کراچی : ایم کیوایم کے مرکز نائن زیرو پر چھاپے کہ بعد لندن میں رابطہ کمیٹی کا ہنگامی اجلاس ہوا۔
لندن میں اراکین رابطہ کمیٹی کا ہنگامی اجلاس ہوا، جس میں ایم کیوایم کے مرکز نائن زیرو پر رینجرز کی دوبارہ کارروائی اور رابطہ کمیٹی کے انچارج کیف الوریٰ اور قمر منصور کی گرفتاری پر سخت ردعمل کا اظہار کیا گیا ہے ۔
ذرائع کا کہنا ہے کہ اراکین رابطہ کمیٹی نے عید کے بعد کارکنان کی گرفتاریوں پر ملک گیر احتجاج کا لائحہ عمل طے کیا ہے۔
یاد رہے کہ رینجرز کی بھاری نفری نے ایم کیو ایم کے مرکز نائن زیرو پر سحر کے اوقات میں چھاپہ مارا اور خورشید بیگم میموریل ہال میں داخل ہوگئی جہاں ایم کیو ایم کے رہنماؤں عظیم فاروقی، سفیان یوسف، قمر منصور اور انچارج رابطہ کمیٹی کیف الوریٰ کو تفتیش کے لئے حراست میں لے لیا تاہم عظیم فاروقی اور سفیان یوسف کو تفتیش کے کچھ دیربعد چھوڑ دیا گیا جب کہ قمر منصور اور انچارج رابطہ کمیٹی کیف الوریٰ کو مزید تفتیش کے لئے حراست میں لے کر نامعلوم مقام پر منتقل کردیا۔
