لاہور : عدالت نے عام انتخابات میں شیرکو ریلیوں میں لانے پر پابندی کی خلاف ورزی پر الیکشن کمیشن سے وضاحت طلب کر لی ہے۔
تفصیلات کے مطابق لاہور ہائیکورٹ میں بلدیاتی امیدواروں کی جانب سے فتح کے جشن اور ریلیوں میں اصلی شیر گھمانے کیخلاف درخواست کی سماعت ہوئی۔
درخواست گزار فریال گوہر نے اپنی درخواست میں موقف اختیار کیا کہ عدالتی حکم امتناعی کےباوجودجشن فتح اور ریلیوں میں شیر کو گھمایا جا رہا ہے۔
مسلم لیگ (ن) نے شیر کو انتخابی مہم کا حصہ بنایا اور شیر کے گلے میں پٹا ڈال کر اسے سڑکوں پر گھمایا گیا جو وائلڈ لائف قوانین کے علاوہ جانوروں کے حقوق کی خلاف ورزی بھی ہے۔
درخواست گزار کاکہنا تھا کہ شیر کو سرعام لے کرگھمانے سے جانوروں اورانسانی زندگیوں کو سنگین خطرات لاحق ہیں۔ اس لئے مسلم لیگ (ن) کے خلاف کارروائی کی جائے۔
عدالت عالیہ نے اس سلسلےمیں الیکشن کمیشن سے وضاحت طلب کر لی ہے۔ لاہور ہائیکورٹ نے اس سےپہلےعام انتخابات میں شیرکو ریلیوں میں لانے پر پابندی عائد کر رکھی تھی۔ عدالت نے کارروائی 20 نومبر تک ملتوی کردی۔
