فیصل آباد: پنجاب فوڈ اتھارٹی نے پینتالیس کوکنگ آئل اور گھی صحت کیلئے مضر قراردے دیے جبکہ فیصل آباد میں لیگی ایم پی اے کی فیکٹری کا کوکنگ آئل بھی غیر معیاری نکلا۔
تفصیلات کے مطابق فیصل آباد میں پنجاب فوڈ اتھارٹی نے کارروائی کرتے ہوئے پینتالیس کوکنگ آئل اور گھی مضر صحت قراردے دیے، ذرائع کے مطابق ایک سو اکیاون میں سے بیانوے مصنوعات معیاری قرار دی گئیں لیگی ایم پی اے نواز ملک کی فیکٹری کا کوکنگ آئل اور گھی بھی انسانی صحت کے لئے مضر قرار دیا گیا۔
فیل ہونے والے ہر ادارے کو دس لاکھ روپے جرمانہ اور مارکیٹ سے مال اٹھانے کی ہدایت کردی گئی ،ایک ماہ بعد دوبارہ نمونے لئے جائیں گے ، معیار بہتر نہ ہونے پر فیکٹری سیل کردی جائے گی، تجزیے میں فیل اور مضر صحت قرار پانے والی کوکنگ آئل پراڈکٹس میں کسان سن فلاور کوکنگ آئل ، ایوا سن فلاو ر کوکنگ آئل ، درجہ اول کوکنگ آئل، سحر کو کنگ آئل شامل ہیں ، جبکہ بناسپتی گھی میں سلویٰ، شاہ تاج ، گائے ، سحر، سویرا ، یادگار ، درجہ اول انسانی استعمال کے لیے مضر قرار دیئے گئے ہیں۔
امبر بناسپتی، پیوررائل پریمیر ، شہباز ، کیئر ، مجاہد بھی تجزیے میں فیل ہو گئے ۔ ایشیا، خیبر ، عسکری ، لطیف ، کوثر، حفیظ ، تازہ، دعا، مہر بناسپتی بھی انسانی استعمال کے لیے مضر صحت قرار دیئے گئے ہیں۔
چودہ پراڈکٹس کے نمونے کم غذائی اجزاء کی موجودگی پر غیر معیاری قرار دیئے گئے ہیں، ان میں شان کوکنگ آئل، اسلام آباد، مروہ، ایوین، ایشیاء پیور، ہانڈی، شاہ تاج پریمیم کوکنگ آئل ، داتا، پرائم ، غوثیہ، ممتا، آشیانہ اور مہر بناسپتی، سویا سپریم، انعام، رانی گولڈ، تازہ گولڈ، رحمت، مالٹا بناسپتی غیر معیاری قرار دیئے گئے ۔
