پورٹ لینڈ : امریکی شہر پورٹ لینڈ میں نسلی امتیاز کیخلاف احتجاج پرتشدد شکل اختیار کرگیا، مظاہرین نے پولیس ایسوسی ایشن کی عمارت کو آگ لگا دی، انتطامیہ نے فوجی دستے تعینات کردیئے۔
تفصیلات کے مطابق پولیس کے ہاتھوں سیاہ فام شہری کی ہلاکت پر پورٹ لینڈ میں مظاہروں نے فسادات کی شکل اختیار کرلی، نسلی امتیاز کیخلاف احتجاج پرتشدد شکل اختیار کرگیا۔
ٹرمپ انتظامیہ نے فوجی دستے پورٹ لینڈ بھیج دیے، مشتعل مظاہرین نے پولیس ایسوسی ایشن کی عمارت کو نذرآتش کردیا، صورتحال کو بگڑتا دیکھ کر ٹرمپ انتظامیہ نے فوجی دستے پورٹ لینڈ بھیج دیے، فوجی اہلکاروں نے مظاہرین پر آنسو گیس کی شیلنگ اور پتھراؤ کیا متعدد مظاہرین کو گرفتار کرکے جیل منتقل کردیا گیا۔
اسپیکر نینسی پلوسی نے مظاہرین پر آنسو گیس کی شیلنگ اور گرفتاریوں پر تنقید کرتے ہوئے اس کی سخت الفاظ میں مذمت کی ہے، ان کا کہنا ہے کہ شہریوں کو ڈونلڈ ٹرمپ کے سیاسی کھیل کاحصہ نہیں بننے دیں گے۔
اس حوالے سے امریکی صدر ڈونلڈ ٹرمپ کا کہنا ہے کہ وفاق صورت حال کو کنٹرول اور سرکاری املاک کی حفاظت کرنا چاہتا ہے، فسادات اورلوٹ مار کو کنٹرول کرنے کیلئے مزید فوجی دستے بھیجیں گے، ڈیموکریٹ گورنرز اورمیئرز حالات پر قابو پانے میں ناکام ہوگئے ہیں۔
دوسری جانب میئر پورٹ لینڈ نے وفاقی حکومت کے فوجیوں سے شہر چھوڑنے کی اپیل کردی ہے، ان کا کہنا ہے کہ ٹرمپ انتظامیہ فوج بھیج کر مظاہرین کو مزید مشتعل کررہی ہے، انہوں نے مطالبہ کیا کہ وفاقی فوجی دستے شہر چھوڑ کر واپس چلے جائیں۔
واضح رہے کہ سیاہ فام جارج فلائیڈ کی پولیس اہلکار کے ہاتھوں ہلاکت کیخلاف امریکی شہر پورٹ لینڈ میں 25 مئی سے مسلسل احتجاج جاری ہے، مظاہرین نے امریکی پرچم بھی جلایا، پولیس تشدد اور نسلی امتیاز کے خلاف نعرے بازی بھی کی۔
