کوئٹہ میں ریلوے اسٹیشن کے پلیٹ فارم پر دھماکا ہوا ہے، دھماکے میں 26 افراد جاں بحق جب کہ 40 سے زائد افراد زخمی ہوگئے۔
تفصیلات کے مطابق بلوچستان کے دارالحکومت کوئٹہ کے ریلوے اسٹیشن میں دھماکے کے نتیجے میں 26 افراد جاں بحق اور 40 سے زائد زخمی ہوگئے، جاں بحق و زخمیوں میں خواتین اور بچے بھی شامل ہیں۔
ریسکیو حکام کے مطابق دھماکا جعفر ایکسپریس کے گزرنے کے وقت ریلوے اسٹیشن کے اندر پلیٹ فارم میں ہوا، زخمیوں کو اسپتال منتقل کیا جا رہا ہے، زخمی ہونیوالوں میں خواتین اور بچے بھی شامل ہیں۔
ریلوے حکام کا کہنا ہے کہ کوئٹہ سے آج 2 ٹرینیں روانہ ہونی تھیں، چمن پیسنجر نے چمن اور جعفر ایکسپریس نے پشاور روانہ ہونا تھا اور ان دونوں ٹرینوں کے مسافر پلیٹ فارم پر موجود تھے۔
سول اسپتال کوئٹہ کے ڈاکٹر نور اللہ کے مطابق اسپتال میں ایمرجنسی نافذ کر دی گئی ہے، طبی امداد کے لیے اضافی ڈاکٹرز اور عملہ طلب کر لیا گیا ہے۔
ایس ایس پی ریلوے پولیس کے مطابق بظاہر دھماکا خود کش لگتا ہے، تاہم مزید تحقیقات جاری ہیں۔
وزیرِ اعظم، قائم مقام صدر و دیگر کی مذمت
قائم مقام صدر یوسف رضا گیلانی نے کوئٹہ دھماکے کی مذمت کرتے ہوئے کہا نہتے عوام کو نشانہ بنانے والے انسانیت کے دشمن ہیں، دہشت گردی کے مکمل خاتمے کیلئے ہر ممکن اقدامات کے عزم کا اعادہ کرتے ہیں۔
وزیراعظم شہباز شریف نے دھماکے کی شدید الفاظ میں مذمت کرتے ہوئے زخمیوں کو ترجیحی بنیادوں پر طبی امداد فراہم کرنے کی ہدایت کی ہے، ساتھ ہی انہوں نے بلوچستان حکومت سے واقعے کی تحقیقاتی رپورٹ بھی طلب کرلی ہے۔
وزیراعظم شہباز شریف نے کہا کہ معصوم شہریوں کے جان و مال کو نقصان پہنچانے والے دہشتگردوں کو بہت سخت قیمت ادا کرنی پڑے گی، دہشتگردی کی عفریت کے خاتمے کے لیے حکومت اور سیکیورٹی فورسز مکمل طور پر سرگرم عمل ہیں۔
دوسری جانب وزیر اعلیٰ بلوچستان سرفراز بگٹی نے دھماکے کی شدید الفاظ میں مذمت کرتے ہوئے اعلیٰ حکام سے رابطہ کرتے ہوئے واقعےکی تحقیقات کا حکم دے دیا اور رپورٹ طلب کر لی۔
وزیر اعلیٰ بلوچستان کا کہنا ہے کہ دہشتگردی کے متعدد واقعات میں ملوث عناصر تک پہنچ چکے ہیں، صوبے میں دہشت گردوں کےخلاف کارروائیاں جاری ہیں، متعدد واقعات میں ملوث دہشت گرد پکڑے جا چکے ہیں، بلوچستان سے دہشتگردوں کا قلع قمع کریں گے۔
وفاقی وزیرداخلہ نے کہا دہشت گرد کسی رعایت کے مستحق نہیں، دشمن پاکستان میں عدم استحکام کے لیے بزدلانہ کارروائیاں کر رہا ہے، قوم گھناؤنی سازش ناکام بنائے گی۔
چیئرمین پیپلز پارٹی بلاول بھٹو کا کہنا تھا معصوم شہریوں کو نشانہ بنانے والے درندے کسی رعایت کے مستحق نہیں، دہشت گردوں اور سہولتکاروں کو جڑ سے اکھاڑ پھینکنے کے اقدام کی حمایت کرتے ہیں۔
