لاہور : پنجاب کے وزیر قانون رانا ثناءاللہ نے کہا ہے کہ جے آئی ٹی کی رپورٹ پبلک نہیں کی جا سکتی، عمران خان گمراہ انسان ہیں، دسمبر تک اورنج لائن ٹرین چلا دینگے۔
تفصیلات کے مطابق پنجاب اسمبلی کے باہر میڈیا سے گفتگو کرتے ہوئے وزیر قانون رانا ثناءاللہ کا کہنا تھا کہ جے آئی ٹی کی رپورٹ پبلک نہیں کی جا سکتی، عمران خان گمراہ انسان ہیں، چاہتے ہیں کہ گمراہ لوگوں کی فورس قائم کی جائے، عبوری رپورٹ مکمل ہو یا ادھوری، وہ پبلک کرنے کا مطالبہ درست نہیں، اس سے انکوائری اور تحقیقات نہیں، تنازع کھڑا ہو جائے گا۔
انہوں نے کہا کہ آزادی اظہار رائے کے مطابق نظریاتی اساس ،قومی اداروں اور عدلیہ پر تنقید نہیں کی جا سکتی، جو اجازت عمران خان دلوانا چاہتے ہیں یہ انتہائی خطرناک ہے، ایسے تو توہین رسالت اور توہین مذہب کی بھی آزادی ہو جائے گی۔
رانا ثناءاللہ نے کہا کہ عمران خان سپریم کورٹ بھاگ بھاگ کر جاتے ہیں لیکن جہاں اپنا کیس ہو وہاں نہیں جاتے، سعودی عرب یا کسی کانفرنس میں وزیراعظم بطور سیاستدان نہیں بلکہ وزیر اعظم اور ملک کے نمائندہ کے طور پر جاتے ہیں، ان کو انڈر مائن کرنا ملک کو نقصان پہنچانے کے مترادف ہے۔
مزید پڑھیں : عمران خان پاکستان کے ڈونلڈ ٹرمپ ہیں، رانا ثناء اللہ
ان کا کہنا تھا کہ اورنج لائن پر 100 ارب روپے خرچ کئے جا رہے ہیں، یہ رقم سافٹ لون کی شکل میں چین سے موصول ہو گی، دسمبر 2017 تک اورنج لائن ٹرین تک چلا دیں گے۔کورٹ اور حکومت اورنج لائن بننے کے حق میں ہے، وہ لوگ پریشان ہیں کہ اگر یہ چل گئی تو ان کی سیاست خطرے میں پڑ جائے گی۔
وزیر قانون نے کہا کہ اسپیڈو کارڈر آزمائشی طورپر چلا رہے ہیں، اگر منافع بخش ہوا تو اسے آگے چلائیں گے۔
انہوں نے کہا کہ پرویز الہی اور راولپنڈی کا شیطان گھٹیا سیاستدان ہیں، ان کا سیاست میں کوئی مقام نہیں، اب یہ دونوں کسی ایک حلقے میں بھی کامیاب نہیں ہو سکتے۔
