ARYNews.tv | Urdu – Har Lamha Bakhabar

Tag: Ramadan

رمضان اسلامی کیلنڈر کا نواں مہینہ ہے اور اسے اسلام میں بہت مقدس سمجھا جاتا ہے۔ یہ مہینہ مسلمانوں کے لیے روزے، عبادات، اور قرآن کی تلاوت کا مہینہ ہے۔ رمضان کے دوران مسلمان صبح صادق سے لے کر غروب آفتاب تک کھانے پینے سے پرہیز کرتے ہیں۔ اس کے ساتھ ہی برے خیالات اور برے کاموں سے بھی دور رہتے ہیں۔

  • سعودی عرب میں پہلا روزہ کب ہوگا؟

    سعودی عرب میں پہلا روزہ کب ہوگا؟

    ریاض: سعودی عرب میں رمضان کا پہلا روزہ جمعرات 23 مارچ کو ہونے کا امکان ہے۔

    تفصیلات کے مطابق سعودی ماہر فلکیات ڈاکٹرعبداللہ المسند نے کہا ہے کہ اس سال رمضان کا پہلا روزہ جمعرات 23 مارچ 2023 کو ہونے کا امکان ہے۔

    القصیم یونیورسٹی میں فلکیات کے سابق پروفیسر اور موسمیات کی سوسائٹی کے ڈپٹی چیئرمین نے کہا کہ اس مرتبہ شعبان 30 دن کا ہوگا کیوں کہ 29 شعبان بہ مطابق 21 مارچ، منگل کو چاند سورج غروب ہونے سے تقریباً 9 منٹ پہلے چھپ جائے گا۔

    ماہر فلکیات کے مطابق چاند اور سورج کا ملاپ 29 شعبان بہ مطابق 21 مارچ کی شام کو 8 بجکر 23 منٹ پر ہوگا، اور رمضان کا پہلا روزہ 23 مارچ کوہونے کا امکان ہے۔

    سبق ویب سائٹ کے مطابق اس سے قبل متحدہ عرب امارات میں فلکیاتی انجمن کے سربراہ ابراہیم الجروان نے بھی کہا تھا کہ اس سال رمضان کا پہلا روزہ جمعرات 23 مارچ کو ہونے کا امکان ہے۔

    انھوں نے کہا تھا کہ روزے کا دورانیہ 14 گھنٹے ہوگا، جب کہ رواں برس عید الفطر جمعہ 21 اپریل کو ہونے کی توقع ہے۔

  • رمضان کے دوران موسم کیسا رہے گا؟

    رمضان کے دوران موسم کیسا رہے گا؟

    ریاض: سعودی محکمہ موسمیات کا کہنا ہے کہ رمضان کے مبارک مہینے میں ملک کا موسم معتدل رہے گا۔

    تفصیلات کے مطابق سعودی عرب میں قومی مرکز برائے موسمیات کے ماہر عقیل العقیل نے کہا ہے کہ مملکت میں موسم سرما ایک ماہ سے بھی کم وقت میں ختم ہو جائے گا۔

    ماہر موسمیات نے مزید کہا کہ اس سال ماہ رمضان کے دوران موسم درمیانہ رہنے کا امکان ہے، جب کہ آنے والے برسوں میں رمضان سردی سے قریب ہوتا جائے گا۔

    سبق نیوز کے مطابق عقیل العقیل نے مزید کہا کہ تبدیل ہونے والے موسم کا اثر بتدریج ہوگا، درجہ حرارت میں کمی بیشی کا سلسلہ جاری رہے گا۔

    انھوں نے بتایا کہ آئندہ ہفتے میں بعض علاقوں میں ہلکی اور تیز بارش کا بھی امکان ہے۔

    سعودی ماہر موسمیات کے مطابق ہواؤں کا رخ شمال سے جنوب کی جانب ہونے کا بھی امکان ہے، جس سے صحرائی علاقوں میں ریتیلی آندھیوں کا سلسلہ شروع ہوگا۔

  • خلائی اسٹیشن میں روزے کیسے رکھیں؟

    ابوظبی: یو اے ای کے ایک خلا باز کے رمضان کے دوران مشن پر جانے کے ساتھ ہی یہ سوال سامنے آیا ہے کہ کیا خلائی اسٹیشن پر وہ روزے رکھیں گے؟

    اس کے ساتھ ہی عام لوگوں کے ذہن میں بھی یہ سوال ابھرا ہے کہ خلائی اسٹیشن پر روزے کیسے رکھیں جائیں گے، تاہم خلاباز سلطان النیادی کا جواب اس سلسلے میں معاملے کی بہ خوبی وضاحت کر دیتا ہے۔

    خبر رساں ایجنسی اے ایف پی کے مطابق متحدہ عرب امارات کے 41 سالہ خلاباز سلطان النیادی متحدہ عرب امارات کے پہلے خلاباز ہوں گے جو 6 ماہ بین الاقوامی خلائی اسٹیشن میں گزاریں گے، وہ اگلے ماہ اسپیس ایکس فالکن 9 راکٹ کے ذریعے خلائی اسٹیشن کو روانہ ہوں گے۔

    خلاباز سلطان النیادی سے جب پریس کانفرنس میں پوچھا گیا کہ وہ آنے والے رمضان میں روزے کیسے رکھیں گے تو انھوں جواب دیا کہ چوں کہ روزہ طلوع آفتاب سے پہلے سے لے کر غروبِ آفتاب تک ہوتا ہے تو اُن کے حالات استثنائی ہوں گے، یعنی وہ اپنے خلائی مشن کے دوران رمضان کے روزے رکھنے کی پابندی سے مستثنیٰ ہوں گے۔

    انھوں نے کہا کہ ’’میں حالت سفر میں ہوں گا، سفر کے دوران روزے چھوڑنے کی سہولت دی گئی ہے، مسافروں پر روزے کی پابندی لازم نہیں ہوتی۔‘‘

    واضح رہے کہ سلطان النیادی متحدہ عرب امارات کے دوسرے شہری ہوں گے جو خلا کا سفر کریں گے، ستمبر 2019 میں امارات کے خلاباز حزا المنصوری نے بین الاقوامی خلائی سٹیشن میں آٹھ دن گزارے تھے۔

    النیادی ناسا کے اسٹیفن بوئن، وارن ہوبرگ اور روس کے آندرے فیدیو 26 فروری کو مشن پر جائیں گے، جس کو ’اسپیس ایکس ڈریگن کریو سکس‘ کا نام دیا گیا ہے۔

  • پھلوں کی قیمتوں میں ہوش رُبا اضافہ، عوام پریشان

    پھلوں کی قیمتوں میں ہوش رُبا اضافہ، عوام پریشان

    کراچی: ماہ رمضان کے دوسرے عشر ے کا آغاز ہو گیا ہے لیکن پھلوں کی قیمتیں بدستور آسمان سے باتیں کر رہی ہیں۔

    تفصیلات کے مطابق ماہ رمضان کے دوران پھلوں کی قیمتوں میں ہوش رُبا اضافہ ہو چکا ہے جس سے عوام پریشانی میں مبتلا ہیں، کیلے کی فی درجن قیمت 120 روپے سے 200 روپے ہوگئی، تربوز کی فی کلو قیمت 80 روپے سے 120 روپے پر پہنچ گئی، جب کہ منڈی میں 80 روپے فی کلو فروخت ہو رہا ہے۔

    سیب کی فی کلو قیمت 150 سے بڑھ کر 400 روپے اور خربوزہ 60 روپے اضافے کے ساتھ 100 روپے فی کلو، چیکو 150 روپے، اسٹرابیری 400 روپے کلو اور کیوی 500 روپے کلو ہوگئی ہے۔

    کولڈ اسٹور میں محفوظ کیے گئے امرود 200 روپے کلو اور کینو 400 روپے درجن کر دیے گے ہیں۔

    سبزی اور پھل منڈی ایکشن کمیٹی رہنما حاجی شائستہ خان کا کہنا ہے کہ رمضان میں پھلوں کی طلب میں اضافے کی وجہ سے قیمتوں میں اضافہ ہوا ہے۔

    عوام کا کہنا ہے کہ مہنگائی میں اضافہ اب ایک عام سی بات بنتی جا رہی ہے، جس سے متوسط اور غریب طبقے کو براہ راست نقصان ہو رہا ہے۔

    ماہ رمضان میں پھلوں کی قیمتوں میں دوگنے سے بھی زیادہ کا اضافہ کیا گیا ہے، عوام کے مطابق انتظامیہ اپنی نااہلی اور کرپشن کا بوجھ عوام پر ڈال دیتے ہیں، انتظامیہ ایک بازار میں کارروائی کرتی ہے تو دوسرے بازاروں میں صورت حال جوں کی توں برقرار رہتی ہے، اس صورت حال میں پھلوں کی قیمتیں عوام کی دسترس سے باہر ہو گئی ہیں۔

  • کراچی: سموسے، پکوڑے اور جلیبی کی قیمتیں مقرر

    کراچی: سموسے، پکوڑے اور جلیبی کی قیمتیں مقرر

    کراچی: شہر قائد میں سموسے، پکوڑے اور جلیبی کی سرکاری قیمتیں مقرر کر دی گئیں۔

    تفصیلات کے مطابق کمشنر کراچی محمد اقبال میمن کی زیر صدارت اجلاس میں سموسے، پکوڑے اور جلیبی کے نرخ مقرر کیے گئے ہیں۔

    اے کیٹیگری فی سموسہ (قیمہ 35 گرام) کی قیمت 22 روپے، بی کیٹیگری 18 روپے مقرر کر دی گئی۔ اے کیٹیگری سموسہ (آلو 60 گرام) 22 روپے اور بی کیٹیگری 18 روپے مقرر کی گئی ہے۔

    اے کیٹیگری مکس پکوڑے 360 روپے فی کلو گرام اور بی کیٹیگری 320 روپے فی کلو ہوں گے۔

    کجلہ اور پھینی 500 روپے فی کلو گرام فروخت کیے جائیں گے، جلیبی اے کیٹیگری 320 روپے اور بی کیٹیگری 280 روپے فی کلو گرام مقرر کی گئی۔

    اجلاس میں ڈپٹی کمشنرز، بیورو آف پرائسز، کنزیومر ایسوسی ایشنز کے نمائندوں کوکب اقبال، عمر غوری، شکیل بیگ، صدر سوئیٹس اینڈ بیکرز ایسوسی ایشن شیخ محمد تحسین، دلپسند بیکری آصف احمد، یونائیٹڈ بیکری مقصود ناصر، رحمت شریں گلزار احمد، صدر کراچی ہولسیل گروسز ایسوسی ایشن عبدالرؤف موجود تھے۔

    کمشنر کراچی نے ہول سیل ایسوسی ایشن اور ریٹیلرز کی مشاورت سے دال اور چاول کے نرخ بھی مقرر کر دیے، دال اور چاول کی قیمتیں خصوصی طور پر رمضان المبارک میں عوام کو ریلیف دینے کے لیے مقرر کی گئی ہیں۔

    کمشنر کراچی کے مطابق دالیں 90 فی صد امپورٹ ہوتی ہیں، ڈالر کی قیمت کے حساب سے ایک ماہ کے بعد قیمتوں پر نظر ثانی کر سکتے ہیں، دال اور چاول پر ریٹیلر کا منافع 5 روپے فی کلو گرام مقرر کیا گیا ہے۔

  • انہیلر اور آنکھوں کے ڈراپس استعمال کرنے سے روزہ ٹوٹ جاتا ہے؟

    انہیلر اور آنکھوں کے ڈراپس استعمال کرنے سے روزہ ٹوٹ جاتا ہے؟

    کراچی: طبی ماہرین نے کہا ہے کہ سحر و افطار میں تلی ہوئی، مصالحے دار، چٹپٹی اشیا کھانے اور سافٹ ڈرنکس کے استعمال سے گریز کریں، انہیلر اور آنکھوں کے ڈراپس استعمال کرنے سے روزہ نہیں ٹوٹتا۔

    تفصیلات کے مطابق جناح اسپتال کراچی میں پاکستان اسلامک میڈیکل ایسوسی ایشن (پیما) کے زیر اہتمام روزہ اور صحت کے موضوع پر سیمینار کا انعقاد کیا گیا، جس میں ماہرین نے روزے کے ٹوٹنے اور نہ ٹوٹنے اور سحر و افطار میں کھانے پینے سے متعلق طبی ماہرین کی اہم ہدایات دیں۔

    طبی ماہرین نے کہا کہ سحر و افطار میں تلی ہوئی، مصالحے دار، چٹپٹی اشیا کھانے اور سافٹ ڈرنکس کے استعمال سے گریز کریں، شوگر، دل اور گردے کے امراض میں مبتلا مریض اپنے معالج کے مشورے پر روزہ رکھیں۔

    ماہرین کا کہنا تھا روزے کے دوران سانس کے مریض تکلیف کی صورت میں انہیلر استعمال کر سکتے ہیں، اسی طرح آنکھوں میں ڈراپس ڈالنے سے روزہ نہیں ٹوٹتا، البتہ روزے کے دوران کان اور ناک میں ڈراپس ڈالنے سے گریز کریں۔

    پروگرام کے مہمان خصوصی جناح سندھ میڈیکل یونیورسٹی کے وی سی ڈاکٹر امجد سراج میمن تھے، ماہر امراض قلب ڈاکٹر فواد فاروق، ماہر امراض گردہ پروفیسر عبدالمنان، ماہر امراض سانس ڈاکٹر مصور انصاری، ماہر امراض ذیابطیس پروفیسر عبدالباسط نے سیمینار سے خطاب کیا۔

    انھوں نے کہا کہ شوگر کے مریض اگر صرف دواؤں پر ہیں تو دواؤں کی خوراک معالج کے مشورے سے لیں اور روزہ رکھیں، گردے کے مریض ڈاکٹر سے مشورہ کریں اور اگر شدید بیماری نہیں ہے تو روزہ ضرور رکھیں، سانس کے مریض سخت تکلیف کی صورت میں روزے کی حالت میں انہیلر لے سکتے ہیں اس سے روزہ نہیں ٹوٹتا۔

    ماہرین کا کہنا تھا کہ آنکھوں کی دوا یعنی قطرے آنکھوں میں ڈالے جا سکتے ہیں اس سے بھی روزہ نہیں ٹوٹتا، لیکن کان اور ناک میں قطرے ڈالنے سے گریز کریں، یہ حلق میں جاتے ہیں اور اس سے روزہ ٹوٹ سکتا ہے۔

    ماہرین نے مشورہ دیا کہ کاربوہائیڈریٹس کی بجائے پروٹین لینا بہتر ہے، افطاری کے فوراً بعد ایک ساتھ بہت زیادہ پانی پینے سے گریز کریں، تھوڑا تھوڑا وقفے وقفے سے پانی پئیں، ماہرین کا کہنا تھا کہ تراویح ایک بہترین جسمانی عمل ہے، کوشش کریں سوائے مجبوری کے تراویح کھڑے ہو کر پڑھی جائے۔

  • ملک بھر میں سحر و افطار اور تراویح میں لوڈ شیڈنگ نہ کرنے کا فیصلہ

    ملک بھر میں سحر و افطار اور تراویح میں لوڈ شیڈنگ نہ کرنے کا فیصلہ

    لاہور: ملک بھر میں سحر و افطار اور تراویح میں بجلی کی لوڈ شیڈنگ نہ کرنے کا فیصلہ کیا گیا ہے۔

    تفصیلات کے مطابق پاور ڈویژن نے رمضان المبارک کی آمد پر سحر و افطار اور تراویح کے خصوصی اوقات میں لوڈ شیڈنگ نہ کرنے کا فیصلہ کیا ہے۔

    ذرائع کا کہنا ہے کہ اس سلسلے میں پاور ڈویژن نے تمام پاور ڈسٹری بیوشن کمپنیوں سے طلب و رسد کی تفصیلات طلب کر لی ہیں۔

    واضح رہے کہ محکمہ موسمیات نے کہا ہے کہ پاکستان میں ہفتہ 2 اپریل کو رمضان المبارک کا چاند نظر آنے کا امکان ہے، پہلا روزہ اتوار 3 اپریل کو ہوگا۔

    پاکستان میں پہلا روزہ کب ہوگا؟

    محکمہ موسمیات کے مطابق رواں ماہ شعبان 29 روز کا ہوگا اور 29 شعبان بمطابق 2 اپریل کو رمضان المبارک کا چاند نظر آنے کے واضح امکانات ہیں، اور 2 اپریل کو ملک کے بیش تر حصوں میں مطلع صاف اور کہیں کہیں بادل چھائے رہنے کا امکان ہے۔

  • رمضان سے قبل کیا کریں؟ طبی ماہرین کا اہم مشورہ

    رمضان سے قبل کیا کریں؟ طبی ماہرین کا اہم مشورہ

    کراچی: ڈاؤ یونیورسٹی آف ہیلتھ سائنسز کے ماہرین نے کہا ہے کہ رمضان سے قبل اپنے فزیشن کے پاس جا کر رمضان پری اسسمنٹ لازمی کروائیں۔

    تفصیلات کے مطابق ڈاؤ یونیورسٹی کے ذیلی ادارے نیشنل انسٹیٹیوٹ آف ڈایابیٹیس اینڈو کرائنالوجی (نائیڈ) کے زیر اہتمام واک اور سیمینار کے شرکا سے خطاب میں ماہرین نے رمضان اور شوگر سے متعلق اہم ہدایات دیں۔

    ڈاکٹر عمر فاروق نے کہا کہ رمضان سے پہلے اپنے فزیشن کے پاس جا کر رمضان پری اسیسمنٹ لازمی کروائیں، ڈاکٹر فرید نے کہا روزے کے بہت سے فوائد ہیں جو رکھ سکتے ہیں وہ ضرور رکھیں، روزے ہرگز نہ چھوڑیں کیوں کہ اس سے ایچ بی اے ون سی اور صحت سے جڑے باقی معاملات درست رہتے ہیں۔

    پرو وائس چانسلر پروفیسر نصرت شاہ نے کہا کہ دنیا میں 15 کروڑ مسلمان شوگر کے مرض میں مبتلا ہیں، جن میں 5 کروڑ کے لگ بھگ ماہ رمضان کے روزے رکھتے ہیں، روزے میں شوگر کی کمی یا زیادتی کو قابو رکھنے کی ضرورت ہوتی ہے اس لیے رمضان سے قبل ہی شوگر کے مریضوں اور ان کے قریبی افراد کوآگہی کی ضرورت ہے۔

    ڈاکٹر عمر فاروق نے کہا شوگر میں ٹائپ ون اور ٹائپ ٹو، دو اقسام ہوتی ہیں، ٹائپ ون کے مریضوں کو ہم رمضان میں روزہ رکھنے سے منع کر دیتے ہیں، جب کہ ان کی نسبت ٹائپ ٹو مریضوں کو روزہ رکھنے کی اجازت دیتے ہیں، ٹائپ ون مریضوں میں حاملہ یا وہ بچے شامل ہیں جن کو شوگر ہو جاتی ہے۔

    پروفیسر اختر علی بلوچ نے کہا کہ دنیا کی مسلم آبادی میں ایسے افراد جو شوگر میں مبتلا ہیں اور روزہ رکھنا چاہتے ہیں، ان کی رہنمائی کے لیے مختلف پروگرام ترتیب دیے جاتے ہیں، اپنے قیام سے اب تک نائیڈ پورے ملک سے آنے والے ذیابطیس کے مریضوں کی خدمت کر رہا ہے، اور سالانہ 50 ہزار سے زائد مریض اس ادارے سے استفادہ کر رہے ہیں، یہاں مستحق مریضوں کو 2 ہفتے کی دوا، انسولین اور فٹ ویئر سمیت دیگر ضروری اشیا مفت فراہم کی جاتی ہیں۔

    پروفیسر فوزیہ پروین کہا کہ نائیڈ میں جسمانی علاج کے ساتھ روحانی تسکین کا سامان بھی کیا جاتا ہے، یہ ادارہ شوگر کے مرض میں مبتلا افراد کو دیگر سہولتوں کے ساتھ انھیں روحانی طور پر مضبوط بنانے کے لیے رمضان کی آمد سے ڈیڑھ ماہ پہلے ہی ایسے طریقے بتاتا ہے کہ وہ اسلام کے اس بنیادی رکن کی ادائیگی بخوبی کر سکیں۔

  • دنیا بھر میں رمضان المبارک کی خوبصورت روایات

    دنیا بھر میں رمضان المبارک کی خوبصورت روایات

    رمضان اور عید گو کہ مذہبی تہوار ہیں لیکن مختلف ممالک اور مختلف خطوں میں اسے مختلف رسوم و رواج اور روایات کے ساتھ منایا جاتا ہے۔ اسی طرح ماہ رمضان کا استقبال بھی مختلف ممالک میں مختلف روایتوں کے تحت کیا جاتا ہے۔

    آئیں دنیا بھر میں رمضان کی خوبصورت روایات پر ایک نظر ڈالتے ہیں۔

    توپ داغنا

    سحر و افطار کے وقت توپ داغنے کی روایت کئی ممالک میں ہے۔

    مصر میں روایت ہے کہ ایک جرمن ملاقاتی نے مملوک سلطان الظہیر سیف الدین کو ایک توپ تحفتاً پیش کی۔ سلطان کے سپاہیوں نے یہ توپ شام کے وقت چلائی، رمضان المبارک کا مہینہ تھا اور اتفاق سے افطاری کا وقت تھا۔ شہریوں نے یہ تصور کیا کہ یہ ان کو افطار کے وقت سے آگاہ کرنے کے لیے ہے جس پر انہوں نے روزہ کھول لیا۔

    جب سلطان کے حواریوں کو یہ ادراک ہوا کہ رمضان المبارک کے دوران سحری و افطار کے وقت توپ چلانے سے ان کی شہرت میں اضافہ ہوا ہے تو ان کو یہ روایت جاری رکھنے کا مشورہ دیا گیا۔

    آنے والے برسوں کے دوران اس نے خاصی مقبولیت حاصل کرلی اور دنیا کے مختلف مسلمان ممالک نے بھی اسے اختیار کرلیا۔

    ترکی میں مختلف شہروں کی بلند ترین پہاڑی سے مقررہ وقت پر رمضان توپ چلائی جاتی ہے جو روزہ کھلنے کا اعلان ہوتا ہے۔

    سعودی عرب میں بھی سحری کے وقت توپ چلائی جاتی ہے جبکہ روس میں بھی کچھ جگہوں پر رمضان توپ چلائی جاتی ہے۔

    ڈرم بجانا، بگل بجانا

    سحری کے وقت ڈرم بجا کر لوگوں کو جگانے کی روایت کئی ممالک میں موجود ہے۔

    ترکی میں ڈرمر عثمانی عہد کا لباس پہن کر ڈرم بجا کرلوگوں کو جگاتے ہیں۔ مراکش میں ایک شخص ’نیفار‘ بگل بجا کر رمضان کے آغاز اور اختتام کا اعلان کرتا ہے۔

    منادی کرنا

    اسلامی روایات کے مطابق مسلمانوں کے اولین مساہراتی (منادی کرنے والے) حضرت بلال حبشی تھے جو اسلام کے پہلے مؤذن بھی تھے۔ حضور اکرم صلی اللہ علیہ وآلہ وسلم نے حضرت بلال کی ذمہ داری لگائی تھی کہ وہ اہل ایمان کو سحری کے لیے بیدار کریں۔

    مکہ المکرمہ میں مساہراتی کو زمزمی کہتے ہیں۔ وہ فانوس اٹھا کر شہر کے مختلف علاقوں کے چکر لگاتا ہے تاکہ اگر کوئی شخص آواز سے بیدار نہیں ہوتا تو وہ روشنی سے جاگ جائے۔

    سوڈان میں مساہراتی گلیوں کے چکر لگاتا ہے اور اس کے ساتھ ایک بچہ ہوتا ہے جس کے ہاتھ میں ان تمام افراد کی فہرست ہوتی ہے جن کو سحری کے لیے آواز دے کر اٹھانا مقصود ہوتا ہے۔

    مصر میں سحری کے وقت دیہاتوں اور شہروں میں ایک شخص لالٹین تھامے ہر گھر کے سامنے کھڑا ہوکر اس کے رہائشی کا نام پکارتا ہے یا پھر گلی کے ایک کونے میں کھڑا ہوکر ڈرم کی تھاپ پر حمد پڑھتا ہے۔

    ان افراد کو اگرچہ کوئی باقاعدہ تنخواہ نہیں ملتی لیکن ماہ رمضان کے اختتام پر لوگ انہیں مختلف تحائف دیتے ہیں۔

    رمضان خمیے

    سعودی عرب میں رمضان خیموں کی تنصیب عمل میں آتی ہے جہاں پر مختلف قومیتوں کے لوگ روزہ افطار کرتے ہیں۔

    یہ روایت روس میں بھی قائم ہے۔ ملک کی مفتی کونسل کی جانب سے ماسکو میں اجتماعی افطار کے لیے رمضان خیمہ کا اہتمام کیا جاتا ہے۔

    دیگر دلچسپ روایات

    ان روایات کے علاوہ بھی رمضان میں مختلف ممالک میں کئی دیگر منفرد و دلچسپ روایات دیکھنے کو ملتی ہیں۔

    مصر

    مصر میں رمضان المبارک کے دوران بچے چمکتے ہوئے فانوس یا لالٹین اٹھا کر گلیوں کے چکر لگاتے ہیں۔ یہ روایت ایک ہزار برس قدیم ہے۔

    روایت کے مطابق 969 عیسوی میں اہل مصر نے قاہرہ میں خلیفہ معز الدین اللہ کا فانوس جلا کر استقبال کیا تھا جس کے بعد سے رمضان المبارک کے دوران فانوس جلانے کی روایت کا آغاز ہوا اور ماہ رمضان کے دوران مصر میں فانوس یا لالٹین روشن کرنا روایت کا حصہ بن گیا۔

    سعودی عرب

    سعودی عرب میں ایسی بہت سی روایات ہیں جو نسل در نسل منتقل ہوئی ہیں یا ان پر دوسری ثقافتوں کا گہرا اثر ہے۔ لوگ گھروں پر فانوس یا بلب لگاتے ہیں، دکانوں پر بھی خصوصی انتظامات کیے جاتے ہیں تاکہ رمضان المبارک کا جوش و ولولہ نظر آئے۔

    ترکی

    ترکی میں افطار کے وقت مساجد کی بتیاں روشن کر دی جاتی ہیں جو صبح سحری تک روشن رہتی ہیں۔

    جدید اثرات اور یورپ اور ایشیا کے سنگم پر واقع ہونے کے باعث ترکی میں دوسرے ممالک کی طرح رمضان کے دوران ریستورانوں یا ہوٹلوں کی بندش کا کوئی قانون نہیں ہے اور نہ ہی رمضان کے دوران عوامی مقامات پر کھانے پینے کی ممانعت ہے۔

    ایران

    ایران میں افطاری کچھ مخصوص اشیا سے کی جاتی ہے جن میں چائے، ایک خاص طرح کی روٹی جسے ’نون‘ کہا جاتا ہے، پنیر، مختلف قسم کی مٹھائیاں، کھجور اور حلوہ شامل ہے۔

    ملائشیا

    ملائشیا میں زیادہ تر روزہ دار نماز تراویح کے بعد رات کے کھانے ’مورے‘ سے لطف اندوز ہوتے ہیں جن میں روایتی پکوان اور گرم چائے شامل ہوتی ہے۔

    متحدہ عرب امارات

    متحدہ عرب امارات میں رمضان المبارک کے دوران کام کے اوقات کار کم کر دیے جاتے ہیں۔ یہاں رات بھر رمضان مارکیٹ کھلی رہتی ہے۔

  • رمضان میں اندرون ملک پروازوں میں مسافروں کے لیے بڑی سہولت کا اعلان

    رمضان میں اندرون ملک پروازوں میں مسافروں کے لیے بڑی سہولت کا اعلان

    کراچی: سول ایوی ایشن اتھارٹی نے رمضان المبارک میں اندرون ملک جانے والی پروازوں کے حوالے سے اہم اعلان کیا ہے۔

    اے آر وائی نیوز کے مطابق سی اے اے نے رمضان المبارک کے دوران ملک کے اندر پروازوں میں مسافروں کو افطاری باکس فراہمی کی اجازت دے دی ہے۔

    ڈائریکٹر ایئر ٹرانسپورٹ نے این سی او سی کی جانب سے اجازت ملنے کے بعد نوٹیفیکیشن جاری کر دیا، سول ایوی ایشن کا کہنا ہے کہ این سی او سی اجلاس میں مسافروں کو رمضان المبارک میں کھانے کی فراہمی کی اجازت دی گئی ہے۔

    ڈائریکٹر ایئر ٹرانسپورٹ کا کہنا ہے کہ رمضان المبارک میں ایئر لائنز کو روزہ داروں کے لیے خاص انتظامات کر نے کی اجازت دی گئی ہے، سی اے اے نے ہدایت جاری کی ہے کہ ایئر لائنز روزہ داروں کے لیے افطاری باکس چیک ان کاؤنٹر پر افطاری کے وقت فراہم کریں گی۔

    سی اے اے کے مطابق اندرون ملک پروازوں میں کھانے کی فراہمی ماہ مقدس کے اختتام پر ختم ہو جائے گی، خیال رہے کہ کرونا وبا کے پھیلاؤ کے باعث اندرون ملک فلائٹس میں دوران پرواز اشیائے خور و نوش کی فراہمی پر پابندی عائد کی جا چکی ہے۔

    یہ بھی یاد رہے کہ رمضان المبارک میں بھی دوران پرواز مسافروں کو فیس ماسک کا استعمال لازمی قرار دیا گیا ہے۔