پاکستان سپر لیگ7 کے پہلے مرحلے کا آخری میچ کراچی کے نیشنل اسٹیڈیم میں شروع ہوا تو اب تک کے نتائج کو دیکھتے ہوئے بہت کم شائقین کو کوئٹہ سے بہتر نتیجے کی توقع تھی۔
ابتدائی اننگز میں لاہورقلندرز نے204 رنز بنا کر کوئٹہ گلیڈی ایٹرز کو 205 رنز کا ہدف دیا تو جوابی اننگز میں کسی انہونی کی توقع اور کم ہوگئی۔
کوئٹہ گلیڈی ایٹرز کی اننگز شروع ہوئی تو پاور پلے کے دوران ہی گلیڈی ایٹرز کے اوپنرز کے عزائم سے واضح تھا کہ معاملہ کچھ اور ہونے جا رہا ہے۔
یہ بات اس وقت سچ ہوگئی جب جیسن روئے نے57 گیندوں پر8 چھکوں اور11چوکوں کی مدد سے116 رنز بنا ڈالے۔ عمدہ بیٹنگ پر جہاں جیسن روئے کا نام اور کوئٹہ ٹرینڈز پینل کا حصہ بنے وہیں ٹویپس نے اپنی گفتگو کے دوران دل کھول کر میمز کا استعمال کیا۔
پیر کو ہونے والے میچ سے قبل میدان میں اپنے غصے اور جھنجھلاہٹ کی وجہ سے خصوصی توجہ پانے والے گلیڈی ایٹرز کے کپتان سرفراز احمد کے جذبات کا ذکر ہوا تو بات بالی ووڈ فلموں تک جا پہنچی۔
ایک ٹویپ نے سرفراز احمد کی تصاویر پر کیپشن سجا کر شیئر کیے تو جیسن روئے سے متعلق ان کے خوشی بھرے جذبات کا اظہار کرنے کے لیے گانے کے بولوں کا سہارا لیا۔
سرفراز احمد کے جذبات سے متعلق میم نے دیگر صارفین سے تعریف سمیٹی تو ماہم گیلانی نے اسے برمحل بھی قرار دیا۔ اپنی یادگار اننگز کے ساتھ جیسن روئے پی ایس ایل میں پہلے ایسے بلے باز بنے ہیں جنہوں نے ہدف کے تعاقب میں بیٹنگ کے دوران سنچری اننگز کھیلی ہے۔
گلیڈی ایٹرز کے بلے باز کی اننگز کے جواب میں لاہور قلندرز کی کیفیت میمز کا موضوع بنی تو سوال ہوا "باس میں نے آپ کو بولا کیا ہے؟”
جیسن روئے نے 49 گیندوں پر سنچری مکمل کی تو یہ جہاں پاکستان سپر لیگ سیون کی تیز ترین سنچری اننگز بنی وہیں اب تک ہونے والے پی ایس ایل کے تمام سیزنز میں دوسری تیز ترین سنچری قرار پائی۔
“Roy kaash mein tumhe bataa sakta, mein tumhe kitna chahta hoon. I love you, I love you very very much Roy. Main aankhein band karta hoon toh tumhe dekhta hoon, aankhein kholta hoon toh tumhe dekhna chahta hoon. Tum paas nahin hotay toh tumhe charon taraf mehsoos karta hoon. 1/3 pic.twitter.com/iJmszoMKnH
— PSL Memes (@PSLMemesWalay) February 7, 2022
کوئٹہ گلیڈی ایٹرز نے لاہور قلندرز کے خلاف میچ سات وکٹوں سے جیتا تو یہ پی ایس ایل میں اب تک کا ہدف کا سب سے بڑا تعاقب رہا۔
پیر کو ہونے والے میچ کا ایک دلچسپ پہلو یہ بھی رہا کہ کوئٹہ گلیڈی ایٹرز نے پی ایس ایل میں تیسری مرتبہ 200رنز کا ہدف حاصل کیا اور تینوں مرتبہ مخالف ٹیم لاہورقلندرز تھی۔
