لاہور: صوبائی وزیر قانون پنجاب رانا ثنا اللہ کا کہنا ہے کہ نیا بلدیاتی نظام2سے3ماہ میں لاگوکرا دیا جائے گا، بلدیاتی نظام کے تحت ترقیاتی فنڈز کی تقسیم منصفانہ ہوگی.

تفصیلات کے مطابق :صوبائی وزیر قانون پنجاب رانا ثنا اللہ کا کہنا ہے کہ نیا بلدیاتی نظام 2سے 3ماہ میں مؤثرطورپرلاگوکرا دیا جائے گا، بلدیاتی نظام کے تحت ترقیاتی فنڈز کی تقسیم منصفانہ ہوگی، انہوں نے یقین دھانی کراتے ہوئے کہا کہ ترقیاتی فنڈز کوٹہ سسٹم کے تحت نہیں دیے جارہے ہیں،
ترقیاتی فنڈز کوٹہ سسٹم کے تحت نہیں دیے جارہے،فنڈزمیں کسی ایم این اے اور ایم پی اےکے لیے حصہ مختص نہیں ہے.

حالیہ ناخوشگوار واقعے پر ان کا کہنا تھا کہ شوکت بسرا کاروباری رقابت کو سیاسی رنگ دینے کی کوشش کر رہے ہیں ، لڑائی کے وقت وہ ہشاش بشاش تھے، جبکہ اگلے روزان کے سر پر پٹیاں بندھ گئیں، انہوں نے کہا کہ یہ ٹوپی ڈرامے اب نہیں چلیں گے.

پانامہ لیکس کے حوالے سے صوبائی وزیر قانون نے کہا کہ پاناما لیکس سےمتعلق عدالت جو بھی فیصلہ کرے گی اسے تسلیم کریں گے، کرپشن کے الزامات دوسروں پر لگانے والے عمران خان اپنے صوبے کی حالات کا بھی مشاہدہ کریں ، انہوں نے الزام عائد کیا کہ کے پی کے میں شرمناک حرکتیں ہو رہی ہیں، شجرکاری کے مختص کردہ بجٹ میں‌ کرپشن کی جا رہی ہے، رانا ثنا اللہ نے چئیرمین تحریک انصاف سے سوال کیا کہ عمران خان عوام کو بتائیں ایک ارب شجرکاری کے درخت کہاں گئے؟

پاکستان سپر لیگ کے حوالے سے صوبائی وزیر قانون کا کہنا تھا کہ پی ایس ایل کو فول پروف سیکیورٹی فراہم کی جائے گی، انہوں کہا کہ یہ پاکستان کا ایونٹ ہے اس میں خود جاؤں گا اوردوسروں کو بھی دعوت دوں گا کہ اس کو بھرپور سپورٹ کریں.

ایک سوال کے جواب میں رانا ثنا اللہ نے ازراہ مذاق کہا کہ ویلنٹائن ڈے ضرور مناؤں گا اوراس مرتبہ کسی کوپھول بھی دوں گا.