ARYNews.tv | Urdu – Har Lamha Bakhabar

Tag: Rawalpindi

  • ایل او سی: پاک فوج کا بھارتی اشتعال انگیزی کا منہ توڑ جواب، پانچ بھارتی فوجی ہلاک

    ایل او سی: پاک فوج کا بھارتی اشتعال انگیزی کا منہ توڑ جواب، پانچ بھارتی فوجی ہلاک

    راولپنڈی: بھارتی فوج نے ایل او سی کی شہری آبادی پر بلااشتعال فائرنگ کرکے خاتون اور بچوں سمیت چھ پاکستانیوں کو زخمی کردیا، پاک فوج نے جوابی کارروائی میں پانچ بھارتی فوجی مار گرائے۔

    تفصیلات کے مطابق لائن آف کنٹرول پر بھارتی فوج کی جانب سے ایک بار پھر بلا اشتعال فائرنگ کی گئی ہے، آئی ایس پی آر کا کہنا ہے کہ بھارتی فوج نےچری کوٹ سیکٹر پر فائرنگ کی۔

    بھارتی فوج کی جانب سے ایل او سی پر آئے روز بلا اشتعال فائرنگ کے واقعات سامنے آرہے ہیں، آج چری کوٹ سیکٹر پر بھارتی فوج نے فائر کھول دیے۔

    مزید پڑھیں: وقت آگیاہے بھارت اپنےجھوٹے دعوؤں پر سچ بولے، ڈی جی آئی ایس پی آر

    پاک فوج کے شعبہ تعلقات عامہ آئی ایس پی آر کا کہنا ہے کہ بھارتی فورسز کی فائرنگ سے ایک خاتون اور چاربچوں سمیت چھ شہری زخمی ہو گئے۔

    آئی ایس پی آر کے اعلامیے کے مطابق بھارتی فورسز نے ایل او سی پرشہری آبادی کونشانہ بنایا، فائرنگ سے ہونے والے زخمیوں کو طبی امداد کیلئے فوری طور پر اسپتال منتقل کردیا گیا، زخمیوں میں شبنم، کاشان، فیضان، نشا، آصفہ شامل ہیں جن کا تعلق سریاں گاؤں سے ہے جبکہ ایک زخمی شاہد حسین کا تعلق شفرگاؤں سے ہے۔

    آئی ایس پی آر کے مطابق پاک فوج نے بھرپورجوابی کارروائی کرکے بھارتی چیک پوسٹوں کو نشانہ بنایا جس کے نتیجے میں پانچ بھارتی فوجی مارے جانےاور کئی کے زخمی ہونے کی اطلاعات ہیں۔

  • زہریلی چائے پینے سے ماں بیٹا جاں بحق، باپ اور دو بچوں کی حالت تشویشناک

    زہریلی چائے پینے سے ماں بیٹا جاں بحق، باپ اور دو بچوں کی حالت تشویشناک

    راولپنڈی : زہر خوانی سے ایک ہی خاندان کے پانچ افراد کی حالت بگڑ گئی، وسیم نامی شخص کی بیوی اور ایک بیٹا جاں بحق ہوگئے، وسیم اور دو بچے زیرعلاج ہیں۔

    تفصیلات کے مطابق راولپنڈی کے علاقے بوہڑ بازار میں چائے پینے سے ایک ہی خاندان کے پانچ افراد کی حالت غیر ہوگئی جنہیں طبی امداد کیلئے ڈسٹرکٹ اسپتال منتقل کیا گیا، متاثرہ افراد میں گھر کا سربراہ وسیم بھی شامل ہے۔

    وسیم اور اس کے دو بچوں دس سالہ جویریہ اور تیرہ سالہ ارحم کی حالت تشویشناک ہے، اہلیہ اور آٹھ سالہ ابراہیم نے اسپتال پہنچتے ہی دم توڑ دیا۔ پولیس کو واقعے کی اطلاع اسی عمارت میں رہائش پذیرعمارت کے بیرون ملک مقیم مالک کے بھتیجے جنید نے دی۔

    ڈی ایس پی سٹی اعجازشاہ کا کہنا ہے کہ چائے میں زہردیا گیا یا اجتماعی خودکشی ہے، تحقیقات کررہےہیں۔ وسیم کے ذمہ عمارت کے مالک کی جائیداد کی دیکھ بھال تھی۔ وسیم کی بہن بھی اہل محلہ کی اطلاع پرجائے وقوع پر پہنچ گئی۔

     اسپتال انتظامیہ نے بتایا ہے کہ تمام افراد کی ابتدائی رپورٹ میں ثابت ہوا ہے کہ سب نے زہریلی چائے پی اور مبینہ طور پر تمام افراد نے اجتماعی خودکشی کی، پولیس حکام کے مطابق وقاعے تفتیش جاری ہے جلد اصل صرتحال تک پہنچ جائیں گے ۔

  • قوم کی فوج سے محبت سر آنکھوں پر، کھیل سیاست سے پاک ہونے چاہئیں، میجر جنرل آصف غفور

    قوم کی فوج سے محبت سر آنکھوں پر، کھیل سیاست سے پاک ہونے چاہئیں، میجر جنرل آصف غفور

    راولپنڈی : ڈی جی آئی ایس پی آر میجر جنرل آصف غفور نے کہا ہے کہ ہمیں قوم کی محبتوں کا بخوبی اندازہ ہے، ان کی محبت سر آنکھوں پر، کھیل سیاست سے پاک ہونے چاہئیں۔

    یہ بات انہوں نے سماجی رابطے کی ویب سائٹ ٹوئٹر پر پاکستانیون کی جانب سے پی ایس ایل کے فائنل میچ میں کھلاڑیوں کو فوجی کیپ اور شرٹس پہننے کی خواہش کے اظہار کے جواب میں اپنے تازہ پیغام میں کہی۔

    ڈی جی آئی ایس پی آر نے اپنے ٹوئٹ میں پاکستان زندہ باد کے ہیش ٹیگ سے جاری پیغام میں کہا کہ پیارے پاکستانی پی ایس ایل فائنل میں فوجی کیپس، شرٹس پہننے کی خواہش رکھتے ہیں، پاک مسلح افواج کو قوم کی محبت اور حمایت کا بخوبی اندازہ ہے۔

    انہوں نے کہا کہ پاکستانی قوم کی مسلح افواج سے محبت سر آنکھوں پر، مسلح افواج سے قوم کی محبت ایسے اقدامات کی محتاج نہیں، ہمیں یقین ہے آپ اور ہمارا تعلق ان چیزوں سے بالاتر ہے، کھیل سیاست سے پاک ہونے چاہئیں۔

    میجر جنرل آصف غفور نے کہا کہ روشنیوں کے شہر کو کھیل سے بھرپور لطف اندوز ہونا چاہئیے، پیارے پاکستانیو کرکٹ سے بھرپور لطف اندوز ہوں، کھیل کو کھیل کے طور پر انجوائے کریں۔

    واضح رہے کہ سوشل میڈیا پر پاکستانی عوام کی بڑی تعداد نے ملٹری کیپ پہن کر میچ دیکھنے کی خواہش کا اظہار کیا تھا، سوشل میڈیا پر یہ مہم بھارتی کرکٹ ٹیم کے آسٹریلیا کے خلاف میچ میں فوجی ٹوپیاں پہن کر شریک ہونے کے جواب میں شروع کی گئی تھی.

    اس سے قبل بھارتی کرکٹ ٹیم نے آسٹریلیا کیخلاف ون ڈے سیریز کے میچ میں بورڈ سے اجازت لے کرفوجی کیپس پہنی تھیں۔

    فوجی کیپس پہننے کے باوجود بھارتی کرکٹ ٹیم کی آسٹریلیا کےہاتھوں خوب دھنائی ہوئی، جس میں اہم کردار پاکستانی نژاد کھلاڑی عثمان خواجہ نے سنچری اسکور کرکے ادا کیا۔

  • آرمی چیف جنرل باجوہ سے برطانوی سیکرٹری دفاع اسٹیفن لوگروو کی ملاقات

    آرمی چیف جنرل باجوہ سے برطانوی سیکرٹری دفاع اسٹیفن لوگروو کی ملاقات

    راولپنڈی : آرمی چیف جنرل قمر جاوید باجوہ سے برطانوی سیکرٹری دفاع اسٹیفن لوگروو نے ملاقات کی، ملاقات میں باہمی تعلقات اور خطے کی سکیورٹی صورتحال پر گفتگو کی گئی۔

    پاک فوج کے شعبہ تعلقار عامہ آئی ایس پی آر کے مطابق برطانوی سیکریٹری دفاع اسٹیفن لوگروو نے راولپنڈی میں جی ایچ کیو کا دورہ کیا۔

    اس موقع پر انہوں نے آرمی چیف جنرل قمر جاوید باجوہ سے ملاقات کی ، ملاقات میں باہمی دلچسپی کےامور اور علاقائی سیکیورٹی صورتحال پر تبادلہ خیال کیا گیا۔

    برطانوی سیکریٹری دفاع اسٹیفن لوگروو نے خطے میں امن کیلئے پاکستان کے مثبت کردار کی تعریف کی، ان کا کہنا تھا کہ خطے میں امن کیلئے پاکستان کا مثبت کردار قابل قدر ہے۔

    واضح رہے کہ پاک بھارت حالیہ کشیدگی کے تناظر میں گزشتہ دنوں وزیرِ اعظم عمران خان اور برطانوی وزیر اعظم تھریسامے میں ٹیلی فونک رابطہ ہوا۔

    مزید پڑھیں : وزیرِ اعظم عمران خان اور برطانوی وزیر اعظم تھریسامے میں ٹیلی فونک رابطہ

    پاک برطانیہ وزرائے اعظم کے مابین فون پر دونوں رہنماؤں نے پلوامہ حملے کے بعد پاک بھارت کشیدگی کے تناظر میں تفصیلی گفتگو کی، وزیر اعظم تھریسامے نے دورہ پاکستان کی دعوت قبول کر لی۔

    عمران خان نے پاکستان کے مؤقف کی حمایت پر برطانوی ہم منصب کا شکریہ ادا کیا، برطانوی وزیر اعظم تھریسامے نے بھارتی پائلٹ کی رہائی کے فیصلے کی تعریف کی۔

  • پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    پاک فوج کا ایل او سی پر بھارتی جارحیت کا مؤثر جواب، دشمن کی چوکیاں تباہ

    راولپنڈی : گزشتہ24گھنٹوں کے دوران بھارتی فوج نے ایل او سی کے مختلف سیکٹرز پر وقفے وقفے سے فائرنگ کا سلسلہ جاری رکھا، پاک فوج کی جوابی کارروائی سے آگ اگلتی دشمن کی توپیں خاموش ہوگئیں۔

    تفصیلات کے مطابق لائن آف کنٹرول پر گزشتہ24گھنٹے کی صورتحال کیا رہی اس حوالے سے آئی ایس پی آر نے رپورٹ جاری کردی ہے رپورٹ کے مطابق بھارت کی ایل او سی پر بلااشتعال فائرنگ کئی گھٹے تک جاری رہی۔

    بھارتی فورسز نے نیزہ پیر، خنجر منور، بٹل، باغ سر، پانڈو سیکٹرز پر فائرنگ کی، آئی ایس پی آر کے مطابق بھارتی فورسز کی جانب سے وقفے وقفے سے فائرنگ کی گئی، پاک فوج نے مؤثر جوابی کارروائی کرکے بھارتی چیک پوسٹوں کو نشانہ بنایا، گزشتہ24گھنٹےمیں پاکستان کا کوئی جانی نقصان نہیں ہوا۔

    ترجمان پاک فوج کا کہنا ہے کہ لائن آف کنٹرول پر مسلح افواج ہر قسم کی بھارتی جارحیت سے نمٹنے کیلئے مکمل طور پر تیار ہیں۔

    علاوہ ازیں گزشتہ روز بھارتی فوج کی فائرنگ اور گولہ باری کے باعث شہید ہونے والے نائیک خرم شہید کی نمازجنازہ ڈی جی خان میں ادا کردی گئی ،آئی ایس پی آر کے مطابق نائیک خرم شہید کو پورے فوجی اعزاز کے ساتھ سپرد خاک کردیا گیا۔

  • آرمی چیف جنرل باجوہ کا راولپنڈی کور ہیڈ کوارٹرز کا دورہ، پاک فوج کی تیاریوں کا جائزہ

    آرمی چیف جنرل باجوہ کا راولپنڈی کور ہیڈ کوارٹرز کا دورہ، پاک فوج کی تیاریوں کا جائزہ

    راولپنڈی : آرمی چیف جنرل قمر جاوید باجوہ نے راولپنڈی کور ہیڈ کوارٹرز کا دورہ کیا، کور کمانڈر راولپنڈی  نے سربراہ پاک فوج کو تمام تر تیاریوں سے آگاہ کیا۔

    پاک فوج کے شعبہ تعلقات عامہ آئی ایس پی آر کے ڈائریکٹر جنرل میجر جنرل آصف غفور کے مطابق آرمی چیف جنرل قمر جاوید باجوہ نے راولپنڈی کور ہیڈ کوارٹرز کے دورے پر پہنچے تو کور کمانڈر راولپنڈی نے ان کا استقبال کیا۔

    اس موقع پر آرمی چیف کو کور کمانڈر راولپنڈی کی جانب سے آپریشنل تیاریوں پر بریفنگ دی گئی، ڈی جی آئی ایس پی آر کا کہنا ہے کہ کور کمانڈر راولپنڈی نے اپنی بریفنگ میں آرمی چیف کو ایل او سی، ورکنگ باؤنڈری اور ایل اے سی پر تیاریوں سے آگاہ کیا، آرمی چیف جنر قمر باجوہ نے پاک فوج کی تیاریوں اور مستعدی کی صورتحال پر اطمینان کا اظہار کیا۔

    یاد رہے کہ اس سے قبل آرمی چیف جنرل قمر جاوید باجوہ نے پاک فضائیہ کے ہیڈ کوارٹرز کا بھی دورہ کیا تھا، آرمی چیف اور پاک فضائیہ کے سربراہ مجاہد انور خان کے درمیان ہونے والی ملاقات میں‌ ملک کو درپیش خطرات اور جوابی حکمت عملی پربھی تفصیلی گفتگو ہوئی۔

    مزید پڑھیں: آرمی چیف، سربراہ پاک فضائیہ ملاقات، بھارتی جارحیت کا بھرپورجواب دینے پر اتفاق

    مسلح افواج کے دونوں سربراہان نے خطرے کی صورت میں پاک فوج اور پاک فضائیہ کے رد عمل کی تیاریوں کو سراہا۔ سربراہان نے واضح کیا کہ پاکستان کی مسلح افواج بھارت کی کسی بھی مہم جوئی یا حملے کا منہ توڑ جواب دینے کیلئے ہر وقت تیار ہیں۔

  • راولپنڈی : آرمی چیف جنرل باجوہ سے جرمن سفیر مارٹن کوبلر کی ملاقات

    راولپنڈی : آرمی چیف جنرل باجوہ سے جرمن سفیر مارٹن کوبلر کی ملاقات

    راولپنڈی : آرمی چیف جنرل قمر جاوید باجوہ سے جرمن سفیر مارٹن کوبلر نے ملاقات کی، ملاقات میں باہمی دلچسپی کے امور اور علاقائی سیکیورٹی کی صورتحال پر بھی تبادلہ خیال کیا گیا۔

    پاک فوج کے شعبہ تعلقات عامہ آئی ایس پی آر کے مطابق جرمن سفیر مارٹن کوبلر نے جنرل ہیڈ کوارٹر (جی ایچ کیو) کا دورہ کیا اور آرمی چیف جنرل قمر جاوید باجوہ سے ملاقات کی۔

    ملاقات میں علاقائی امن اور سیکیورٹی کی صورتحال کے علاوہ باہمی دلچسپی کے امور پر بھی تبادلہ خیال کیا گیا، آئی ایس پی آر کے مطابق جرمن سفیرمارٹن کوبلرکا کہنا تھا کہ پاکستان میں سیکیورٹی صورتحال بہتر ہوئی ہے، خطے میں بہتر سیکیورٹی کے اقتصادی سرگرمیوں پر مثبت اثرات مرتب ہوئے ہیں۔

  • شمالی وزیرستان تعمیر اور ترقی کی طرف گامزن ہوگیا، میجر جنرل آصف غفور

    شمالی وزیرستان تعمیر اور ترقی کی طرف گامزن ہوگیا، میجر جنرل آصف غفور

    راولپنڈی : ڈی جی آئی ایس پی آر میجر جنرل آصف غفور نے کہا ہے کہ پاک افغان سرحد پر باڑ لگانے کے باعث دہشت گرد حملوں کا سلسلہ رک گیا ہے، پرامن شمالی وزیرستان تعمیر اور ترقی کی طرف گامزن ہوگیا، فاٹا کے عوام کو مساوی حقوق ملیں گے۔

    ان خیالات کا اظہار انہوں نے شمالی وزیرستان میں ملکی غیرملکی میڈیا نمائندوں کے دورے کے موقع پر گفتگو کرتے ہوئے کہی، ڈی جی آئی ایس پی آر کے ہمراہ ملکی اور غیرملکی میڈیا کے نمائندوں نے پشاور، میرانشاہ، غلام خان بارڈر ٹرمینل کا دورہ کیا۔

    اس موقع پر میڈیا نمائندوں نے کمانڈر پشاور کور اور جی سی او شمالی وزیرستان سے ملاقات کی، دہشت گردوں کیخلاف کیے گئے اب تک کیے گئے آپریشنز کے بعد یہ میڈیا نمائندوں کی پہلی بار علاقے کےعوام سے براہ راست ملاقات ہے۔

    نمائندوں نے میرانشاہ بازار میں عوام سے امن کی بہتر صورتحال اور انتظامی مسائل پر گفتگو کی، عوام نے پاک فوج کی جانب سے کیے گئے بحالی امن اور ترقی کے اقدامات کو سراہا، شمالی وزیرستان کے عوام نے میڈیا نمائندوں کو اپنے درمیان دیکھ کر خوشی کا اظہار کیا، میرانشاہ بازار میں عوام نے ڈی جی آئی ایس پی آر کے ساتھ سیلفیاں بھی بنوائیں۔

    اس موقع پر گفتگو کرتے ہوئے ڈی جی آئی ایس پی آر میجر جنرل آصف غفور نے کہا کہ پاک افغان سرحد پر باڑ نہ ہونے کے باعث دہشت گرد حملہ آور ہوتے تھے۔

    انہوں نے کہا کہ  آرمی چیف جنرل قمر جاوید باجوہ کا خیال تھا کہ سرحد محفوظ ہونی چاہیے، باڑ لگانے کے باعث سرحد سے حملوں کا سلسلہ رک گیا،70برس سے علاقہ غیر کہلانے والا اب پاکستان کا حصہ ہے، پرامن شمالی وزیرستان تعمیر اور ترقی کی طرف گامزن ہوگیا، فاٹا کے عوام کو مساوی حقوق ملیں گے۔

  • راولپنڈی : دو گروپوں میں فائرنگ، زد میں آکر چار سالہ بجی جاں بحق، 3 ملزمان گرفتار

    راولپنڈی : دو گروپوں میں فائرنگ، زد میں آکر چار سالہ بجی جاں بحق، 3 ملزمان گرفتار

    راولپنڈی : زمین کے تنازعہ پر دو گروپوں میں گولیاں چل گئیں، فائرنگ کی زد میں آکر چارسالہ بچی جان سے ہاتھ دھو بیٹھی، پولیس نے واقعےمیں ملوث 3ملزمان گرفتار کرلیے ۔

    تفصیلات کے مطابق راولپنڈی کے علاقے چونترہ سنگرال میں زمین کے تنازعہ پر دو قبضہ گروپوں کے درمیان فائرنگ کا واقعہ پیش آیا ہے، جس کے نتیجے میں فائرنگ کی زد میں آکر گھر کے صحن میں کھیلنے والی چار سال کی بچی علیزہ رمضان زخمی ہوگئی لیکن فوری طبی امداد نہ ملنے کے باعث اسپتال پہنچنے سے قبل ہی جاں بحق ہوگئی۔

    علاقہ مکینوں کا کہنا ہے کہ آٹھ دن سے مسلسل فائرنگ ہورہی ہے اور پولیس تماشا دیکھ رہی ہے، ہم نے فون پر کئی بار اطلاع دی لیکن پولیس نہیں پہنچی۔

    بعد ازاں پولیس نے کارروائی کرتے ہوئے بچی کے قتل میں ملوث تین ملزمان کو گرفتار کرلیا، علاقہ ایس ایچ او کا کہنا ہے کہ دیگرملزمان کی گرفتاری کیلئے چھاپےمارے جارہے ہیں۔

    اے آر وائی نیوز کے نمائندے بابر خان کے مطابق چونترہ کا علاقہ سنگرال گزشتہ ایک ہفتے سے شہریوں کیلئے نوگو ایریا بنا ہوا ہے۔ دونوں جانب سے فائرنگ کے باعث علاقے میں خوف وہراس پھیلا ہوا ہے۔

    مزید پڑھیں: نوشہرہ میں کار پر فائرنگ، بچی جاں بحق، 3 افراد زخمی

    لوگوں کو ڈرا دھمکا کر ان کی زمینوں پر قبضے کیے جاتے ہیں تمام صورتحال جاننے کے باوجود راولپنڈی پولیس ان بااثر ملزمان کیخلاف کارروائی کرنے سے گریزاں ہے۔