لاہور : پنجاب حکومت نے تعلیمی شعبے میں اہم قدم اٹھاتے ہوئے پانچویں اور آٹھویں جماعت کے امتحانات سرکاری طور پر لینے کی منظوری دے دی۔

تفصیلات کے مطابق وزیراعلیٰ پنجاب مریم نواز کی زیر صدارت صوبائی کابینہ کا 28 واں اجلاس منعقد ہوا، جس میں 130 نکات پر مشتمل وسیع ایجنڈے کی منظوری دی گئی۔

اجلاس میں عوامی فلاح، تعلیم، صحت، سیفٹی، سرمایہ کاری، فلڈ ریلیف اور گورننس سے متعلق اہم فیصلے کیے گئے۔

کابینہ نے پانچویں اور آٹھویں جماعت کے امتحانات سرکاری طور پر لینے کی منظوری بھی دی، پانچویں کلاس کے طلبہ کا جائزہ اورآٹھویں کلاس کے طلبہ کا باقاعدہ امتحان ہوگا تاکہ تعلیمی معیار کا درست اندازہ لگایا جا سکے۔

حکام کے مطابق، اس اقدام کا مقصد اسکولوں کی کارکردگی بہتر بنانا، طلبہ کی تعلیمی سطح کا تجزیہ کرنا اور تعلیم کے میدان میں شفافیت کو یقینی بنانا ہے۔

سرکاری و نجی جامعات میں خزانچی، رجسٹرار اور کنٹرولر امتحانات کی یکساں تعیناتی کا فیصلہ بھی کیا گیا۔

پنجاب ایکوپیشنل سیفٹی اینڈ ہیلتھ رولز 2024 اور پنجاب ریسٹرکشن آن ایمپلائمنٹ آف چلڈرن رولز 2024 کی منظوری دی گئی اور وزیراعلیٰ نے مزدوروں کی سیفٹی کے لیے لیبر ڈیپارٹمنٹ کو انفورسمنٹ فورس بنانے کی ہدایت کی۔

لاہور (05 اگست 2025): پنجاب بھر میں گزشتہ 24 گھنٹوں کے دوران 1403 ٹریفک حادثے پیش آئے ہیں، جن پر ریسکیو سروسز فراہم کی گئیں۔

تفصیلات کے مطابق پنجاب ریسکیو 1122 نے بتایا ہے کہ گزشتہ چوبیس گھنٹوں میں صوبے میں ایک ہزار چار سو تین ایکسیڈنٹس پر ریسکیو سروسز فراہم کی گئی ہیں۔

ترجمان نے بتایا کہ صوبے بھر میں ٹریفک حادثات کے نتیجے میں 7 افراد جاں بحق ہوئے، جب کہ ریسکیو نے 734 شدید زخمیوں کو فرسٹ ایڈ کے بعد فوری اسپتال منتقل کیا۔

ریسکیو ترجمان کا کہنا تھا کہ سب سے زیادہ حادثات لاہور میں 221، فیصل آباد 99، ملتان میں 90 رپورٹ ہوئے، جب کہ مجموعی طور پر 1668 شہری زخمی ہوئے جن میں 1315 مرد، اور 353 خواتین شامل ہیں۔

1403 حادثات میں 1382 حادثات موٹر سائیکلوں کی تھیں، 88 رکشوں، اور 144 کاروں کی تھیں، لاہور میں 24 گھنٹوں میں 221 حادثات میں ریسکیو سروسز فراہم کی گئیں، جب کہ گزشتہ 24 گھنٹوں میں لاہور میں حادثات سے 260 افراد زخمی ہوئے، اور 158 شدید زخمیوں کو فوری اسپتال منتقل کیا گیا۔

ریسکیو کے مطابق 102 معمولی زخمیوں کو موقع پر فرسٹ ایڈ دی گئی۔

جھنگ(3 اگست 2025): دو ملزمان نے فرسٹ ایئر کی طالبہ پر گھر میں گھس کر تیزاب پھینک دیا۔

تفصیلات کے مطابق جھنگ میں تھانہ مسن کی حدود میں تیزاب گردی کا لرزہ خیز واقعہ پیش آیا جہاں دو ملزموں نے فرسٹ ایئر کی طالبہ بشرا فاطمہ پر گھر میں گھس کر تیزاب پھینک دیا۔

ریسکیو حکام کا کہنا ہے کہ طالبہ کا چہرہ بری طرح جھلس گیا جس کے بعد فوری طور پر ڈسٹرکٹ اسپتال منتقل کیا گیا تاہم اب وہ برن وارڈ میں زیرِ علاج ہے، ڈاکٹروں کا کہنا ہے متاثرہ طالبہ کی حالت تشویشناک ہے۔

پولیس کا کہنا ہے کہ واقعہ کے بعد دونوں ملزمان فرار ہوگئے، تفتیش جاری ہے لیکن تاحال مقدمہ درج نہیں ہوسکا ہے۔

ذرائع کا کہنا ہے حملے کی وجہ ذاتی دشمنی یا ہراسانی ہوسکتی ہے، خواتین پر بڑھتے ہوئے حملوں پر عوامی حلقوں نے شدید ردعمل دیتے ہوئے سیکیورٹی کی صورتحال پر سوالات اٹھائے ہیں۔

شہریوں نے مطالبہ کیا ہے ملزمان کو فوری گرفتار کرکے کیفر کردار تک پہنچایا جائے تاکہ جھنگ میں خواتین کو تحفظ فراہم کیا جا سکے۔

دوسری جانب وزیراعلیٰ پنجاب مریم نواز نے جھنگ میں لڑکی پر تیزاب پھینکنے کے واقعے کا نوٹس لے لیا ہے، وزیر اعلیٰ مریم نواز نے آر پی او فیصل آباد سے فوری رپورٹ طلب کرلی ہے۔

وزیر اعلیٰ پنجاب مریم نواز نے واقعے میں ملوث ملزمان کی فوری گرفتاری کا حکم دیا ہے ساتھ ہی انہوں نے بشریٰ فاطمہ کے بہترین علاج کی ہدایت کی ہے۔

لاہور : پنجاب میں جانوروں کی آلائشوں سے بائیو گیس کی تیاری کا کامیاب تجربہ کیا گیا ، بائیو گیس پروڈکشن سے 60 سے 70لاکھ روپے کی آمدن متوقع ہے۔

تفصیلات کے مطابق پنجاب میں پہلی بارجانوروں کی آلائشوں سے بائیوگیس بنانے کا کامیاب تجربہ کیا گیا۔

وزیراعلیٰ مریم نوازشریف کے شاندار ستھرا پنجاب ویسٹ ٹو ویلیو پروجیکٹ کے تحت لکھوڈیر میں بائیوڈی گریڈ ایبل آلائشوں کو استعمال کرکے بائیو گیس پیدا کی گئی۔

ایک ہزارمیٹرک ٹن آلائشوں سے تقریباً 20 سے 25ہزار کلو بائیوگیس پیدا کرنا ممکن ہیں ، جانوروں کی آلائشوں سے بائیو گیس پروڈکشن سے 60 سے 70لاکھ روپے کی آمدن متوقع ہے۔

لاہور میں آلائشوں کے ذریعے بائیو گیس پیدا کرنے کا پائلٹ پروجیکٹ کامیابی سے ہمکنار ہے، 50 میگاواٹ ویسٹ انرجی پلانٹ سے روزانہ تین ہزار ٹن کچرا بجلی میں تبدیل ہوسکے گا۔

10سال میں لینڈفل سائٹ سے حاصل ہونے والی گیس سے 2.5ملین ڈالر آمدن کی توقع ہے۔

صوبے میں ری سائیکلنگ پارک کےماڈل کا بھی جائزہ لیا گیا، ماڈل ری سائیکلنگ پارک سے سالانہ 190 ملین روپے آمدن ، لکھوڈیر ڈسپوزل سائٹ کی بحالی سے سالانہ 2.75 لاکھ ٹن کاربن کریڈٹ اور4.2ملین ڈالر آمدن کی توقع ہے۔

اس کے علاوہ میونسپل سالڈ ویسٹ ٹریٹمنٹ کے ذریعے لینڈ فلز سے کچرے میں 60 فیصد کمی متوقع ہے۔

لاہور: پنجاب سے اتوار سے شروع ہونے والےمون سون کے چوتھے اسپیل صوبے بھر میں بہت زیادہ تباہی مچائی، جس میں 143 افراد جاں بحق اور چار سو اٹھاسی زخمی ہوچکے ہیں۔

تفصیلات کے مطابق پنجاب میں تباہی مچانے والے مون سون کے چوتھے اسپیل کا آج آخری دن ہے، اتوار سے شروع ہونے والے اس اسپیل نے پنجاب اور دیگر صوبوں میں بہت زیادہ تباہی مچائی-

گزشتہ روز بھی لاہور میں بادل جم کر برسے، نشیبی علاقوں میں پانی جمع ہونے سے مشکلات کا سامنا رہا جبکہ لکڑی سے بنے گھر کی چھت گرنے سے خاتون اور بچی زخمی ہوئے۔

اٹک پمپ کے قریب تین مزدوروں کو کرنٹ لگا، جنہیں فوری طور پر اسپتال منتقل کیا گیا جبکہ حافظ آباد کی سڑکیں تالاب کا منظر پیش کرتی رہیں۔

موسم سے متعلق خبریں

شیخوپورہ میں موسلادھار بارش کے بعد بازاروں میں پانی جمع ہوگیا جبکہ چنیوٹ میں کچہری کے باہر ٹرانسفارمر میں آگ لگ گئی ۔۔ مون سون اسپیل کی آج تک پیشگوئی کی گئی ہے۔

پی ڈی ایم اے نے لاہور، راولپنڈی، فیصل آباد سمیت پنجاب کے مختلف شہروں میں اربن فلڈنگ کا خدشہ ظاہر کیا ہے۔

حالیہ بارشوں کے دوران پنجاب میں ایک سو تینتالیس افراد جاں بحق، چار سو اٹھاسی زخمی ہوچکے ہیں، دو سو گھر تباہ اور ایک سو اکیس مویشی بھی ہلاک ہوئے۔