ملتان : گورنر اسٹیٹ بینک رضا باقر نے کہا ہے کہ اسٹیٹ بینک کارول ایک ریگولیٹر کا ہے، اس کا مقصد بینک کی مالی حالت مضبوط کرنا ہے۔
ملتان میں پریس کانفرنس سے خطاب کرتے ہوئے گورنر اسٹیٹ بینک نے کہا کہ ہم نے بینکوں کو ٹارگٹ دیے ہیں، اس سال کا ٹارگٹ ایک ہزار700ارب روپے رکھا ہے، کچھ ایریاز ہیں جہاں مزید کام کرنے کی ضرورت ہے۔
ان کا کہنا تھا کہ اسٹیٹ بینک کا کردار ایک ریگولیٹر کا ہے، اس ریگولیٹر کا کام ہے بینکوں پر نظر رکھے اور اس کا مقصد بینک کی مالی حالت کو مضبوط کرنا ہے۔ ریگولیٹر پالیسی اور فریم ورک بنا سکتا ہے ریگولیٹر ایسا فریم ورک بھی دے سکتا ہے جس سے بینک پر پنیلٹی بھی لگے۔
گورنر اسٹیٹ بینک نے کہا کہ ابتدائی طور پر3 نکات کو اجاگر کروں گا، ہم سب کو یہ تسلیم کرنا چاہئے کہ ملتان ایک تاریخی شہر ہے، ایگریکلچرل فنانس میں جتنا حصہ ساؤتھ پنجاب ملتان کوملنا چاہیے وہ نہیں مل رہا۔
انہوں نے کہا کہ ساؤتھ پنجاب کے13اضلاع پورے پنجاب کا40 فیصدحصہ ہیں، ان اضلاع کو فنانس 26 فیصد جارہا ہے جتنا ان کاحصہ ہے وہ نہیں جا رہا۔
ایک سوال کے جواب میں باقر رضا نے کہا کہ جہاں کسانوں کو بینکوں سے قرضہ نہیں جارہا وہاں کیا بہتری لائی جا سکتی ہے، اسٹیٹ بینک اور دیگر بینکوں سے پہلے جہاں فنانس کم مل رہا تھا اب وہاں بہتری ہے۔
