Tag: rana Sana

لاہور: وزیر قانون برائے پنجاب رانا ثنا اللہ کا کہنا ہے کہ استعفیٰ لینے یا دینے سے متعلق فیصلہ ہمارے سیاسی پیر نوازشریف ہی کریں گے۔

ریلوے ہیڈکوارٹر کے باہر میڈیا سے گفتگو کرتے ہوئے رانا ثنا اللہ کا کہنا تھا کہ ’ استعفے لینے یا دینے فیصلہ جماعت نہیں کرسکتی بلکہ اس کا حتمی فیصلہ ہمارے سیاسی پیر نوازشریف ہی کریں گے‘۔

اُن کا کہنا تھا کہ تمام علما اور مشائخ ہمارے لیے قابل احترام ہیں اور ہم معاملات کو افہام و تفہیم سے حل کرنا چاہتے ہیں، لاہور دھرنے والوں سے سعد رفیق نے افہام و تفہیم سے معاملہ حل کیا۔

مزید پڑھیں: لاہوردھرناختم : تمام معاملات آئین وقانون کےمطابق طےپائے‘ سعدرفیق

قبل ازیں وفاقی وزیر ریلوے خواجہ سعد رفیق نے سماجی رابطے کی ویب سائٹ پر اپنے خیالات کا اظہار کرتے ہوئے کہا تھا کہ عوامی حاکمیت، آئین اور قانون کی حکمرانی ہماری منزل ہے اور مسلم لیگ (ن) آئین کی سربلندی کے لیے جدوجہد کررہی ہے۔

اُن کا کہنا تھا کہ مسلم لیگ (ن) میں مائنس کے امکان کو مسترد کردیا کیونکہ صرف نوازشریف ہی مسلم لیگ (ن) کے سیاسی امام قائد اور پیر ہیں جن کی سربراہی میں مجھ سمیت تمام رہنما اور کارکنان متحد ہیں۔

یہ بھی پڑھیں: تحریک لبیک جلالی گروپ نے لاہوردھرنا ختم کرنے کا اعلان کردیا

واضح رہے کہ تحریک لبیک یارسول اللہ کی جانب سے لاہور کے مال روڈ پر 7 روز سے دھرنا جاری تھا، مظاہرین کا مطالبہ تھا کہ ’نصاب میں تبدیلی کے ذمہ دار رانا ثنا اللہ ہیں اور وہ اس اقدام پر فوری طور پر مستعفیٰ ہوں‘ مگر حکومت سے مذاکرات کی کامیابی کے بعد مذہبی جماعت نے دھرنا ختم کرنے کا اعلان کردیا تھا۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔