لاہور : راولپنڈی اور لاہور میں راستے بند ہونے کی وجہ سے ایک خاتون اور دو بچوں کی ہلاکت کی ذمہ داری حکومت پنجاب نے پی ٹی آئی اور عوامی تحریک پر ڈال دی۔
تفصیلات کے مطابق پنجاب حکومت نے کنٹینر رکھ کر شہر کے راستے بند کیے، والدین بیمار بچوں کو لیے پھرتے رہے۔ لیکن حکومت نے راستے کھولنے کے بجائے سیاسی بیانات دے دیئے۔
اس حوالے سے صوبائی وزیر قانون رانا ثناءاللہ نے کہا کہ ہلاکتوں کا مسئلہ تحریک انصاف کی ریلی کی وجہ سے ہوا، ریلی کے باعث ڈیڑھ کروڑ آبادی متاثر ہورہی ہے ٹریفک کےخلل سے معصوم بچہ جان سے گیا۔
رانا ثناءاللہ نے پریس کانفرنس کرتے ہوئے کہا کہ عمران خان دہشتگردوں کے ایجنڈے پر کام کررہے ہیں، معصوم بچہ دہشت گردی کی نذر ہوگیا ہے، ریلی کی وجہ سے جاں بحق ہونیوالے بچے کے گھر جائیں گے۔
وزیراعلیٰ پنجاب شہباز شریف نے بھی واقعے کا نوٹس تو لیا لیکن ذمہ داری نہ لی۔ ان کا کہنا ہے کہ سڑکوں پر بے مقصد احتجاج کرنے والے عوام دشمنی کا مظاہرہ کر رہے ہیں.انہوں نے پولیس کو ہدایت کی کہ ایمبولینسوں کا راستہ بنوایا جائے۔
دوسری جانب حکومت پنجاب کے ترجمان زعیم قادری نے کہا ہے کہ شہر کی سڑکیں احتجاجی جلسوں نے بند کیں۔ تحریک انصاف کے عہدیداروں نے انتظامیہ کے ساتھ بیٹھ کر روٹ طے کیا۔
انہوں نے وعدے کی پاسداری نہیں کی،بچے کے قتل کا مقدمہ علیم خان،ولید اقبال اور پی ٹی آئی کی دیگر قیادت کے خلاف درج ہوگا۔ انہوں نے کہا کہ پی ٹی آئی کی سیاست عوامی خدمت نہیں ذاتی اقتدار کے لیے ہے۔
