متحدہ عرب امارات میں موسمیات کے قومی مرکز کی جانب سے پیش گوئی کی گئی ہے کہ آج رمضان المبارک کا آغاز پیر 11 مارچ 2024 سے ہورہا ہے۔
بین الاقوامی خبر رساں ادارے کی رپورٹ کے مطابق یو اے ای میں اس بار طویل وقفے کے بعد رمضان کی ابتدا موسم سرما میں جبکہ آخری عشرے میں قدرے کم گرمی کے ساتھ رہنے کی توقعات ہیں۔
متحدہ عرب امارات کی فلکیاتی انجمن کے چیئرمین ابراہیم الجروان نے گزشتہ ماہ کہا گیا کہ آئندہ سات سال تک رمضان المبارک کی شروعات موسم سرما میں ہوگی اور اس کا سلسلہ 2030 تک جاری رہے گا۔
امارات میں موسمیات کے قومی مرکز کی جانب سے پیش گوئی کی گئی ہے کہ پہلے نصف حصے میں سحری اور فجر تک موسم ٹھنڈا رہے گا۔ اس کے بعد موسم گرمی کی طرف منتقل ہونے لگے گا، رمضان کے دوران رات کے وقت موسم معتدل سے خوشگوار رہے گا۔
قومی مرکز کا کہنا ہے کہ رات کے وقت درجہ حرارت 18 سے 21 سینٹی گریڈ کے درمیان رہنے کی توقعات ہیں جبکہ دوپہر کے وقت درجہ حرارت 29 سے 34 کے درمیان ہوگا۔
مسجد الحرام، مسجد نبویؐ میں نماز تراویح کا روح پرور اجتماع
یو اے ای میں رمضان المبارک کی شروعات میں روزے کی مدت 13 گھنٹے 14 منٹ تک ہوگی جبکہ وقت بڑھنے کے ساتھ روزہ 13 گھنٹے 57 منٹ تک رہے گا۔ اس حوالے سے تمام ریاستوں اور شہروں میں چند منٹوں کا فرق دیکھنے کو ملے گا۔
