اسلام آباد: قومی اسمبلی کے رکن قادر مندوخیل نے اجلاس میں توجہ دلاؤ نوٹس پر سوال اٹھایا کہ دو گھنٹے کے دوران پی آئی اے کا ٹکٹ 19 سے 39 ہزار کیسے ہو گیا؟
تفصیلات کے مطابق قومی اسمبلی اجلاس میں پاکستان پیپلز پارٹی کے رکن قادر مندوخیل نے قومی ایئر لائن پی آئی اے کے کرایوں میں اضافے کے معاملے پر توجہ دلاؤ نوٹس پیش کیا۔
قادر مندوخیل نے کہا ’’چند روز قبل میں نے اسلام آباد تا کراچی ٹکٹ 19 ہزار میں خریدا، محض 2 گھنٹے بعد اسلام آباد تا کراچی ٹکٹ 39 ہزار کا خریدا۔‘‘ قادر مندوخیل نے کہا کہ وزارت ہوا بازی بتائے کہ 2 گھنٹے میں ٹکٹ 20 ہزار کیوں اور کیسے مہنگا ہوا؟
پارلیمانی سیکریٹری وزارت ہوا بازی کرن عمران ڈار نے ایوان میں جواب دیا کہ تمام ایئر کمپنیاں بزنس مینجمنٹ سسٹم کے تحت کام کرتی ہیں، ڈالر کی قیمت میں اتار چڑھاؤ ٹکٹ کی قیمت پر اثر انداز ہوتا ہے۔ پارلیمانی سیکریٹری نے یہ بھی کہا کہ پی آئی اے اور نجی ایئر لائنز کے کرایوں میں زیادہ فرق نہیں ہے۔
قومی اسمبلی اجلاس میں ایئرپورٹس کے حوالے سے خورشید احمد جونیجو نے بھی ایک معاملہ اٹھایا، انھوں نے کہا کہ ملک میں 49 ایئر پورٹس ہیں، لیکن ان میں سے 19 بند پڑے ہوئے ہیں، اور جو ایئر پورٹس فعال ہیں ان پر کرایہ اتنا رکھ دیا گیا ہے کہ لوگ سفر نہیں کر سکتے۔ خورشید احمد نے کہا سکھر کا کرایہ 52 ہزار روپے تک ہے، لوگ کیسے سفر کریں گے، جو ایئر پورٹس بند ہیں وہ فعال کیے جائیں تاکہ لوگوں کو سہولت مل سکے۔
پارلیمانی سیکریٹری کرن ڈار نے جواب دیا کہ متعلقہ ایئر پورٹس اور ایئر لائن حکام ہم سے رابطہ کریں تو این او سی دیا جا سکتا ہے۔
