کراچی : شہر قائد میں آج دوسرے روز بھی طوفانی بارشوں کا سلسلہ پھر سے شروع ہوگیا، سڑکوں پر پانی جمع ہوگیا، بجلی غائب ہو گئی، کرنٹ لگنے سے دو افراد جاں بحق ہوگئے، محکمہ موسمیات نے بارش کا سلسلہ جمعرات تک جاری رہنے کی پیش گوئی کردی۔
تفصیلات کے مطابق گزشتہ روز سے شروع ہونے والا بارشوں کا سلسلہ آج بھی جاری ہے، ملیر، ایئرپورٹ، شارع فیصل، گلشن حدید، سپر ہائی وے، طارق روڈ، صدر، کلفٹن اور یونیورسٹی روڈ پر تیز ہواؤں اور بادلوں کی گھن گھرج کے ساتھ بارش ہوئی۔
دو افراد جاں بحق
بارش اور تیز ہواؤں کے باعث شہر بھر میں 300 مقامات پر بجلی کے تار ٹوٹ کر گر پڑے جب کہ نیو کراچی اور بلدیہ کے علاقے میں کرنٹ لگنے سے 2 افراد جان کی بازی ہار گئے۔
آدھے شہر میں اندھیرا، 400 فیڈر ٹرپ، 300 جگہ تار ٹوٹ گئے
حسب معمول بارش کی پہلی بوند گرتے ہی کےالیکٹرک کے دعووں کی قلعی کھل گئی، 405 فیڈرز ٹرپ ہوگئے اور 300 جگہوں سے بجلی کے تار ٹوٹ گئے جس کے باعث آدھے شہر میں اندھیرا چھا گیا اور ٹریفک سگنل بھی بند ہیں جب کہ جگہ جگہ پانی جمع ہونے کی وجہ سے سڑکوں پر گاڑیوں کی قطاریں لگ گئیں۔
ذرائع کے مطابق اولڈ سٹی ایریا، رنچھوڑ لائن، گارڈن، میٹھادر، بہارکالونی، پی ای سی ایچ ایس، نیوٹاؤن، صدر، خدادا کالونی ، لانڈھی، ملیر، نارتھ کراچی، سرجانی ٹاؤن اور نارتھ ناظم میں بجلی غائب ہوگئی۔
یاد رہے کہ پیر کو بھی طوفانی بارش کے باعث کرنٹ لگنے اور دیگر حادثات میں 8 افراد جاں بحق ہو گئے تھے اور محکمہ موسمیات نے آج بھی بارش کی پیش گوئی کی گئی تھی۔
طوفانی بارش جمعرات تک جاری رہنے کی پیش گوئی
محکمہ موسمیات نے شہر قائد میں ہونے والے بارشوں سے پیش گوئی کی ہے کہ آج ہونے والی بارش مزید 4 گھنٹے تک جاری رہنے کا امکان ہے جس کے بعد بارش کی شدت میں کمی واقع ہوجائے گی۔
محمکہ موسمیات کے مطابق کل یعنی بدھ سے بارش کا تیسرا مرحلہ شروع ہوگا اور کل پورا دن وقفے وقفے سے بارش جاری رہے گی تاہم یہ بارش کا سلسلہ جمعرات تک جاری رہنے کا امکان ہے۔
شہری احتیاط کریں
ماہرین نے شہریوں کو مشورہ دیا ہے کہ وہ بلاضرورت گھر سے باہر نہ نکلیں، بجلی کے کھمبوں سے دور رہیں، گھروں کے باہر لگی ڈور بیل نہ بجائیں کیوں کہ عموما بارش کے پانی کی وجہ سے اس میں کرنٹ آجاتا ہے، اسی طرح شہری سائن بورڈ یا درخت کے نیچے کھڑے نہ ہوں کیوں کہ ان کے گرنے کا خدشہ ہوتا ہے۔
فضائی آپریشن معطل، پروازوں کو اڑان بھرنے سے روک دیا گیا
موسم کی خرابی کے سبب پروازوں کو اڑان بھرنے سے روک دیا گیا، کراچی سے لاہور جانے والی پرواز پی کے 312 کو ٹیک آف کرنے سے روک دیا گیا، اسی طرح غیر ملکی ایئر لائن کی دوحہ جانے والی فلائٹ بھی بارش کے سبب اڑان بھرنے سے روک دی گئی۔
