں۔
وفاقی وزیر اطلاعات نے کہا کہ آئی ایس پی آر کی پریس ریلیز اور حکومتی موقف پرانا معاملہ ہوچکا ہے۔ مسلح افواج کے سربراہ کی مدت ملازمت میں توسیع پر بحث عوامی معاملہ نہیں اس سے قومی سلامتی اور آپریشن ضرب عضب کو نقصان پہنچے گا۔
وفاقی وزیر کا کہنا تھا کہ مسلح افواج کے سربراہ کا دورہ امریکہ وزیراعظم کے دوروں کا تسلسل ہے ، کراچی میں آخری دہشت گرد کے خاتمے تک آپریشن جاری رہے گا۔ پاک بھارت کرکٹ سریز متحدہ عرب امارت میں ہی ممکن ہے۔
لاہور : پیپلز پارٹی نے انتہاء پسند ہندو تنظیم شیو سینا کی پی سی بی کے وفد کی آمد پر بدتمیزی کے خلاف مذمتی قرارداد پنجاب اسمبلی میں جمع کروادی۔
مذمتی قرارداد پیپلز پارٹی کی ایم پی اے فائزہ ملک کی طرف سے جمع کروائی گئی۔ جس میں پاکستان کرکٹ بورڈ کے چیئرمین شہریار خان اور نجم سیٹھی کی ملاقات کے دوران شیوسینا کے غنڈوں کی طرف سے بدتمیزی کی مذمت کی گئی۔
قرارداد میں کہا گیا کہ بھارت پی سی بی حکام کو تحفظ فراہم کرنے میں ناکام رہا ہے۔ اقوام متحدہ سے شیوسینا پر پابندی عائد کرنے کا مطالبہ کرتے ہوئے قرارداد میں کہا گیا ہے کہ شیوسینا کی سرگرمیوں کی وجہ سے ہندوستان میں مسلمان اور دیگر اقلیتیں غیرمحفوظ ہیں ۔
اور خطے کا امن خطرے میں ہے۔ جمع کروائی گئی قرارداد کو پنجاب اسمبلی کے آئندہ کے اجلاس میں منظوری کے لئے پیش کیا جائے گا۔
لاہور : نکیال سیکٹر پر بھارتی فورسز کی بلااشتعال فائرنگ کے خلاف قرار داد پنجاب اسمبلی میں جمع کروا دی گئی ہے، بھارتی فورسز کی فائرنگ کے خلاف قرار داد مسلم لیگ ق کے رہنما عامر سلطان چیمہ کی جانب سے جمع کروائی گئی۔
قرار داد میں فائرنگ سے تین پاکستانی شہریوں کے شہادت پر تشویش کا اظہار کیا گیا۔ قرار داد میں کہا گیا کہ سرحدی بارڈر پر فائرنگ بھارت کا معمول بن چکا ہے۔
جس کے نتیجے میں پاکستان میں قیمتی انسانی جانوں کا ضیاع ہورہا ہے اس لئے یہ ایوان حکومت سے مطالبہ کرتا ہے کہ اس معاملے کو اقوام متحدہ میں اٹھایا جائے۔
قراداد میں کہا گیا کہ بھارت کے ساتھ تجارت اور امن کی خواہش ترک کرکے بھارت کے جارحانہ رویے کا اسی کی زبان میں جواب دیا جائے۔
لاہور : پنجاب اسمبلی نے ورکنگ باؤنڈری پر بھارتی جارحیت کیخلاف مذمتی قرارداد سمیت مفاد عامہ کی متعدد قراردادیں منظور کر لیں۔
حکومت بلدیاتی نظام میں ترمیم کا اہم ترین بل ایوان سے پاس نہ کرانے میں کامیاب نہیں ہو سکی۔ اسپیکر پنجاب اسمبلی رانا محمد اقبال کی صدارت میں ہونے والے اجلاس میں مسلم لیگ قاف کی رکن خدیجہ عمر کی جانب سے ورکنگ باؤنڈری پر بھارتی جارحیت کیخلاف قرارداد اتفاق رائے سے منطور کر لی گئی۔
قرارداد میں وفاقی حکومت سے مطالبہ کیا گیا کہ بھارتی دہشتگردی کو اقوام عالم کے سامنے اٹھایا جائے۔
تحریک انصاف کے رکن سردار سبطین خان کی گوشت کی قیمت سے متعلق قرارداد پر اس وقت ایوان میں دلچسپ بحث چھڑ گئی جب مسلم لیگ نون کے رکن نے برملا کہا کہ حکومت کے بس میں نہیں کہ وہ صاف ستھرے گوشت کی سرکاری نرخوں پر فروخت یقینی بنا سکے۔
عوام کو گدھے گھوڑے اور کتے کا گوشت کھلایا جا رہا ہے، اس کا صرف ایک ہی حل ہے کہ عوام گوشت کھانا ہی چھوڑ دیں۔
جماعت اسلامی کے رکن ڈاکٹر وسیم اختر نے کہا کہ مردار گوشت تو پکڑا جاتا ہے لیکن مکرہ دھندہ کرنے والے کیوں نہیں پکڑے جاتے۔
پنجاب اسمبلی کا اجلاس کارروائی مکمل ہونے پرغیرمعینہ مدت کیلئے ملتوی کر دیا گیا۔ حکومت بلدیاتی نظام میں ترمیم کا اہم ترین بل ایوان سے پاس نہ کرانے میں کامیاب نہیں ہو سکی۔
اسلام آباد: کابینہ کی اقتصادی رابطہ کمیٹی کے اجلاس میں گدھوں سے متعلق حیران کردینے والے انکشافات کئے گئے، جس کو مدِنظر رکھتے ہوئے اقتصادی رابطہ کمیٹی نے گدھوں کی کھالیں برآمد کرنے پرپابندی لگادی، کمیٹی کو بتایا گیا کہ گدھے کی کھالیں چہرے کی جھریوں کو دور کرنے والی کریم تیار کرنے اور استعمال ہونے والی دوسری بہت سی اشیاء بنانے میں استعمال کی جاتی ہیں۔
وزیرخزانہ اسحاق ڈار کی زیرِصدارت اقتصادی رابطہ کمیٹی کے اجلاس میں گدھے کی کھال برآمد کرنے پر پابندی عائد کردی ہے، اقتصادی رابطہ کمیٹی نے وزارت فوڈ سیکورٹی کو ہدایت کی ہےکہ وہ صوبوں میں گدھےکا گوشت تلف کرنے کا صیح طریقہ کاروضع کرےاوراس پرسختی سےعمل کرانےکیلئےاقدامات بھی کرے۔
کمیٹی کو بتایا گیا کہ پاکستان میں گدھوں کی تعداد 50 لاکھ سے زائد ہے، مالی سال 2013-14میں گدھے کی 59 ہزار 634 کھالیں برآمد کی گئیں، جن کی مالیت کم و بیش 4 کروڑ 40 لاکھ روپے تھی۔ مالی سال 2014-15 میں گدھے کی ایک لاکھ، 29 ہزار 898 کھالیں برآمد کی گئیں، جن کی مالیت 14 کروڑ 70 لاکھ روپے تھی۔
کمیٹی کو بتایا گیا کہ عالمی منڈی میں گدھے کی کھال بھینس کی کھال سے زیادہ مہنگی فروخت ہوتی ہے ۔ گدھے کی کھال اوسطاً 18 تا 20 ہزار میں فروخت ہوتی ہے
دوسری جانب کاسمیٹکس کریموں میں گدھے کی کھال کے استعمال پر پابندی کی قرارداد پنجاب اسمبلی میں جمع کرا دی گئی، قرارداد تحریک انصاف کی ایم پی اے ناہید نعیم نے جمع کرائی ۔ قرارداد کا متن کے مطابق صوبے بھر کی ایسی فیکٹریوں کو بند کیا جائے، جہاں کاسمیٹکس کریموں میں گدھے کی کھال استعمال کی جاتی ہے، پنجاب اسمبلی کا اجلاس پیر کی سہ پہر دو بجے تک ملتوی کردیا گیا ۔
لاہور: پنجاب اسمبلی سمیت اہم مقامات پردہشتگردی خطرات کے پیش نظروزارتِ داخلہ نے قانون نافذ کرنے والے اداروں کو لاہور میں چوکنا رہنے کی ہدایت کردی۔
حساس ادارے نے پنجاب حکومت کو لاہورمیں دہشتگردی کے خطرے سے آگاہ کردیا، حساس ادارے کے مطابق پانچ دہشت گرد پنجاب اسمبلی سمیت اہم سرکاری عمارتوں کونشانہ بناسکتے ہیں۔
لاہورپولیس نے سیکیورٹی انتظامات کو مزید سخت کرتے ہوئے لاہور کے داخلی راستوں پر بھی اضافی نفری تعینات کرکے سیکیورٹی ہائی الرٹ کردی ہے۔
ذرائع کا کہنا ہے کہ دہشت گردی کی اس ممکنہ کاروائی کی منصوبہ بندی جنوبی وزیرستان میں کی گئی ہے۔
وزارت داخلہ کا مراسلہ جاری ہونے کے بعد پولیس نے بادامی باغ، غالب مارکیٹ، چوہنگ، کینٹ، اقبال ٹاون، ریس کورس سمیت مختلف علاقوں میں سرچ آپریشن کے دوران 70 مشتبہ افراد گرفتارکرلئے۔
دوسری جانب ترجمان تحریک انصاف کے مطابق سکیورٹی خدشات کے باعث عمران خان کی قیادت میں نکالی جانے والی ریلی منسوخ کردی گئی ہے تاہم پی ٹی آئی کے سربراہ عمران خان سیکرٹریٹ میں کارکنان سے خطاب کریں گے۔
لاہور: تحریکِ انصاف نے وزیر داخلہ کرنل ریٹائرڈ شجاع خانزادہ پر خودکش حملے کیخلاف مذمتی قرارداد پنجاب اسمبلی میں جمع کرا دی۔
تحریک انصاف کی جانب سے مذمتی قرارداد پنجاب اسمبلی میں اپوزیشن لیڈر میاں محمودالرشید نے جمع کرائی، قرارداد میں خودکش حملے کی مذمت کرتے ہوئے وزیر داخلہ کرنل ریٹائرڈ شجاع خانزادہ کو خراج عقیدت پیش کیا گیا۔
قرارداد میں کہا گیا کہ شجاع خانزادہ کی شہادت پر پورا ایوان غمزدہ ہے اور شہید کی قربانی کو ہمیشہ یاد رکھا جائے گا، قرارداد میں آپریشن ضرب عضب کی بھرپور حمایت بھی کی گئی۔
لاہور : متحدہ قومی موومنٹ کے قائد الطاف حسین کی مسلح افواج کے خلاف ہرزاہ سرائی پر حکمران مسلم لیگ نون نے پنجاب اسمبلی میں بھی قرارداد پیش کرتے ہوئے وزارت داخلہ سے مطالبہ کردیا کہ الطاف حسین کو انٹرپول کے ذریعے پاکستان بلا کر اس پر غداری کا مقدمہ چلایا جائے۔
متحدہ قومی موومنٹ کے قائد الطاف حسین کی مسلح افواج اور سندھ رینجرز کے خلاف کی جانے والی ہرزاہ سرائی پر حکمران مسلم لیگ نون کی رکن صوبائی اسمبلی راحلیہ خادم حسین نے پنجاب اسمبلی میں مذمتی قرارداد جمع کروادی۔
قرارداد میں مطالبہ کیا گیا کہ الطاف حسین کی جانب سے متحدہ کے انیسویں کنونشن کے موقع پر کی جانے والی تقریر میں جہاں مسلح افواج کے افسران اور جوانوں کی ہرزہ سرائی کی گئی وہیں پاکستانیوں کی بھی شدید دل آزاری ہوئی ہے۔
خاتون محرک نے اس موقع پر حکومت سے مطالبہ کیا کہ الطاف حسین کو پاکستانی عدالتیں مفرور قرار دے چکی ہیں اسلئے حکومت کو انہیں انٹرپول کے ذریعے پاکستان بلا کر ان کے خلاف غداری کا مقدمہ درج کرنا چاہئیے۔