کراچی : چوہے تقریباً ہر گھر کا مسئلہ ہوتے ہیں جن کو دیکھ کر ایک کراہیت سی محسوس ہوتی ہے، ان سے چھٹکارے کیلئے کئی جتن کیے جاتے ہیں۔
چوہے نہ صرف بے حد سخت جان ہوتے ہیں بلکہ انتہائی چالاک بھی کیونکہ ایک طرف نئی سے نئی اور زہریلی دوائیں ان پر اثرانداز نہیں ہوتیں تو دوسری جانب یہ خود بھی اتنے مکار ہیں کہ انسانی چالوں کو جلد ہی سمجھ جاتے ہیں اور ایسی جگہوں سے گزرنا ہی چھوڑ دیتے ہیں جہاں یہ دوائیں ڈالی جاتی ہیں۔
اس کے باوجود چوہوں سے نجات اور انہیں ہلاک کرنے کے کچھ طریقے ایسے ہیں جو پرانے، روایتی اور گھریلو قسم کے ضرور ہیں لیکن آج بھی مؤثر ہیں جنہیں اختیار کرکے آپ کو مہنگی چوہے مار دواؤں کی ضرورت نہیں رہے گی۔
پودینے کا تیل
چوہوں کو پودینے کی تیل کی خوشبو بالکل بھی پسند نہیں ہوتی۔ آپ کے گھر میں اگر چوہے آتے ہیں تو آپ تیل میں روئی کو ڈبو کر ان تمام جگہوں پر رکھ دیں جہاں سے چوہے گزرتے ہوں اور یہ عمل 4 سے 5 دن بعد دہرائیں اور پھر دیکھیں کہ چوہے کس طرح آپ کے گھر سے بھاگ جائیں گے۔
آلو کا پاؤڈر
پودینے کے تیل کی طرح آپ چوہے کی گزرگاہوں پر آلو کا پاؤڈر چھڑک دیں، جسے وہ فوراً کھائیں گے اور کھاتے ہی ان کی آنتیں سوجھ جائیں گی جس کے بعد وہ مرجائیں گے۔
پیاز
پیاز کی بو چوہوں کو ذرا نہیں بھاتی اور اس کی مہک سے وہ فوری طور پر اپنی جگہ چھوڑ دیتے ہیں، اور یہ عمل آپ کو ہر ایک دن بعد دہرانا ہے۔
کوکا پاؤڈر اور پلاسٹر آف پیرس
گھر کی ان تمام جگہوں پر آپ تھوڑا سا کوکا پاؤڈر اور پلاسٹرآف پیرس چھڑک دیجیے، جہاں سے چوہے آتے جاتے ہیں، یہ مکسچر کھاتے ہی وہ پانی کی تلاش میں فوری طور پر آپ کے گھر سے بھاگ جائیں گے اور تھوڑی ہی دیر بعد مرجائیں گے۔
لال مرچ
گھرکے کچن میں موجود لال مرچوں کے استعمال سے بھی آپ چوہوں سے چھٹکارا پاسکتے ہیں۔ پسی ہوئی لال مرچ اپنے گھر کے تمام کونوں پر چھڑک دیں جس سے چوہے فوری طور پر بھاگ جائیں گے۔
لہسن
لہسن کا ایک جوا یا پھر لہسن اور پانی کا مکسچر چوہوں کی گزرگاہوں پر رکھ دیجیئے اور دیکھیے کہ کس طرح آپ چوہوں سے چھٹکارا پالیں گے۔
لونگ
گرم مصالحے میں استعمال کی جانے والی لونگ یا اس کا تیل چوہوں کو بالکل پسند نہیں ہوتا اور آپ اسی چیز کا فائدہ اٹھاتے ہوئے لونگ کی مدد سے چوہوں کو بھگا سکتے ہیں، اس کے لیے آپ نے چند لونگیں چوہوں کی گزرگاہوں پر رکھنی ہیں اور نتیجہ دیکھنا ہے۔
