بھارتی فلم انڈسٹری کے سینئر اداکار رضا مراد ان دنوں اپنی موت کی جھوٹی خبروں کے باعث شدید پریشانی میں مبتلا ہیں، اداکار کی وفات سے متعلق ایک فیک پوسٹ تیزی سے سوشل میڈیا پر وائرل ہورہی ہے۔
بھارتی میڈیا رپورٹس کے مطابق فیک پوسٹ کے باعث نہ صرف رضا مراد اور ان کے اہلِ خانہ بلکہ ان کے چاہنے والے بھی ذہنی اذیت کا شکار ہیں۔
سینئر اداکار اس واقعہ سے ناراض ہو کر ممبئی کے امبولی پولیس اسٹیشن میں نامعلوم افراد کے خلاف باضابطہ شکایت درج کرانے پر مجبور ہوگئے ہیں۔
رضا مراد نے ایک ویڈیو اور بیان کے ذریعے واضح کیا کہ وہ مکمل طور پر صحت مند اور زندہ ہیں، بار بار یہ بتاتے بتاتے میرا گلا، زبان اور ہونٹ خشک ہوگئے ہیں۔
انہوں نے کہا کہ دنیا بھر سے ان کے پاس فون کالز اور پیغامات آ رہے ہیں۔ مداح اور دوست ان کی موت کی جھوٹی خبروں کے باعث ان کی خیریت دریافت کر رہے ہیں۔
اداکار نے ایسی افواہیں پھیلانے والوں پر سخت برہمی کا اظہار کرتے ہوئے کہا کہ یہ انتہائی شرمناک حرکت ہے۔ یہ کام وہی لوگ کرتے ہیں جو اپنی زندگی میں کچھ نہیں کر پاتے اور سستی شہرت کے لیے اس قسم کی حرکتیں کرتے ہیں۔
انہوں نے پولیس سے اپیل کی کہ اس طرح کے غیر ذمہ دارانہ اقدامات کے خلاف سخت کارروائی کی جائے تاکہ آئندہ کوئی اور شخص اس طرح کی حرکت نہ کرے۔
بھارتی اداکار رضا مراد اہلیہ اور بیٹی کے ساتھ لاہور پہنچ گئے
ان کی شکایت پر پولیس نے فوری کارروائی کرتے ہوئے سائبر سیل کی مدد حاصل کر لی ہے۔ ابتدائی تحقیقات کے مطابق، سوشل میڈیا پر وائرل ہونے والی اس فیک پوسٹ کو شیئر کرنے والے افراد کی نشاندہی کرنے کی کوشش کی جارہی ہے۔
