Tag: Railway wagons

کراچی: چین سے مال گاڑیوں کے ساتھ لگنے والی 70 جدید ترین ویگنیں پاکستان پہنچ گئیں۔

تفصیلات کے مطابق چین سے مال برداری کے لیے جدید کارگو بوگیاں کراچی پورٹ پہنچ گئی ہیں، 70 اسٹیٹ آف دی آرٹ ویگنیں لے کر جہاز کراچی پورٹ پر لنگر انداز ہو گیا ہے، اور ویگنیں اتارنے کا عمل بھی شروع ہو گیا ہے۔

ڈی ایس ریلوے اطہر ریاض کے مطابق چین سے برآمد شدہ 70 مال بردار گاڑیاں پاکستان ریلوے کو موصول ہو گئی ہیں، یہ بوگیاں 70 ٹن سامان کی ترسیل کی قابلیت رکھتی ہیں، جب کہ اس سے پہلے موجود گاڑیاں 60 ٹن اٹھا پاتی تھیں۔

انھوں نے بتایا کہ نئی کارگو بوگیاں جلد ہی آزمائشی مراحل کی تکمیل کے بعد ریلوے کارگو فلیٹ میں شامل کی جائیں گی، 1 کروڑ 39 لاکھ فی بوگی کی لاگت پر برآمد شدہ ان گاڑیوں کی فی بوگی آمدنی 2 لاکھ روپے روزانہ ہوگی۔

ڈی ایس کے مطابق رواں سال مارچ میں ایسی مزید 130 ویگنیں ریلوے سسٹم میں شامل ہو جائیں گی، 820 ویگنوں کا منصوبہ ہے، جب کہ ٹرانسفر آف ٹیکنالوجی معاہدے کے تحت باقی 620 ویگنیں پاکستان میں بنیں گی۔

واضح رہے کہ ملک کے اندر مینوفیکچرنگ سے قومی خزانے کا پیسہ بچے گا اور روزگار کے مواقع بڑھیں گے، نئی ویگنز سے ریلوے آمدن میں بھی سالانہ ڈیڑھ ارب روپے سے زائد کا اضافہ ہوگا۔

ڈی ایس اطہر ریاض نے بتایا کہ موجودہ ویگنز 60 ٹن وزن کے ساتھ 80 کلو میٹر فی گھنٹہ کی رفتار سے دوڑ سکتی ہیں، جب کہ نئی ویگنز میں 70 ٹن وزن کے ساتھ 100 کلومیٹر فی گھنٹہ کی رفتار سے چلنے کی صلاحیت ہے۔

جدید ویگنز کی سسٹم میں شمولیت سے ریلوے کے ذریعے مال کی ترسیل کے رجحان میں بھی اضافہ ہوگا۔