Tag: Punjab Institute of Cardiology

لاہور: پنجاب انسٹیٹیوٹ آف کارڈیالوجی میں تشدد کے واقعے کا مقدمہ درج کر لیا گیا۔

تفصیلات کے مطابق پنجاب انسٹیٹیوٹ آف کارڈیالوجی میں گزشتہ رات تشدد کے واقعے کا مقدمہ اسپتال کے ایم ایس کی درخواست پر دہشت گردی کی دفعات کے تحت درج کر لیا گیا، ایف آئی آر 6 نامزد اور 8 نامعلوم افراد کے خلاف درج کی گئی ہے۔

واقعے میں ملوث مریض کے لواحقین کا کہنا تھا کہ پی آئی سی کے گارڈ نے مریض کی رشتہ دار خاتون کو تھپڑ مار دیا تھا، جس پر خاتون کی فیملی اور گارڈز میں جھگڑا ہوا، اس کے بعد تشدد سے اسپتال کے 3 گارڈ ز اور ڈاکٹر زخمی ہو گئے۔

جھگڑے کے بعد رات 12 بجے ایمرجنسی سروس بند کر دی گئی تھی اور 2 گھنٹے تک ایمرجنسی بند رہی، ڈیوٹی پر موجود ڈی ایم ایس بھی غائب رہا، بعد ازاں ڈاکٹر احمد نعمان نے آ کر معاملے کو ختم کروایا۔

اسپتال انتظامیہ نے پولیس کو بیان دیا کہ رات گئے ایمرجنسی میں رش لگا ہوا تھا، تشدد کرنے والے افراد میں سے 2 افراد ایمرجنسی میں داخل ہوئے، وہ 10 سے 15 لوگ تھے اور تمام ایمرجنسی میں جانا چاہتے تھے۔

اسپتال انتظامیہ کے مطابق پہلے خواتین نے تلخ کلامی کی، خواتین نے زبردستی ایمرجنسی میں داخل ہونے کی کوشش کی تھی، ان کے ساتھ دیگر 10 سے 15 افراد نے گارڈز پر تشدد کیا۔