اسلام آباد : وفاقی وزیر داخلہ رانا ثنااللہ نے ایک بار پھر تحریکِ انصاف کو دھمکی دی ہے کہ اسلام آباد پر چڑھائی کی تو منہ توڑ جواب دیا جائےگا، ابتدا آپ نے کرنی ہے انجام ہمارے پاس ہوگا۔
تفصیلات کے مطابق وفاقی وزیر داخلہ رانا ثنااللہ نے پریس کانفرنس کرتے ہوئے کہا کہ حکومت اور ادارے اپنی آئینی حدود میں ذمہ داریاں ادا کر رہے ہیں، الیکشن کمیشن آف پاکستان مبارک بادکامستحق ہے، ضمنی انتخابات صاف اور شفاف ہوئے۔
رانا ثنااللہ کا کہنا تھا کہ ضمنی انتخابات کو الیکشن کمیشن نے ذمہ داری کیساتھ مینج کیا، کوئی نہیں کہہ سکتاکہ کل کے الیکشن میں جانبداری سے کام لیا گیا۔
وزیر داخلہ نے کہا کہ عمران نیازی شروع سے چیف الیکشن کمشنر کیخلاف ہتک آمیز پروپیگنڈا کرتے ہیں، کل دوسری بار عمران خان کےجھوٹےہونےکادوسری بارثبوت فراہم ہوا ہے۔
انھوں نے واضح کہا کہ میں آج عمران خان اور پی ٹی آئی کےدوستوں کو واضح میسج دینے آیا ہوں ، کل پی ٹی آئی نے مجموعی طورپر 5لاکھ 47ہزار652ووٹ حاصل کئے اور پی ڈی ایم کے امیدواروں نے کل 4لاکھ 75ہزار 37 ووٹ حاصل کئے۔
رانا ثنااللہ نے پی ٹی آئی چیئرمین کو مخاطب کرتے ہوئے کہا کہ عمران خان کو کہنا چاہتا ہوں اگر چاہتے ہوکہ ہم ووٹرز کے فیصلے کو تسلیم کریں تو پھر عمران خان کو بھی پی ڈی ایم امیدواروں کے ووٹرز کا احترام کرنا ہوگا، عمران خان ووٹرز کا احترام نہیں کریں گے تو ہم سے بھی نہیں ہوگا۔.
وفاقی وزیر کا کہنا تھا کہ جمہوریت یہی ہے کہ شفاف الیکشن کے نتائج کو تسلیم اور ووٹ کو عزت دی جائے، ووٹ کو عزت کا مطلب ہے کہ ووٹ کی عزت کو تسلیم کیاجائے، فیصلے کو تسلیم کیاجائے تبدیل یا ٹیمپر نہ کیا جائے۔
ضمنی انتخابات کے نتائج کے حوالے سے انھوں نے کہا کہ تم نے ننکانہ سے 78 ہزار ووٹ لیکر سے کامیابی لی تو ہمیں بھی ووٹ پڑے ہیں، خانیوال میں 2018 سے 10 ہزار زیادہ ووٹ ن لیگ کو پڑے ، اگر آپ کے ووٹوں میں 15 ہزار کا اضافہ ہوا تو ہمارے ووٹوں میں بھی 11 ہزار کا اضافہ ہواہے۔
وزیر داخلہ کا کہنا تھا کہ جمہوریت اور جمہوری رویہ یہی ہے کہ فری اینڈ فیئرالیکشن کو تسلیم کیا جائے ، ایسا نہیں ہو سکتا حق میں ووٹ کو تسلیم اور باقیوں کوخلاف کو چور ڈاکو کہیں، یہ جمہوری رویہ نہیں اورہم اسے برداشت کریں گے نہ آگے بڑھنے دیں گے۔
رانا ثنااللہ کا کہنا تھا کہ ہم نے رول آف لا کیلئے ساری زندگی سمجھوتہ کیا جیلیں کاٹی ہیں، ہماری ساری زندگی جمہوری جدوجہد سےعبارت ہے، ہم تمہاری طرح کرکٹ کھیلتے ہوئے جمہوریت میں نہیں آئے۔
انھوں نے عمران خان کو کہا کہ دوسروں کی عزت کا خیال پہلے کرنا پڑتا ہے اگر اپنی عزت کا خیال ہو، آپ نے تو کارکنوں کو کہا ہوا ہے کہ مخالف سیاستدان ملے تو اسے گالیاں دیں آوازیں دیں۔
وفاقی وزیر کا کہنا تھا کہ ہر حلقے میں 15سے 20 ہزارووٹ واپڈا بلوں کی وجہ سے آپ کو پڑے، باقی کچھ صوبائی حکومتوں کی بھی آپ کومددملی ہے، جب عام انتخابات ہونگے تو اس وقت نہ تو آپ کوصوبائی حکومتوں کی سپورٹ حاصل ہوگی۔
حکومتی اقدامات کے حوالے سے انھوں نے کہا کہ ہم نے مشکل فیصلے کیے پاکستان کو ڈیفالٹ سے بچایا ہے، پاکستان کو اٹھانے اور بچانے کیلئے سخت اور مشکل فیصلے کرنے پڑے، جس کی وجہ سے مہنگائی ، پٹرول، ڈیزل اور بلوں میں اضافہ ہوا ہے۔
وزیر داخلہ کا مزید کہنا تھا کہ ہم نے اپنی سیاست سے زیادہ ریاست کو ترجیح دی ہے ، آپ حکومت میں تھےمہنگائی ہورہی تھی تواسوقت ضمنی الیکشن ہم جیت رہے تھے، ہماراضمنی الیکشن جیتنے پریہ رویہ نہیں تھا آپ کی حکومت غیر آئینی طریقے سے ختم کیا، عدم اعتمادکاطریقہ آئین میں درج ہے۔
رانا ثنااللہ نے دھکمی دی کہ آپ ضمنی الیکشن جیت گئےتومطلب یہ نہیں کہ غیرآئینی کام کی اجازت مل گئی، جتھہ کلچر پروان چڑھا کر اسلام آبادپر چڑھائی کی تو منہ توڑ جواب دیاجائے گا۔
وفاقی وزیر نے کہا کہ میں وارن کرتا ہوں آپ کو پوری طاقت سے فیس کیا جائے گا، ابتدا آپ نے کرنی ہے انجام ہمارے پاس ہوگا ، اسلام آباد پر چڑھائی کا طریقہ اپنایا تو پھرالیکشن نہیں جتھوں کی تیاری ہوگی۔
ان کا کہنا تھا کہ 8 سے 10 ماہ بعدآپ کو بھی جتھوں کا سامنا ہوگا، ہمیں کوئی ابہام نہیں ہمیں پتہ ہے کہ آپ کیساتھ کیا کرنا ہے، امید کرتا ہوں کہ جمہوری رویوں کو آگے بڑھنے کا موقع دیں گے ، افراتفری ، انتشار کی سیاست کو قوم پوری طاقت سے روکے گی۔
