کوئٹہ : نامعلوم افراد نے دن دیہاڑے فائرنگ کرکے باپ بیٹے سمیت 3 افراد کو قتل کردیا۔
پولیس کے مطابق سریاب روڈ پر ایریگیشن کالونی کے قریب نامعلوم افراد نے گوشت کی دکان پر فائرنگ کردی، فائرنگ کی زد میں آکر دکان میں موجود باپ بیٹے سمیت ایک اور شخص زخمی ہوگئے۔
جنہیں فوری طور پر سول ہسپتال منتقل کیا جارہا تھا کہ تینوں راستے میں ہی دم توڑ گئے، مزید کارروائی کے لئے لاشیں سول ہسپتال میں رکھی گئیں ہیں، جنہیں بعد میں ورثاء کے حوالے کیا جائے گا ، قتل کی وجہ تاحال معلوم نہ ہوسکی، پولیس مزید تفتیش کررہی ہے۔
جیکب آباد : سچ کے سفر میں بیباک عامل صحافی، اے آروائی نیوز اور بلوچستان یونین آف جرنلسٹ کے سیکریٹری جنرل ارشاد مستوئی کو گزشتہ شب جبر کے سفاک قاتلوں نے جاں بحق کر ڈالا، شہید ارشاد مستوئی کی نمازجنازہ جیکب آباد میں ادا کردی گئی ۔
لہو سے صحافت کے مقدس پیشے کی آبیاری کرنے والے معاشرے کی وہ مثال بن جاتے ہیں، جن سے جدوجہد اور آگہی کے چراغ جلانے کی ایک نئی امنگ اور جذبےبیدار ہوتے ہیں، انہی جذبوں کی صداقت کو اے آروائی نیوز کوئٹہ کے اسائمنٹ انچارج اور سینئیر صحافی ارشاد مستوئی نے ثابت کیا ۔ جنہوں نے ظالم کےسامنے سر نہیں جھکایا اور سچ کے سفر میں اپنی جان کو بھی عزیز نہ جانا ۔
ارشاد مستوئی کا جسد خاکی آبائی علاقے پہنچا تو ہر آنکھ اشکبار اور ہر شخص غمگین تھا ۔ ارشاد مستوئی کے بڑے بھائی کا کہنا تھا کہ چھوٹا بھائی شہادت کا جام پی کر مجھے پیچھے چھوڑ گیا، ارشاد مستوئی جام شہادت نوش کرکے دشتِ صحافت اور اےآروائی نیوز کی تاریخ میں ایک نئے باب کا اضافہ کرگئے۔
گزشتہ روز ظلم کو ظلم لکھنے والے ارشاد مستوئی کو نامعلوم سفاک قاتلوں نے فائرنگ کرکے قتل کردیا تھا، کوئٹہ کے علاقے جناح روڈ کے قریب نامعلوم مسلح افراد نے نیوز ایجنسی کے دفترمیں گھس کر فائرنگ کردی، جس کے نتیجے میں اے آروائی نیوز کے اسائنمنٹ ایڈیٹر ارشاد مستوئی شدید زخمی ہوگئے، انھیں قریبی اسپتال لے جایا گیا جہاں ڈاکٹروں نے ان کے جاں بحق ہونے کی تصدیق کردی۔
حملے میں ان کے علاوہ مزید دو افراد اور جاں بحق ہوئے تھے، دونوں افراد کا تعلق ایک نیوز ایجنسی سے ہے، ارشاد مستوئی بلوچستان یونین آف جرنلسٹ کے جنرل سیکریٹری تھے۔
کوئٹہ : دہشت گردوں کی فائرنگ سے دو پولیس اہلکار شہید ہوگئے۔
قانون کے رکھوالے دہشت گردوں کے نشانے پر ہیں، کوئٹہ میں ایک بار پھر پولیس اہلکار گولیوں کا نشانہ بنے، پولیس کے مطابق سریاب روڈ پر دو اہلکار معمول کا گشت کررہے تھے وہ جوں ہی سریاب مل کے قریب پہنچے تو نامعلوم افراد نے اُن پر فائر کھول دیا، جس کے نتیجے میں اہلکار شدید زخمی ہوگئے۔
دونوں کو اسپتال پہنچایا گیا جہاں وہ زخموں کی تاب نہ لا کر دم توڑ گئے، پولیس کے مطابق حملہ آور فائرنگ کے بعد اہلکاروں کا اسلحہ بھی لے گئے،جاں بحق ہونے والوں میں ایک ہیڈ کانسٹیبل بھی ہے۔
