کراچی : ماہ مقدس رمضان المبارک قریب آتے ہی ناجائز منافع خوروں نے کمر کس لی، مقامی انتظامیہ کی جاری کردہ پرائس لسٹ بری طرح نظر انداز کرتے ہوئے ناجائز منافع خور شہریوں سے من مانی قیمتیں وصول کرنے لگے۔
منافع خوروں نے اشیا کی قیمتوں میں من مانا اضافہ کرکے عوام کی مشکلات میں اضافہ کر دیا ہے۔ ملک کے مختلف شہروں میں عوام کو ریلیف دینے کے لئے سستے اور رمضان بازاروں کا انعقاد کیا گیا ہے لیکن ان بازاروں میں بھی عوام کی آنکھوں میں دھول جھونکے کا سامان موجود ہے۔
رمضان کی آمد سے قبل اشیا کی قمیتوں میں دس سے پندرہ روپے اضافہ کرکے عوام کو لوٹا جا رہاہے۔ شہریوں نے میڈیا سے گفتگو کرتے کہا ہے کہ ضلعی انتظامیہ نے اگر پرائس کنٹرول لسٹ جاری کی ہے تو اس پر عمل بھی کروائے ایسی لسٹ کا کوئی فائدہ نہیں جس پر عمل ہی نہ ہو۔
شہریوں کا کہنا ہے کہ دو وقت کی روٹی مشکل ہے تو پھر یہ مہنگے پھل اور سبزیاں کہاں سے خریدیں جب کہ گوشت تو دسترخوان سے غائب ہی ہوچکا ہے، انہوں نے ارباب اختیار سے نوٹس لینے کا مطالبہ کیا۔
