کراچی : شہر قائد کے مختلف علاقوں میں فائرنگ سے ایک شخص جاں بحق اوردو زخمی ہوگئے، پولیس اور رینجرز نے مختلف علاقوں میں کارروائیاں کرتے ہوئے ایک درجن سے زائد افراد کو گرفتار کرلیا۔
پولیس حکام کے مطابق گلشن اقبال تیرہ ڈی میں نامعلوم افراد کی فائرنگ سے ایک شخص جاں بحق ہوا، لاش کوضابطے کی کارروائی کیلئے جناح اسپتال منتقل کیا گیا ہے.
دوسری جانب صفورہ گوٹھ کے قریب جھگڑے کے دوران خاتون کی فائرنگ سے خاتون سمیت دو افراد زخمی ہوگئے، جنھیں طبی امداد کیلئے عباسی شہید اسپتال منتقل کردیا گیا.
اسپیشل انویسٹی گیشن یونٹ نے ماڑی پور مچھر کالونی میں کارروائی کرتے ہوئے ایک ڈاکو کو گرفتار کرکے اسلحہ برآمد کرلیا ملزم ڈکیتیوں کے علاوہ ریلوے پولیس کے اہلکار سے سرکاری ایس ایم جی چھیننے کے کیس میں بھی ملوث تھا.
رینجرز نے رات گئے لیاقت آباد نو نمبر میں کو گھیرے میں لے کر سرچ آپریشن کرکے دومشتبہ افراد کو حراست میں لے کر تفتیش کیلئے نامعلوم مقام پر منتقل کردیا ہے۔
عزیز آباد میں حساس اداروں نے کارروائی کے بعد سیاسی جماعت کے عہدیدار ایوب تابانی کو حراست میں لے لیا۔
سکھن پولیس نے اے ایس آئی اشفاق کو گرفتارکرکے اس کے قبضے سے چند روز قبل بھینس کالونی میں قتل ہونے والے ڈاکٹر عباس کے دو موبائل فونز برآمد کرلئے.
قانون نافذ کرنے والے اداروں نے لیاری کے علاقے مولا مدد چوک سے قتل اقدام قتل اور اغواء برائے تاوان میں ملوث ایک گینگ وار کو گرفتار کرکے تفتیش کیلئے نامعلوم مقام پر منتقل کردیا.
