سکھر : پاک سرزمین پارٹی کے رہنما مصطفیٰ کمال نے قائد ایم کیوایم پر کڑی تنقید کرتے ہوئے کہا ہے کہ قائد ایم کیوایم کے خلاف کارروائی نہ کرنے پر حکومت جواب دے۔ متحدہ کی را سے فنڈنگ اور تعلقات کے بارے میں ملک کی آٹھ اہم شخصیات کو بھی علم ہے ان کے نام جلد منظر عام پر لاؤں گا۔
تفصیلات کے مطابق پاک سرزمین پارٹی کے رہنما مصطفی کمال کی توپوں کا رخ ایک بار پھر قائد ایم کیوایم کی طرف ہوگیا ہے۔
سکھر میں میڈیا سے گفتگو کرتے ہوئے انہوں نے کہا کہ قائد ایم کیوایم پر را کے الزامات ثابت ہونے کے باوجود کارروائی نہیں کی جارہی، ان کا کہنا تھا کہ کراچی میں امن ہوگیا تو قائد ایم کیوایم کی تنخواہ کم ہوجائے گی۔
انہوں نے کہا کہ الطاف حسین نے کراچی ، حیدر آباد جیسے شہروں کی نئی نسل کو تعلیم کے میدان میں پیچھے کردیا آج را کی فنڈنگ نے کراچی کو تعلیم کے میدان میں 43 اور حیدرآباد کو 62 ویں نمبر تک پہنچا دیا ہے ۔
قائد ایم کیوایم نے را سے متعلق کسی دستاویز کی تردید نہیں کی ایم کیوایم کے قائد نے چار بار را کے ایجنٹ سے ملاقاتیں کیں۔
انہوں نے کہا کہ رحمان ملک کے علاوہ آٹھ دیگرپردہ نشینوں کو بھی را کی فنڈنگ کا پتہ ہے، ان کے نام جلد منظر عام پر لاؤں گا۔ مصطفیٰ کمال کا کہنا تھا کہ قائد ایم کیو ایم کی رفاقت میں طویل وقت گزرا مجھے اندر اور باہر کی سب خبر ہے۔
مصطفیٰ کمال نے کہا کہ گزشتہ روز ہمارے قافلے پر پتھراؤ کیا گیا لیکن ہم نے کسی کے خلاف مقدمہ درج نہیں کرایا، اپنے ساتھیوں سے کہا ہے کہ ہمیں ان لوگوں سے لڑائی نہیں لڑنی اور جو لوگ گمراہ ہیں ان سے ہمدردی ہے، ہمیں ان ہی لوگوں کی اصلاح کرنی ہے۔
ایک سوال کے جواب میں انہوں نے کہا کہ متحدہ کے رہنما سلیم شہزاد سے کوئی رابطہ نہیں ہے نہ ہی وہ پاک سر زمین پارٹی میں آرہے ہیں۔ انہوں نے کہا کہ لندن آفس کھولنے کا مقصد متحدہ کو مزید ڈوز دینا ہے جو کہ ضروری ہے۔
