Tag: Rabia Noor

لاہور: اےآر وائی نیوز سے تعلق رکھنے والی صحافی رابعہ نور، جمال خاشقجی ایوارڈ جیتنے میں کامیاب ہوگئی ہیں۔ وہ ایشیا سے یہ ایوارڈ حاصل کرنے والی واحد صحافی ہیں۔

تفصیلات کے مطابق عالمی سطح پر انسانی حقوق کے لیے کام کرنے والی فاؤنڈیشن ’اینٹی رائمی فنڈ‘ فنڈ کی جانب سے پہلی بار اس ایوار ڈ کا اجرا کیا گیا ہے، یہ ایوارڈ صحافت میں بہادری کا مظاہرہ کرنے والے صحافیوں کو دیے جارہے ہیں۔

اس ایوارڈ کے لیے جو معیار طے کیا گیا ہے اس کے تحت ایسے صحافی جو طاقت کے بے جا استعمال، کرپشن، مشکل سچ اور معاشرے میں ممنوعہ قراردیے گئے موضوعات پر کام کرتے ہیں ، وہ اس ایوارڈ کے حق دار قرارپائے ہیں۔

رابعہ نور کو معاشرے میں ممنوعہ سمجھے جانے والے موضوعات کی رپورٹنگ کرنے پر اس ایوارڈ کا حقدار قراردیا گیا ہے۔ وہ خواتین کو با اختیار بنانے، انسانی حقوق اور بچوں میں جنس کی تبدیلی جیسےموضوعات پر کام کرتی رہی ہیں۔

رابعہ نور کا کہنا ہے کہ معاشرے میں ممنوعہ سمجھے جانے والے موضوعات پر کام کرنے کے سبب انہیں مسائل کا سامنا بھی رہا ہے، لوگوں کی جانب سے تنقید بھی کی گئی، لیکن انہوں نے اپنا سفر جاری رکھا۔ انہوں نے اس ایوارڈ کو اپنی والدہ کے نام انتساب کیا ہے۔

رابعہ نور کی چند اسٹوریز

اس موقع پرلاہورپریس کلب اورپروڈیوسرز کی ایسوسی ایشن ایمپرا نے بھی اپنی سینیئر رکن کو مبارک باد دی ہےاور کہا ہے کہ رابعہ نور نے یہ مقام بلاشبہ اپنی محنت سے حاصل کیاہے اور کوئی شبہ نہیں کہ وہ اس ایوارڈ کی صحیح حق دار ہیں۔

جمال خاشقجی ایوارڈ کا اعلان دسمبر 2018 میں کیا گیا تھا۔ تاحال آرگنائزرز کی جانب سے ایوارڈ کے مقام کا اعلا ن نہیں کیا گیا ہے۔

رابعہ نور اس سے پہلے بھی متعدد ایوارڈ حاصل کرچکی ہیں جن میں ویمن امپاورمنٹ کے لیے سال کی بہترین رپورٹرکا ایوارڈ بھی شامل ہے۔