لاہور: پیپلزپارٹی کے سینئر رہنما قمر زمان کائرہ نے تحریک انصاف کے سربراہ عمران خان کے فیصلے کی تعریف کرتے ہوئے کہا ہے انھیں پورا حق ہے کہ وہ ثبوت کی بنیاد پر بکنے والے اراکین پارٹی سے نکال دیں۔
قمر زمان کائرہ نے اے آر وائی کے پروگرام آف دی ریکارڈ میں گفتگو کرتے ہوئے کہا کہ پاکستان تحریک انصاف کو پنجاب ہی میں مینڈیٹ سے زیادہ ووٹ ملے ہیں، اس کی بھی وجہ ہوگی۔
پی ٹی آئی سے نکالے جانے والے ارکان کے بارے میں انھوں نے کہا کہ الزامات ثابت ہوئے تو ہم انھیں پی پی میں نہیں لیں گے، میرا نہیں خیال کہ کوئی بھی جماعت انھیں اپنے ساتھ شامل کرے گی۔
انھوں نے کہا کہ ملک کے اداروں کا غلط استعمال ہوتا رہا ہے، اداروں کے پیچھے عوام کھڑی ہوگی تو استحکام آئے گا۔ سیاسی جماعتیں اگر اداروں کے پیچھے کھڑی ہوجائیں تو اس سے استحکام نہیں آتا۔
واضح رہے کہ عمران خان نے سینٹ انتخابات میں ووٹ بیچنے والے بیس ارکان کو پارٹی سے نکالنے کا اعلان کردیا ہے، اس سلسلے میں انھوں نے نام بھی ظاہر کردیے ہیں۔
مسلم لیگ ن اپنے کرموں کا پھل پا رہی ہے،: قمر زمان کائرہ
پیپلز پارٹی کے رہنما نے پی ٹی آئی کے فیصلے پر تبصرہ کرتے ہوئے کہا کہ اگر ثبوت ہیں تو پارٹی کا یہ اچھا عمل ہے، ووٹ بیچنے والے ارکان کو سزا ملنی چاہیے۔
انھوں نے اے آر وائی پروگرام میں کہا کہ ووٹ دینے اور نوٹ دینے میں بہت فرق ہے، ثبوت نہیں ہوگا تو الیکشن کمیشن اور عدالتیں بھی کچھ نہیں کرپائیں گی۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
