کراچی : صدر میں کچرا کنڈی سے مردہ حالت میں ملنے والی 10 سالہ بچی گنگا کی ماں کا کہنا ہے کہ پوری رات اپنی بچی کو تلاش کرتی رہی صبح اس کی لاش ملی۔
تفصیلات کے مطابق کراچی کے علاقے صدر لکی اسٹار کے قریب کچرا کنڈی سے تشدد زدہ گنگا نامی بچی کی بوری بند لاش ملی بچی کو جنسی ہوس کا نشانہ بھی بنایا گیا تھا۔
زیادتی کے بعد قتل کی جانے والی کمسن بچی گنگا کی والدہ نے چھیپا سرد خانے میں میڈیا سے گفتگو کی اور تفصیلات بتائیں۔
مقتولہ بچی کی والدہ نے بتایا کہ میں دوائی لیکر گھر لوٹی تو میری بچی گنگا موجود نہیں تھی، رات بھر بیٹی کو تلاش کرتے رہے لیکن ہمیں صبح اس کی لاش ملی۔
مقتولہ کی والدہ نے اپیل کی کہ ہمیں انصاف فراہم کیا جائے، پولیس نے ہمارے کئی رشتہ داروں کو حراست میں لے لیا ہے۔
بعد ازاں گورنرسندھ کامران ٹیسوی نے بچی کے لواحقین سے ملاقات کی اور انہیں یقین دلایا کہ انصاف فراہم کیا جائے گا، ان کا کہنا تھا کہ کم سن بچی کو زیادتی کے بعد قتل کردیا گیا،گھناؤنی حرکت پر شرمندگی ہوتی ہے کہ ہمارا معاشرہ کہاں جارہا ہے؟
انہوں نے کہا کہ چاہے کوئی کتنا ہی طاقتور ملزم ہو سزا سے نہیں بچ سکے گا، میری اس کیس پر آئی جی اور ایڈیشنل آئی جی سے بات ہوئی ہے۔
شرمناک حرکت کرنے والے مجرم کو نہیں چھوڑیں گے، مجرم کا وہ حال کریں گے کہ پھر کسی گنگا یا زینب کے ساتھ ایسا نہ ہو، مقتول بچی کے لواحقین کی مالی معاونت بھی کی ہے۔
اس حوالے سے پولیس حکام کا کہنا ہے کہ جائے وقوعہ پر لگے سی سی ٹی وی کیمروں کی فوٹیج حاصل کر رہے ہیں، جلد اس گاڑی تک پہنچ جائیں گے جس سے بچی کی لاش پھینکی گئی۔
دوسری جانب بچی کی لاش کا جناح اسپتال میں پوسٹ مارٹم مکمل کر لیا گیا جس میں بچی کے ساتھ زیادتی کی تصدیق ہوگئی ہے، پولیس سرجن ڈاکٹر سمعیہ سید کے مطابق مقتولہ بچی کی عمر 9 سے 11 سال کے درمیان ہے، پوسٹ مارٹم کے ابتدائی نتائج مقتولہ بچی کے ساتھ جنسی تشدد کی نشاندہی کرتے ہیں۔
