پنجاب میں فتنہ الخوارج اور کچے کے ڈاکوؤں کے خاتمے کیلیے ان کے خلاف آپریشن میں تیزی کے لیے پولیس کی تیاریاں زور وشور سے جاری ہیں۔
وزیراعلیٰ پنجاب مریم نواز کے محفوظ پنجاب ویژن کے تحت صوبے سے فتنہ الخوارج اور کچے کے ڈاکوؤں کے خلاف آپریشن میں تیزی لانے کے لیے پولیس کی تیاریاں زور وشور سے جاری اور 50 سے زائد جدید آلات کی خریداری حتمی مراحل میں داخل ہو گئی ہے۔
ترجمان پولیس نے بتایا کہ پنجاب میں فتنہ الخوارج اور کچے کے ڈاکوؤں کے خلاف آپریشن کو موثر بنانے کے لیے سی ٹی ڈی، بارڈر ایریا پولیس کے لیے 25 بلٹ پروف گاڑیوں کی خریداری شروع کر دی گئی ہے۔
اس کے علاوہ 26 جدید تھرمل سرویلنس سولیوشن اور تھرمل رائلز اسکوپ کے ساتھ جدید ٹیکنالوجی سے آراستہ 60 سے زائد ڈرونز بھی خریدے جا رہے ہیں۔
آئی جی پنجاب ڈاکٹر عثمان انور نے اس حوالے سے کہا کہ کچے کے علاقے میں ڈاکوؤں، شرپسند عناصر کو کیفر کردار تک پہنچا کر دم لیں گے۔ سرحدی چوکیوں کو جدید ٹیکنالوجی، تھرمل کیمروں سے اپ گریڈ کیا جا رہا ہے۔
ان کا کہنا تھا کہ بین الصوبائی پولیس چیک پوسٹوں پر ہمارے جانباز دہشتگردوں کے آگے سیسہ پلائی دیوار ہیں۔ بہادر جوان ڈی جی خان، میانوالی میں فتنہ الخوارج کا ڈٹ کر مقابلہ کر رہے ہیں اور ملک دشمن عناصر کو شکست دینے کیلیے ہمارا ہر سپاہی سر بکف ہے۔
