گلگت: چلاس میں بچے کی پراسرار ہلاکت کا مقدمہ جنات کے خلاف درج کرلیا گیا، تفصیلات کے مطابق گلگت میں بچےکی پراسرارطور پر ہلاکت پولیس کیلئے معمہ بن گئی۔
پانچ سالہ احمد عید سے چار روز قبل اپنی والدہ کے ہمراہ نواحی علاقے کےچشمے سے پانی لانے گیا تھا جہاں سےوہ لاپتہ ہوگیا۔
بعدازاں یکم اکتوبر کوبچے کی تشددزدہ لاش جنگل سے برآمد ہوئی۔ والدین نے الزام عائد کیا ہے کہ ہمارے بچے کو جنات نے قتل کیا ہے،جس پر پولیس نے اپنے روزنامچہ میں جنات پر بچے کے قتل کاالزام لگادیا۔
بعدازاں پولیس نے بچے کی موت کی وجہ جاننے کیلئے قبر کشائی کی اجازت حاصل کرنے کیلئے عدالت سے رجوع کرلیا۔کورٹ کے حکم پربچےکی قبرکشائی کرکے پوسٹمارٹم بھی کرایاگیا۔
قبرکشائی کے بعد نعش کے سیمپل لیے گئے جن کو معائنے کیلئے لیبارٹری بھیج دیا گیا ہے۔پولیس کا کہنا ہے کہ لیب سے رپورٹ آنے کے بعد بچے کے حقیقی قاتلوں کا تعین کیا جاسکے گا۔
ڈی آئی جی دیامر کی سربراہی خصوصی ٹیم تشکیل دی گئی ہے جو بچے کی موت کے حوالے سے تحقیقات کرے گی، علاوہ ازیں عالم اور مفکرین کے مطابق بچے کو جنات نے ہی قتل کیا ہے۔
