Tag: Raja Riaz Opposition Leader

اسلام آباد : قومی اسمبلی میں اپوزیشن لیڈر راجہ ریاض نے کہا ہے کہ عمران خان دوبارہ ٹکٹ دیں گے بھی تو نہیں لوں گا، مریم نواز نے ٹکٹ دینے کے لیے کہا تو سوچ سکتا ہوں۔

یہ بات انہوں نے اے آر وائی نیوز کے پروگرام آف دی ریکارڈ میزبان کاشف عباسی سے خصوصی گفتگو کرتے ہوئے کیا۔ ان کا کہنا تھا کہ ملک کا بیڑاغرق ہی پی ٹی آئی نے کیا ہے۔

راجہ ریاض نے کہا کہ اپوزیشن لیڈرکا عہدہ چھوڑنے کیلئے تیار ہوں لیکن رولز کے مطابق چلیں گے، پہلے تو الیکشن کمیشن نے ارکان کو بلایا ہے وہاں پیش ہوں گے، الیکشن کمیشن پی ٹی آئی ارکان کو ڈی نوٹیفائی کرچکا ہے۔

انہوں نے کہا کہ پی ٹی آئی ارکان ایوان میں آئیں انہیں ویلکم کریں گے، ہم تو پہلے ہی اسمبلی میں انہیں بلاتے رہے لیکن یہ لوگ نہیں آئے، آج بھی پی ٹی آئی کاحصہ ہوں، آج عمران خان بھی ہمارا مؤقف تسلیم کررہے ہیں۔

اپوزیشن لیڈر کا کہنا تھا کہ ملک میں مہنگائی اور دہشت گردی کی ذمہ دارپی ٹی آئی ہے، موجودہ حکومت کو کوئی غیرقانونی کام نہیں کرنا چاہیے، ملک میں کسی کوحق نہیں کہ اداروں کیخلاف بات کرے۔

ایک سوال کے جواب میں ان کا کہنا تھا کہ سیکریٹری الیکشن کمیشن نے مقدمہ درج کرایا اور فواد چوہدری کی گرفتاری ہوئی، جو میرے خیال میں درست عمل ہے بلکہ الزمات لگانے پر شیخ رشید کی گرفتاری بھی درست ہوئی ہے۔

راجہ ریاض نے کہا کہ ہمارا اسمبلی سے نہ جانے کا فیصلہ درست تھا، پی ٹی آئی ارکان دوبارہ واپس آرہے ہیں توہمارےفیصلے کی تائید ہے، راجہ ریاض

ان کا کہنا تھا کہ ن لیگ نے اداروں کیخلاف زبان استعمال کی ہے تو وہ ہی جواب دے سکتے ہیں، جو بھی اداروں کیخلاف بات کرے گا اس کے خلاف بھی کارروائی ضرور ہونی چاہیے۔ ،

راجہ ریاض نے کہا کہ صوبائی اسمبلیوں کے انتخابات90دن میں ہونے ہیں اور ہونے بھی چاہئیں، کل حکومت کے سامنے مطالبہ رکھوں گا کہ90دن کے اندر الیکشن کرائیں، اگر نہ کیے گئے تو بیٹھ کرمشاورت کرینگے، الیکشن نہیں ہوتے تو ہم احتجاج بھی کرسکتے ہیں، عدالت بھی جاسکتے ہیں۔ ،

ان کا مزید کہنا تھا کہ عامرڈوگرکو گرفتار کیا گیا جو غلط ہے اس کی مذمت کرتا ہوں، شیریں مزاری کو بھی غلط گرفتار کیا گیا تھا جو قابل مذمت ہے، اعتماد کی تحریک میں شہبازشریف کو بالکل اعتماد کا ووٹ نہیں دیں گے۔