Tag: railway

سکھر: حیدر آباد سے سکھر تک ریلوے ٹریک کا بڑا حصہ خطرناک قرار دے دیا گیا۔

تفصیلات کے مطابق آئے دن ریل گاڑیوں کے ٹریک سے اترنے کے واقعات کی وجہ معلوم ہو گئی، اے آر وائی نیوز نے اس سلسلے میں ایک کاشن شیٹ کی کاپی حاصل کر لی۔

ریلوے ذرایع کا کہنا ہے کہ حیدر آباد سے سکھر تک ریلوے ٹریک کا بڑا حصہ خطرناک قرار دیا گیا ہے، ریلوے اسٹیشن ماسٹرز نے ٹریک سے متعلق ڈرائیورز کو بھی آگاہ کر دیا ہے۔

ڈرائیورز کو ہدایات دی گئی ہیں کہ ٹریک کے متاثرہ مقامات پر ٹرین کی رفتار 10 سے 80 کلو میٹر فی گھنٹہ رکھی جائے تاہم ریلوے ذرایع کا کہنا ہے کہ متاثرہ ٹریک پر ٹرین کی رفتار کم رکھنے کی ہدایات پر عمل نہیں کیا جا رہا۔

ذرایع کے مطابق روہڑی سے حیدرآباد کے درمیان 100 کلو میٹر ٹریک خراب ہے، 350 کلو میٹرز کے درمیان متعدد مقامات پر ٹریک کم زور ہے، اور ٹریک خرابی کے باعث رواں سال ٹریک سے اترنے کے 20 سے زائد واقعات پیش آ چکے ہیں۔

یاد رہے کہ جمع کو راولپنڈی سےکراچی آنے والی ٹرین عوام ایکسپریس پٹری سے اتر گئی تھی، یہ واقعہ خیرپور ریلوے اسٹیشن پر پیش آیا تھا، جس میں عوام ایکسپریس کا انجن پٹری سے اتر گیا تھا، انجن اٹھانے کے لیے روہڑی سے ریسکیو ٹرین بھیجی گئی۔

دو ہفتے قبل سکھر میں بھی مال گاڑی کی بوگیاں پٹری سے اتر گئی تھیں، تاہم ڈی سی او ریلوے کا کہنا تھا کہ حادثہ کانٹے کی خرابی کے باعث پیش آیا۔

حیدرآباد: چلتی ریل گاڑیوں میں بھی وارداتیں ہونے لگیں، ایک چور نے آج ریل میں ایک مسافر کا موبائل فون چرایا اور چلتی ریل سے کود گیا، تاہم گرفتار ہونے سے نہ بچ سکا۔

اے آر وائی نیوز کے مطابق تھانہ ریلوے پولیس حیدرآباد نے ایک کارروائی میں چلتی ٹرین سے موبائل فون چوری کرنے والے ایک شخص قاسم عرف قاسو ولد منظور کو گرفتار کر لیا ہے، ملزم حیدرآباد میں چلتی ٹرین سے چوری کے بعد اتر کر بھاگنے کی کوشش کر رہا تھا۔

پولیس کا کہنا ہے کہ حیدرآباد ریلوے اسٹیشن پلیٹ فارم نمبر 2 پر شالیمار ایکسپریس آ کر رکی تھی، اپنے مقررہ اسٹاپ کے بعد جب وہ روانہ ہو گئی تو اس دوران ایک لڑکا چلتی ٹرین سے کود کر تیز تیز قدموں سے حالی روڈ کالونی کی طرف جانے لگا۔

رپورٹ کے مطابق ریلوے اسٹیشن پر جرائم کی روک تھام کے سلسلے میں اس وقت تھانہ ریلوے پولیس حیدرآباد کے ایس ایچ او خالد محمود صائم اہل کاروں کے ساتھ موجود تھے۔

چلتی ٹرین سے اترنے والے لڑکے پر پولیس اہل کاروں کو شک گزرا تو انھوں نے اسے روک لیا، ریل سے اترنے کی وجہ دریافت کی گئی تو وہ پریشان ہو گیا اور ٹال مٹول کرنے لگا، جس پر اہل کاروں نے اس کی جامہ تلاشی لی۔

پولیس کے مطابق لڑکے کی قمیض کی جیب سے ایک موبائل فون ٹچ اسکرین انفینکس اسمارٹ بلیک کلر برآمد ہوا، لڑکے سے موبائل فون کے بارے میں پوچھا گیا تو اس نے ادھر کی ادھر کی باتوں کے بعد آخر کار تسلیم کر لیا کہ اس نے ایک بوگی سے چوری کیا ہے۔

پولیس نے ملزم قاسم کو اس کا جرم قابل دست اندازی پولیس زیر دفعہ 379 ت پ کے مطابق گرفتار کیا اور ملزم کے خلاف تھانہ ریلوے پولیس حیدرآباد میں مقدمہ نمبر 28/2020 درج کر لیا۔

کراچی: محکمہ ریلوے نے 2 مزید ٹرینیں چلانے کا فیصلہ کر لیا ہے، یہ ریل گاڑیاں مشہور شاعر فیض احمد فیض اور لاثانی ٹرینوں کے نام سے چلائی جا رہی ہیں۔

تفصیلات کے مطابق محکمہ ریلوے نے لاہور نارووال کے درمیان فیض احمد فیض ٹرین چلانے کا فیصلہ کیا ہے، فیض پسنجر لاہور سے شام ساڑھے 6 بجے روانہ ہو کر رات 8 بج کر 55 منٹ پر نارووال پہنچے گی۔

فیض پسنجر نارووال سے صبح ساڑھے 5 بجے روانہ ہو کر ساڑھے 7 بجے لاہور پہنچے گی۔

محکمہ ریلوے نے لاہور سے سیالکوٹ کے لیے لاثانی ایکسپریس چلانے کا بھی فیصلہ کیا ہے، لاثانی ایکسپریس لاہور سے دوپہر 3 بج کر 45 منٹ پر روانہ ہو کر سیالکوٹ 7 بج کر 45 منٹ پر پہنچے گی۔

لاثانی ایکسپریس سیالکوٹ سے صبح 6 بجے روانہ ہوگی اور 9 بج کر 55 منٹ پر لاہور پہنچے گی۔

21 ستمبر سے ریل کرایوں میں کمی کا اعلان

محکمے کے مطابق سیالکوٹ، نارووال اور لاہور کے درمیان پسنجر ٹرین چلنے سے مزدور پیشہ افراد کو تیز رفتار سواری مہیا ہوگی۔

ادھر محکمہ ریلوے نے اے سی بزنس اور اے سی اسٹینڈرڈ میں سفر کرنے والے مسافروں کو خوش خبری دیتے ہوئے کہا ہے کہ 21 ستمبر سے اے سی بزنس کلاس کے کرایوں میں 10 فی صد کمی کی جا رہی ہے، جب کہ اے سی اسٹینڈرڈ کے کرایوں میں بھی 5 فی صد کمی کی جائے گی۔

محکمہ ریلوے کے مطابق 14 ستمبر سے تمام ایکسپریس ٹرینوں میں ڈائننگ ریسٹورںٹ کاریں دوبارہ لگا دی جائیں گی، جنھیں کرونا وائرس کے پھیلاؤ کی وجہ سے ہٹایا گیا تھا، ریلوے مسافروں کو اب ٹرین میں ناشتہ، کھانا، چائے اور دیگر کھانے پینے کی اشیا دستیاب ہوں گی۔

لاہور: کرونا وائرس کے کیسز میں کمی کو دیکھتے ہوئے محکمہ ریلوے نے 5 ٹرینیں بحال کر دی ہیں اور ان ٹرینوں کی روانگی کا شیڈول بھی جاری کر دیا گیا ہے۔

تفصیلات کے مطابق پاکستان ریلویز نے پانچ ٹرینیں بحال کر دی ہیں، محکمہ ریلوے کی جانب سے 17 اگست سے بحالی کا نوٹیفکیشن جاری کر دیا گیا ہے، اس سلسلے میں ٹرینوں کی روانگی کا شیڈول بھی جاری کیا گیا ہے۔

بحال ہونے والی ریل گاڑیوں میں ہزارہ، فرید، رحمان بابا، موہن جودڑو، بدرایکسپریس شامل ہیں، بدر ایکسپریس کا روٹ لاہور سے فیصل آباد کی بجائے ملتان تک بڑھا دیا گیا ہے، موہن جو دڑو ایکسپریس کا روٹ بھی کراچی سے براستہ لاڑکانہ ملتان تک بڑھایا گیا ہے۔

ترجمان ریلوے کے مطابق ہزارہ ایکسپریس 17 اگست صبح 6 بجے کراچی کینٹ سے حویلیاں روانہ ہوگی، فرید ایکسپریس 17 اگست کو شام ساڑھے 7 بجے کراچی سٹی سے لاہور روانہ ہوگی، رحمان بابا ایکسپریس صبح ساڑھے 9 بجے کراچی کینٹ سے پشاور روانہ ہوگی، بدر ایکسپریس شام ساڑھے 4 بجے ملتان کینٹ سے لاہور روانہ ہوگی، موہن جو داڑو ایکسپریس سہ پہر 3 بجے کراچی سٹی سے ملتان روانہ ہوگی۔

ترجمان کا کہنا ہے کہ بدر، موہنجو داڑو ایکسپریس کا کرایہ پاکستان ریلوے کے قواعد کے مطابق ہو گا، کرونا صورت حال کی بہتری پر ٹرینوں کی مرحلہ وار بحالی جاری ہے۔

بحال ہونے والی ٹرینوں کی آن لائن ریزرویشن شروع کر دی گئی ہے، واضح رہے کہ ریل گاڑیوں کی بحالی کا فیصلہ ایس او پیز کی پابندی کے ساتھ کیا گیا ہے، مسافروں اور عملے کے لیے نہ سفر کے دوران بلکہ اسٹیشن پر بھی ماسک پہننا لازمی ہوگا۔

کرنا وائرس کی وجہ سے 24 مارچ کو ان ٹرینوں کو منسوخ کیا گیا تھا، اب 17 اگست سے چلنے والی تمام ٹرینوں میں این سی او سی کی تمام ایس او پیز پر عمل کیا جائے گا۔

ایس او پیز کی خلاف ورزی کرنے والوں کے خلاف سخت کارروائی کی جائے گی۔