Tag: Punjab Assembly

لاہور: پنجاب اسمبلی کے اپوزیشن لیڈر محمودالرشید کا کہنا ہے کہ پی ٹی آئی کے تیس میں سے اٹھائیس اراکین نے استعفے جمع کرادئیے ہیں، لاہور میں پریس کانفرنس میں ان کا کہنا تھا کہ حکمرانوں کو بھی گھروں کو جانا ہوگا ۔

پاکستان تحریک انصاف کے آزادی مارچ کے پس منظر میں پنجاب اسمبلی سے اپوزیشن لیڈر محمود الرشید سمیت اٹھائیس اراکین نے سیکٹری اسمبلی کو استعفے جمع کرادئیے ،محمود الرشید کا کہنا تھا کہ 2 اراکین نگہت انتصار اور جہانزیب کھچی سے رابطہ نہیں ہو سکا ہے ۔

پریس کانفرنس کے دوران اپوزیشن لیڈر نے کہا کہ پی ٹی آئی اراکین کے مستعفی ہونے کے بعد کوئی یہ نہ سمجھے کہ سسٹم ایسے ہی چلتا رہے گا ،حکمرانوں کو بھی گھروں کو جانا ہوگا۔

اپوزیشن لیڈر کا کہنا تھا کہ صبر کے ساتھ پارٹی لیڈڑ  شپ نے مارچ اور دھرنے کا فیصلہ کیا کیونکہ حکومت نے قدم قدم پر مایوس کیا،  آج پنجاب پانچ سو ارب کا مقروض ہے ،ان کو حکمراں نہیں سمجھتے، جنھیں دھاندلی سے منتخب ہوئے ہیں۔

واضح رہے کہ پنجاب اسمبلی میں تحریک انصاف کے اراکین کی تعداد 30 ہے جب کہ استعفوں کی منظوری کا اختیار اسپیکر پنجاب اسمبلی رانا محمد اقبال  نے پاس ہے ، وہ استعفوں کو منظور یا مسترد کرنے کا فیصلہ کریں گے۔

اس سے قبل پاکستان تحریک انصاف نے آج پنجاب اسمبلی میں استعفے جمع کرانے کا اعلان کیا تھا، تحریک انصاف کی جانب سے پنجاب اسمبلی میں استعفوں کے بعد حکومت کیلئے پریشانی مزید بڑھ جائے گی، حکومت موجودہ سیاسی صورتحال سے نکلنے کے بجائے مزید دلدل میں دھنستی ہوئی دکھائی دے رہی ہے۔