ہر سال ملک میں گیس لیکج کے باعث کئی انسانی جانیں ضائع ہوجاتی ہیں، گزشتہ سال پیش آنے والے ایک واقعے میں گھر کے پانچ افراد دم گھٹنے کی وجہ سے لقمہ اجل بن گئے تھے۔
اسی صورتحال کے پیش نظر کوئٹہ کے تین ہنرمند نوجوان طلباء نے ’گیس لیکیج ڈیٹیکٹر‘ ایجاد کیا ہے، جس کے استعمال سے اس طرح کے واقعات کے محفوظ رہا جاسکتا ہے۔
اے آر وائی نیوز کے پروگرام باخبر سویرا میں کوئٹہ یونیورسٹی کے طالب علم محمد زاہد خان نے خصوصی گفتگو کرتے ہوئے اپنی اس ایجاد کے بارے میں ناظرین کو تفصیل سے آگاہ کیا۔
محمد زاہد خان نے کہا کہ بلوچستان میں سردیوں میں گیس لیکج سے ہونے والے دلخراش واقعات کثرت سے سامنے آتے ہیں، نومبر سے مارچ کے دوران اس قسم کے واقعات میں اضافہ ہوجاتا ہے۔
انہوں نے بتایا کہ ہم نے اس ڈیوائس کو مختلف مقامات پر انسٹال کروایا ہے جہاں یہ کامیابی سے چل رہا ہے ہم چاہتے ہیں کہ یہ چیز مارکیٹ میں آئے اور ہر گھر تک پہنچ سکے۔
زاہد خان نے بتایا کہ ہماری ٹیم کی اس کاوش میں میرے ساتھ نجیب اللہ اور عبداللہ بھی شامل ہیں ہم تینوں بی ایس کمپیوٹر سائنس کے اسٹوڈنٹس ہیں۔
محمد زاہد خان کا کہنا تھا جیسے ہی اس ڈیٹیکٹر کے سینسرز کو گیس کی موجودگی کا احساس ہوتا ہے، یہ الارم بجانا شروع کردیتے ہیں جس سے بروقت گیس لیکج کا پتہ چل جاتا ہے اس کے علاوہ موبائل ایپ کے ذریعے بھی پیغام مل جاتا ہے۔
