شندور : فیسٹول کی اختتامی تقریب سے آرمی چیف آف اسٹاف نے کہا ہے کہ وطن عزیز کی حفاظت کے لیے کسی قربانی سے دریغ نہیں کیا جائے گا، دہشت گردوں کی کمر توڑ دی ہے بھاگنے کا موقع نہیں دیں گے۔
تفصیلات کے مطابق شندور میں جاری پولو فیسٹول کی اختتامی تقریب میں آرمی چیف آف اسٹاف جنرل راحیل شریف کو بطور مہمان خصوصی مدعو کیا گیا، اس موقع پر آرمی چیف نے چترال اور گلگت کی ٹیموں کے مابین ہونے والا آخری فائنل میچ بھی دیکھا۔
چترال اور گلگت کی ٹیمیوں کے مابین کھیلا جانے والے فائنل میچ میں چترال کی ٹیم نے گلگت بلتستان کو 10 کے مقابلے میں پانچ گول سے شکست دے کر ٹورنامںٹ اپنے نام کرتے ہوئے شندور پولو فیسٹول کا ٹائٹل اپنے نام کرلیا۔
اس تقریب کے اختتام پر آرمی چیف آف اسٹاف نے خطاب کرتے ہوئے کہا کہ ’’آپریشن ضرب عضب سے ملک میں مثبت نتائج سامنے آئے ہیں، ملک میں دہشت گردی پھیلانے والے عناصر کا آخری حد تک پیچھا کریں گے۔
انہوں نے مزید کہا کہ پاک فوج نے سیلاب میں متاثرین کی ہر ممکنہ مدد کی، جنرل راحیل شریف نے فیسٹول کے منتظمین کو خراج تحسین پیش کرتے ہوئے کہا کہ ’’اس فیسٹول کے انعقاد سے سیاحت کو فروغ ملا ہے جو کے ملک کے لیے خوش آئند ہے، شندور میلہ ملک کے روشن مستقبل کی دلیل ، ترقی اور سلامتی کا ترجمان ہے‘‘۔
آرمی چیف آف اسٹاف نے اس عزم کا اظہار کیا کہ ’’وطن عزیز کی حفاظت کے لیے کسی قسم کی قربانی سے دریغ نہیں کیا جائے گا‘‘، جنرل راحیل شریف نے کہا کہ ’’دہشت گردوں کی کمر توڑ دی گئی ہے اور اُن کے گرد زمین تنگ کردی ہے، اب شرپسند عناصر کو بھاگنے کا موقع نہیں دیا جائے گا، مصیبت کی گھڑی میں آرمی کے جوانوں نے عوام اور ملک کے لیے کسی قربانی سے دریغ نہیں کیا‘‘۔
جنرل راحیل شریف نے غیر ملکی مندوبین کا فیسٹیول میں شرکت کرنے کا شکریہ ادا کرتے ہوئے کہا کہ ’’آپریشن ضرب عضب ہمارے پختہ عزم کا تسلسل ہے، پائیدار امن کے حصول کا سفر پورے ملک میں اسی عزم کے ساتھ جاری رہے گا، پاک فوج کی بے پناہ قربانیوں کے باعث آج ہم پر امن فضاء میں سانس لے رہے ہیں‘‘۔
یاد رہے گلگت بلتستان اور خیبرپختونخوا کی حکومت کے اشتراک سے 4 سال بعد شندور میں پولو فیسٹول کا انعقاد کیا گیا تھا، اس فیسٹول کی نگرانی کے لیے فرنٹئیر کانسٹبلری نے بھی فرائض سرانجام دیے، اس فیسٹیول میں غیرملکی مندوبین سمیت ہزاروں مقامی افراد شرکت کرتے ہیں۔
دنیا کے سب سے اونچے مقام پر منعقد ہونے والے پولو فیسٹول کے لیے ایک عارضی خیمہ بستی قائم کی جاتی ہے جس کے باعث وہاں کے مقامیوں میں بھی خوشی کی لہر دوڑتی ہے، اس فیسٹیول کے انعقاد کا مقصد دنیا بھر کو امن کا پیغام دینا ہے۔
