ARYNews.tv | Urdu – Har Lamha Bakhabar

Tag: Rain

  • طوفانی بارشوں سے15افراد جاں بحق اور31زخمی،500سے زائد مکانات تباہ

    طوفانی بارشوں سے15افراد جاں بحق اور31زخمی،500سے زائد مکانات تباہ

    اسلام آباد : ملک بھرمیں ہونے والی طوفانی بارشوں سے اب تک 15افراد جاں بحق اور31زخمی ہوگئے، سب سے زیادہ جانی ومالی نقصان بلوچستان میں ہوا۔

    تفصیلات کے مطابق نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں ہونے والی حالیہ طوفانی بارشوں اور برفباری سے جانی ومالی نقصان سے متعلق رپورٹ جاری کی ہے۔

    رپورٹ میں کہا گیا ہے کہ بارشوں کےباعث15افراد جاں بحق اور31افراد زخمی ہوئے ہیں، بارشوں کے باعث سب سے زیادہ نقصان صوبہ بلوچستان میں ہوا۔

    این ڈی ایم اے رپورٹ کے مطابق بلوچستان میں نو افراد جاں بحق ہوئے اور500سے زائد مکانات منہدم ہوئے جبکہ فاٹا میں چار اور خیبر پختونخوا میں دو افراد جاں بحق ہوئے۔

    اس کے علاوہ مختلف علاقوں میں درجنوں دکانیں تباہ ہوئیں، رپورٹ میں بتایا گیا ہے کہ جاں بحق افراد کا تعلق ٹانک اور چارسدہ سے ہے، متاثرہ علاقوں میں ریسکیو آپریشن جاری ہے۔

    ہیوی مشینری بھی پہنچا دی گئی ہے، کھانے پینے کے دس ہزار پیکٹس متاثرہ افراد تک پہنچا دیئے گئے، امدادی ٹیمیں اور متعلقہ ادارےہائی الرٹ ہیں۔

  • بلوچستان میں بارشیں، حب ڈیم میں پانی کی سطح خطرناک حد تک پہنچ گئی

    بلوچستان میں بارشیں، حب ڈیم میں پانی کی سطح خطرناک حد تک پہنچ گئی

    کراچی: بلوچستان میں ہونے والی موسلا دھار بارشوں کے بعد حب ڈیم میں پانی کی سطح میں خطرناک حد تک اضافہ ہوگیا، محکمہ آبپاشی نے ڈیم میں مزید پانی جمع ہونے کا خدشہ ظاہر کردیا۔

    تفصیلات کے مطابق بلوچستان میں ہونے والی بارشوں کے بعد مختلف علاقوں میں سیلابی صورتحال پیدا ہوگئی جس کے باعث نظام زندگی مفلوج ہوا۔حکومتی ترجمان کے مطابق طوفانی بارشوں اور سیلابی ریلوں سے متعدد مکانات تباہ ہوئے جبکہ دیگر حادثات میں بچوں سمیت 5 افراد جاں بحق ہوئے۔

    بلوچستان کے علاقے قلعہ عبداللہ کے قریب قومی شاہراہ پرپل سیلابی ریلے میں بہہ گیا، چمن، پشین، ہرنائی، ژوب، لورالائی، قلعہ سیف اللہ میں شدید بارشوں کے باعث ندی نالوں میں طغیانی ہوئی۔

    مزید پڑھیں: بلوچستان میں بارشوں سے تباہی، 5 افراد ہلاک، ریسکیو کے لیے پاک فوج کے جوان میدان میں آگئے

    دوسری جانب حب ڈیم میں بھی پانی کی سطح 301 فٹ تک پہنچ گئی جس کے بعد واٹر بورڈ نے حب ڈیم سے کراچی کو پانی کی فراہمی شروع کردی۔ واٹر بورڈ کے ترجمان کا کہنا تھا کہ کراچی کو حب ڈیم سے 8 کروڑ گیلن پانی کی فراہمی شروع ہوگئی۔

    وزیراطلاعات بلوچستان کے مطابق تربت کے علاقے میں پھنسنے والے 13 افراد کو ریسکیور کر کے بچا لیا گیا جبکہ کیچ اور دیگر علاقوں میں حکومت نقصانات کا جائزہ لے رہی ہے۔

    ظہور بلیدی کے مطابق متاثرہ علاقوں میں فوری اور بروقت ریسکیو کی کارروائیاں شروع کر دی گئیں، سیلابی صورتحال کےباعث مکران کاعلاقہ سب سے زیادہ متاثر ہوا۔

    بلوچستان میں واقع میرانی ڈیم میں پانی کی سطح خطرے کے نشان تک پہنچ گئی، ضلعی انتظامیہ نے ہنگامی صورت حال کسے نمٹنے کے لیے پاک فوج سے مدد طلب کرلی۔ پاک فوج نے میرانی ڈیم کے قریب حفاظتی کیمپ قائم کردیا جبکہ مکران ڈویژن میں ریسکیو آپریشن کے لیے پاک فوج کے 2 ہیلی کاپٹروں کی مدد طلب کرلی گئی۔

    یہ بھی پڑھیں: بلوچستان میں شدید بارشیں ، حب ڈیم کا لیول خطرناک حد تک بڑھ گیا

    یاد رہے کہ گزشتہ ماہ بلوچستان میں ہونے والی بارشوں کے بعد حب ڈیم میں پانی کی سطح 298 فٹ تک پہنچ گئی تھی جسے محکمہ آبپاشی نے خطرناک قرار دیا تھا۔  واضح رہے کہ حب ڈیم اور کینجھر جھیل کراچی کو پانی کی فراہمی کے دو بڑے ذرائع ہیں، جہاں سے  پانی دھابیجی، گھارو اور حب پمپنگ اسٹیشنز کے ذریعے شہر کو سپلائی کیا جاتا ہے۔

    کراچی کے ضلع ویسٹ کے علاقوں کو پانی کی فراہمی حب ڈیم سے ہوتی ہے اور گذشتہ کئی سال سے بارشیں نہ ہونے کے سبب علاقوں میں پانی کی فراہمی نہ ہونے کے برابر تھی۔

  • بلوچستان میں برفباری اور بارشیں : مکان کی چھت گرنے سے خاتون سمیت سات بچے زخمی

    بلوچستان میں برفباری اور بارشیں : مکان کی چھت گرنے سے خاتون سمیت سات بچے زخمی

    حب : صوبہ بلوچستان کے پہاڑی علاقوں میں برفباری اور بارشوں کے بعد سیلابی صورت حال پیدا ہوگئی ہے ندی نالوں میں طغیانی کے باعث نظام زندگی شدید متاثر ہوا، مکانات کی چھتیں اور دیواریں گرنے سے 2 بچیاں جاں بحق جبکہ خاتون سمیت سات بچے زخمی ہوگئے ۔

    تفصیلات کے مطابق ملک کے مختلف حصوں میں کہیں رم جھم کہیں بارش تو کہیں راستے برف سے ڈھک گئے۔ جس کی وجہ سے کئی رابطہ سڑکیں بند ہوگئیں اور شہریوں کا مشکلات کا سامنا کرنا پڑ رہا ہے۔

    حب کے ضلع لسبیلہ کے پہاڑی علاقوں موسلادھار بارشیں ہوئیں، جس کے بعد وندر، اوتھل، بیلا اور شاہ نورانی کے ندی نالوں میں طغیانی آگئی جبکہ اوتھل میں مکان کی چھت گرگئی، حادثے میں ایک خاتون اور سات بچے زخمی ہونے کی اطلاعات ہیں۔

    اس کے علاوہ سیاحتی مقامات زیارت میں تین فٹ اور قلات میں ایک فٹ سے زیادہ برفباری ہوئی، گیس پریشر اور بجلی کی طویل لوڈ شیڈنگ سے معمولات زندگی متاثر ہوئے ہیں۔

    کوئٹہ میں برفباری سے سڑکیں بند ہوگئیں، کئی مقامات پر لوگ محصور ہوگئے، اسکردو، مستونگ اور مانسہرہ میں برفباری سے راستے بند ہوگئے، خضدار میں پاک فوج کے جوانوں نے برف ہٹانے کے کام کا آغاز کر دیا۔

    علاوہ ازیں چمن سمیت ضلع بھر میں دو روز سے وقفے وقفے سے جاری موسلادھار بارش نے تباہی مچا دی مکانات کی چھتیں اور دیواریں گرنے سے 2 بچیاں جاں بحق جبکہ خاتون سمیت سات بچے زخمی ہوگئے ہیں، کوژک ٹاپ پر شدید برف باری کے باعث کوئٹہ چمن شاہراہ دن بھر ٹریفک کی آمدورفت کے لئے بند رہا

    روجھان اور شہداد کوٹ میں بیشتر سڑکیں بارش کا پانی جمع ہونے کے باعث تالاب کا منظر پیش کرنے لگیں، لکی مروت اور بارکھان میں سڑکوں اور گلیوں میں جمع بارش کے پانی اور کیچڑ سے شہریوں کا چلنا محال ہو گیا۔

  • آج کراچی سمیت سندھ بھر میں بارش کا امکان

    آج کراچی سمیت سندھ بھر میں بارش کا امکان

    کراچی: محکمہ موسمیات نے آج شہرقائد سمیت سندھ بھر میں بارش کی نوید سنا دی، جبکہ ملک کے بالائی علاقوں میں برفباری کا امکان ہے۔

    تفصیلات کے مطابق محکمہ موسمیات کا کہنا ہے کہ آج سندھ کے علاوہ بھی ملک کے دیگرشہروں میں بھی بارش کا امکان ہے جبکہ بالائی اور پہاڑی علاقوں میں برفباری کی پیشگوئی ہے۔

    آج کراچی سمیت سندھ بھر میں اور کوئٹہ، ژوب، قلات، مکران، کوہاٹ، بنوں، ڈی آئی خان ڈویژن میں اکثر مقامات پر بارش کا امکان ہے۔

    مالاکنڈ، ہزارہ، پشاور، مردان، راولپنڈی، ملتان، گوجرانوالہ، سرگودھا، ڈی جی خان، سکھر، لاڑکانہ ڈویژن، اسلام آباد، کشمیر اور گلگت بلتستان میں چند مقامات پر تیز ہواؤں اور گرج چمک کے ساتھ بارش ہوگی۔

    گزشتہ روز سب سے کم درجہ حرارت کالام میں منفی بارہ ڈگری سینٹی گریڈ ریکارڈ کیا گیا۔

    کراچی میں آج موسم سرد اور ابرآلود رہے گا‘ محکمہ موسمیات

    یاد رہے کہ دو روز قبل محکمہ موسمیات کا کہنا تھا کہ ملک بھر میں بارشوں کا نیا سلسلہ آئندہ ایک ہفتے تک وقفے وقفے سے جاری رہے گا۔

    محکمہ موسمیات کے ڈائریکٹر عبدالرشید کا کہنا تھا کہ ایران کی طرف سے بادلوں کا سسٹم پاکستان کی طرف بڑھ رہا ہے جس سے ملک بھر میں بارشیں ہوں گی۔

  • ملک بھر میں طوفانی بارشوں نے تباہی مچادی، 23 افراد جاں بحق، ایمرجنسی نافذ

    ملک بھر میں طوفانی بارشوں نے تباہی مچادی، 23 افراد جاں بحق، ایمرجنسی نافذ

    لاہور: ملک بھر میں طوفانی بارشوں نے تباہی مچادی، مختلف حادثات میں 23 افراد جاں بحق ہوئے، متاثرہ علاقوں میں ایمرجنسی نافذ کردی گئی۔

    تفصیلات کے مطابق بلوچستان میں طوفانی بارش اور سیلابی ریلوں نے تباہی مچائی، ضلع مکران اور لسبیلہ میں ایمرجنسی نافذ ہے، جبکہ ریلے میں بہہ کر دو افراد جاں بحق ہوگئے۔

    پنجاب میں بھی بارش سے نظام زندگی درہم برہم ہوگیا، ملتان، ڈی جی خان، شیخوپورہ، سیالکوٹ، نارروال میں بھی شدید بارشیں ہوئیں، مختلف حادثات میں بچوں سمیت تئیس افراد لقمہ اجل بن گئے۔

    گوادر میں سڑک آبی ریلےکی نذر ہوگئی، آواران کا زمینی رابطہ منقطع جبکہ مکران اور لسبیلہ میں ایمرجنسی نافذ ہے، ایم ایٹ سڑک ہوشاب کے مقام پر ریلے میں بہہ گئی، کوسٹل ہائی وے کا بسول ندی پل کا ایک حصہ ٹوٹ گیا۔

    بارشوں سے کچھ علاقوں میں سیلابی صورت حال پیدا ہوئی ہے‘ جام کمال

    وزیراعلیٰ بلوچستان جام کمال نے متاثرہ علاقوں میں ریسکیو اور امداد سرگرمیوں کے لیے ہیلی کاپٹر کے استعمال کی ہدایت کی ہے۔

    وزیر اعلیٰ سیکریٹیریٹ میں کنٹرول روم قائم کر دیا گیا ہے، وزیر اعلٰی بلوچستان جام کمال نے پی ڈی ایم اے دفتر کا دورہ بھی کیا جہاں ڈائریکٹر جنرل عمران زرکوں نے انہیں نقصانات اور امدادی کاموں پربریفنگ دی۔

    جام کمال کا میڈیا سے گفتگو کرتے ہوئے کہنا تھا کہ بارشوں سے کچھ علاقوں میں سیلابی صورت حال پیدا ہوئی ہے، آواران کے علاقے میں ایک سڑک کا مسئلہ تھا جو جلد حل کرلیا جائے گا، لسبیلہ میں ایک 2 علاقے ایسے تھے جہاں تک رسائی نہیں تھی، بہت سی سڑکوں کو بھی نقصان پہنچا ہے۔

  • پنجاب میں موسلادھار بارش، گھر کی چھت گرنے سے 4 افراد جاں بحق

    پنجاب میں موسلادھار بارش، گھر کی چھت گرنے سے 4 افراد جاں بحق

    لاہور: پنجاب کے مختلف شہروں میں موسلادھار بارش کے باعث پروازیں منسوخ ہوگئیں جبکہ حادثے میں چار افراد جاں بحق ہوگئے۔

    تفصیلات کے مطابق نارووال، ملتان اور لاہور میں موسلادھار بارش ہوئی جس کے باعث مختلف علاقوں میں پانی جمع ہوگیا اور شہری شدید پریشانی میں مبتلا ہیں۔

    ملتان میں بارش کے باعث بدھلہ روڈ پر گھر کی چھت گر گئی، اس حادثے میں 3 بچوں سمیت 4 افراد جاں بحق جبکہ ایک لڑکی زخمی ہوگئی، ملبے تلے دبے افراد کو نکالنے کے لیے ریسکیو آپریشن جاری ہے۔

    دوسری جانب لاہور اور گردونواح میں موسلادھار بارش کا سلسلہ جاری ہے، بارش کے باعث علامہ اقبال ائیرپورٹ پر پروازوں کا شیڈول متاثر ہے، ساڑھے 4 بجے لاہور سے بنکاک جانے والی پرواز منسوخ کردی گئی۔

    آج کراچی سمیت سندھ بھر میں بارش کی پیشگوئی

    5بجے لاہور سے کراچی جانے والی پی آئی اے کی پرواز بھی منسوخ کردی گئی، لاہور سے ریاض جانے والی پرواز بھی تاخیر کا شکار ہوگئی۔جبکہ نارووال میں موسلادھاربارش سے نشیبی علاقے زیرآب آگئے۔

    خیال رہے کہ آج کراچی سمیت سندھ بھر میں بھی بارش کی پیش گوئی ہے۔

    یاد رہے کہ دو روز قبل محکمہ موسمیات کا کہنا تھا کہ ملک بھر میں بارشوں کا نیا سلسلہ آئندہ ایک ہفتے تک وقفے وقفے سے جاری رہے گا۔

  • آج کراچی سمیت سندھ بھر میں بارش کی پیشگوئی

    آج کراچی سمیت سندھ بھر میں بارش کی پیشگوئی

    کراچی: محکمہ موسمیات نے آج کراچی سمیت سندھ بھر میں بارش کی پیش گوئی کی ہے۔

    تفصیلات کے مطابق محکمہ موسمیات کا کہنا ہے کہ آج کراچی اور سندھ کے دیگر شہروں میں ہونے والی بارش سے سردی کی شدت میں بھی اضافہ ہوگا۔

    دوسری جانب لاہور اور گردونواح میں وقفے وقفے سے بارش کا سلسلہ بھی جاری ہے جبکہ ژوب، مکران، قلات، بارکھان اور تربت میں آج رم جھم ہوگی۔

    پنجاب اور خیبرپختونخوا کے بیشتر شہروں میں بھی بادل برسیں گے، کوئٹہ، مری، دیر، چترال، گلگت، اسکردو اور کشمیر کے پہاڑی علاقوں میں برفباری کا امکان ہے۔

    گزشتہ روز سب سے کم درجہ حرارت کالام، اسکردو اور استور میں منفی چھ ڈگری سینٹی گریڈ ریکارڈ کیا گیا۔

    کراچی کے مختلف علاقوں میں گذشتہ رات ہلکی بارش ہوئی تھی جس کے باعث خنکی میں اضافہ ہوگیا تھا۔

    یاد رہے کہ دو روز قبل محکمہ موسمیات کا کہنا تھا کہ ملک بھر میں بارشوں کا نیا سلسلہ آئندہ ایک ہفتے تک وقفے وقفے سے جاری رہے گا۔

    محکمہ موسمیات کے ڈائریکٹر عبدالرشید کا کہنا تھا کہ ایران کی طرف سے بادلوں کا سسٹم پاکستان کی طرف بڑھ رہا ہے جس سے ملک بھر میں بارشیں ہوں گی۔

  • کراچی کے مختلف علاقوں میں تیزہواؤں کے ساتھ ہلکی بارش

    کراچی کے مختلف علاقوں میں تیزہواؤں کے ساتھ ہلکی بارش

    کراچی: شہرقائد کے مختلف علاقوں میں تیزہواؤں کے ساتھ ہلکی بارش نے خنکی میں پھر اضافہ کردیا۔

    تفصیلات کے مطابق کراچی کے مختلف علاقوں میں ہلکی بارش تو کہیں بوندا باندی سے موسم خوشگوار ہوگیا۔

    شہر کے مختلف علاقوں میں ہلکی بارش کے بعد ٹھنڈی ہواؤں کا راج ہے، جبکہ سردی کی شدت میں بھی اضافہ محسوس کیا گیا ہے۔

    قبل ازیں رواں سال جنوری میں کراچی میں موسلادھار بارش سے شہریوں کی مشکلات میں اضافہ ہوگیا تھا، مختلف علاقوں میں سڑکیں زیرآب آگئیں تھیں۔

    بعد ازاں محکمہ موسمیات نے شہر میں بارش کے نئے سسٹم کی پیش گوئی کی تھی۔

    کراچی میں بارش کے بعد سردی میں اضافہ، بالائی علاقوں میں برفباری کا امکان

    گذشتہ ماہ بارش کے بعد سڑکوں‌ پر سیوریج اور بارش کا پانی کھڑا ہوگیا جس کی وجہ سے شہریوں‌ کی زنگی اجیرن بن گئی تھی۔

    شہری انتظامیہ کے بلدیاتی عملے نے لیاقت آباد اور غریب آباد انڈر پاس سمیت شہر کے مختلف علاقوں میں پانی کی نکاسی کا معاملہ حل کیا۔

    خیال رہے کہ میئر کراچی نے بارش کے بعد شہر کی سڑکوں پر کھڑے پانی کا نوٹس لیتے ہوئے ہنگامی اقدامات کی ہدایت کی تھی۔

  • گلگت بلتستان میں بارش جبکہ ملک کے بالائی علاقوں میں برفباری کا امکان

    گلگت بلتستان میں بارش جبکہ ملک کے بالائی علاقوں میں برفباری کا امکان

    اسلام آباد: آج ملک کے بیشتر علاقوں میں موسم سرد اور خشک رہے گا جبکہ مالاکنڈ ڈویژن، گلگت بلتستان میں بعض مقامات پر بارش اور پہاڑوں پر ہلکی برفباری کا امکان ہے۔

    تفصیلات کے مطابق محکمہ موسمیات کا کہنا ہے کہ ہفتہ کے روز ملک کے بیشتر علاقوں میں موسم سرد اور خشک رہے گا، پنجاب کے میدانی علاقوں اور بالائی سندھ میں صبح اور رات کے اوقات میں دھند کا امکان ہے۔

    آج ریکارڈ کیے گئے سرد ترین مقامات کے درجہ حرارت بگروٹ، قلات، زیارت منفی 06، کالام منفی05، مالم جبہ منفی04، گوپس منفی03، کوئٹہ، سکردو، میرکھانی، ہنزہ میں منفی 02 ڈگری سینٹی گریڈ ریکارڈ کیا گیا۔

    گزشتہ 24 گھنٹوں کے دوران ملک کے بیشتر علاقوں میں موسم سرد اور خشک رہا، تاہم مالاکنڈ، ہزارہ ڈویژن اور کشمیر میں کہیں کہیں جبکہ کوہاٹ، راولپنڈی، گوجرانوالہ ڈویژن اور گلگت بلتستان میں چند مقامات پر بارش اور پہاڑوں پر برفباری ہوئی۔

    اس دوران کالام 05، مالم جبہ 04، چترال 1.2، دیر 1.0 اور سکردو میں 0.3 انچ برفباری ریکارڈ کی گئی، سب سے زیادہ بارش خیبرپختونخوا میں ہوئی، دیر (بالائی 20، زیریں 02)، مالم جبہ17، بشام، بنیر 16، کالام 10، میرکھانی، بالاکوٹ 09، پٹن 08، دروش 05، کاکول 04، چترال، پاراچنار 03، سیدو شریف 01 ریکارڈ کی گئی۔

    کشمیر کے علاقے چھتر کالاس 23، مظفر آباد 16،چکوٹھی 14، بندی عباسپور 12، ہجیرہ، پنجیرہ 11، راولاکوٹ 10، گڑھی دوپٹہ 06، برارکوٹ 01 ریکارڈ کی گئ۔ جبکہ پنجاب کے علاقے ناروال 09، مری 02 اور گلگت بلتستان سکردو 03 اور بگروٹ میں 01 ملی میٹر بارش ریکارڈ کی گئی۔

  • ملک میں جمعے سے بارشیں برسانے والا نیا سسٹم داخل ہوگا

    ملک میں جمعے سے بارشیں برسانے والا نیا سسٹم داخل ہوگا

    کراچی : آج اور کل ملک کے بیشتر حصوں میں موسم سرد اور خشک رہے گا، ملک میں بارش برسانے والا سسٹم 15 فروری کو ملک میں داخل ہو گا۔

    تفصیلات کے مطابق چار پانچ روز تک موسم خشک رہنے کا امکان ہے 15اور16فروری کو مغرب کی جانب سے کم ہواوں کے دباو کا سلسلہ پاکستان داخل ہوگا جو بادل برسانے کا باعث بنے گا اورموسم دوبارہ سرد ہوگا۔

    محکمہ موسمیات کے مطابق آج ملک کے زیادہ تر علاقوں میں موسم سرد اور خشک رہے گا تاہم پنجاب کے میدانی علاقوں اور بالائی سندھ میں رات اورصبح کے اوقات میں دھند پڑنے کا امکان ہے۔

    آج ریکارڈ کیےگئےسرد ترین مقامات کےدرجہ حرارت:استور منفی 12، کالام، اسکردو منفی 11، بگروٹ منفی 08،گوپس منفی 06، مالم جبہ، ہنزہ، دیر، راولاکوٹ منفی 04،مری ، دروش،کاکول ،میر کھانی،منفی 03، چترال منفی 02، پارہ چنار،کوئٹہ میں منفی 01 ڈگری سینٹی گریڈ ریکارڈ کیا گیا ۔

    زرعی مشورے

    موجودہ موسمی صورتحال کے پیش نظر کسان حضرات سےگزارش ہے کہ مندرجہ ذیل مشوروں کو مدنظر رکھیں۔

    فصل ربیع خاص طور پر گندم اکثر زیریں اور وسطی علاقوں میں اپنے اہم مرحلوں میں داخل ہو چکی ہیں – لہذا کھیتوں میں نمودار ہو نیوالی جڑی بوٹیوں کی تلفی یقینی بنانیں اور حسب ضرورت آبپاشی کریں۔

    اپنی نرسریوں / سبزیوں وغیرہ کو شدید سردی / کورے وغیرہ سے محفوظ رکھنے کے لئے حفاظتی اقدامات کریں۔